Matius 24

TENTANG AKHIR JEMEN 24-25

Bait ni Allah malé iruntuhen 24: 1-2

(Mrk. 13:1-2; Luk. 21:5-6)

Mari oya Yesus tangkuh ari Bait ni Allah nye beluh, renyel murid-murid-É mudekati Wé den munilok ku gedung-gedung Bait ni Allah.

2 Iperin Yesus ku pakea : “Gere ke ièngon kam bèwèné ni? Sesunguhé Kuperinen ku kam, kasé gere idaténen taring i sien sara atu i atan ni atu si lèn si gere iruntuhen.”

Pemulo ni penderiteen 24: 3-14

(Mrk. 13:3-13; Luk. 21: 7-19)

3 Ketike Yesus kunul i atas ni Bur Zaitun, gèhle seseréng ni murid-murid-É ku Wé, kené : “Perinen ku kami, selohen ke hal oya terjadi, den sana ke teneé gèh ni Guru urum tene ni akhir jemen?”

4 Jeweb Yesus, iperin-É ku pakea : “Bejege-jegele kati enti sahan pé si munyeruken kam!

5 Sebeb kasé puren delé jema gèh wan geral-Ku nye mumerin : Akule Kristus, den pakea munyeruken delé jema.

6 Kam malé mumengé ling ni perang urum keber tentang perang, ingetle enti kam macik; sebeb hal oya turah terjadi, tetapé oya gere ilen pemariné.

7 Sebeb bengsa malé uet mulewen bengsa den kerejeen mulewen kerejeen, den malé terjadi kelapénen urum gempa bumi i berbagé ton;

8 tetapé bèwèné ni baro pemuloé ilen, lagu jema banan tengah benemah si murasa sakit sebagé tene malé besalin.

9 Renyel pakea munyerahen kam kin isikse den iunuh, nye segele bengsa kasé begeli até ku kam entap ni geral-Ku.

10 Waktu oya kasé delé jema murtad, nye sara urum si lèn saling munyerahen urum saling begeli até;

11 den delé nabi pelsu uet nye munyeruken delé jema;

12 den entap ni kejahaten makin mutamah, delé jema kasihé mujadi bengi.

13 Tetapé jema si betehen sawah ku pemariné, wé malé iselamaten.

14 Den Injil Kerejeen ni malé ikeberen i seluruh denie sebagé kesaksien kin bèwèné bengsa, mari oya barole tibe peremèhené.”

Penderiteen si olok pedéh den Mesias-mesias pelsu 24: 15-28

(Mrk. 13:14-23; Luk. 21:20-24)

15 “Jadi ketike kam munèngon Pembinasa si keji sesuk i ton kudus a, lagu si nge iperinen nabi Daniel – si mubaca kenaké mungerti –

16 jema-jema si ara i Yudea kenaké munyangkanen diri ku bur.

17 Jema si tengah i peratasen ni umah enti wé turun kin munuet barang-barang ari umahé,

18 den jema si ara i empus kenaké enti wé ulak kin munuet pekayané.

19 Celakale ine-ine si tengah benemah urum si tengah munusunen bayié i waktu oya.

20 Bedoàle, kati waktu kam munyangkanen diri enti terjadi i musim bengi atawa pé tar lo Sabat.

21 Sebeb i waktu oya malé terjadi penderiteen si olok pedéh, si lagu oya gere ilen pernah terjadi muloi ari ijadinen Allah denie sawah besilo ni den gere ne malé terjadi.

22 Den ike masa oya gere ipesingket, gere ara jema si selamat; tetapé entap ni jema-jema pilihen masa oya ipesingket.

23 Renyel ike ara jema mumerin ku kam : Èngon, Kristus ara i sien, atawa : Wé ara i oné, enti kam percaya.

24 Sebeb kasé Kristus-kristus pelsu urum nabi-nabi pelsu uet, den pakea munaranen tene mukjizet si luer biesa den keajaipen, sehinge munyeruken, bahkan sekireé mungkin, jema-jema pilihen pé.

25 Perhatinenle, nge mulonen Kuperinen ku kam.

26 Entap ni oya, ike pakea mumerin ku kam : Èngon, Wé ara i padang gurun, enti kam beluh ku oné; atawa : Èngon, Wé ara i wan kamar, enti kam percaya.

27 Sebeb dis lagu kilet mencér ari timur den cayaé sawah ku barat, betapé kasé gèh ni Anak ni Manusie.

28 I sihen pé ara bangké, i oné manuk nasar mukamul.”

Gèh ni Anak Manusie 24: 29-31

(Mrk. 13:24-27; Luk. 21:25-28)

29 “Nge mari masa penderiteen oya, matanlo langsung mujadi gelep, ulen gere munangkuhen cayaé, bintang-bintang betuhen ari langit, den kuasa-kuasa ni langit muguncang.

30 Nge mari oya kasé tene ni Anak ni Manusie teridah i langit, den bèwèné suku bengsa i bumi besebuku nye pakea munèngon Anak ni Manusie gèh i atas ni emun i langit urum kuasa den kemulien si kul.

31 Den Wé mungini malèkat-malèkat-É muniup terompet si keras olok lingé, den pakea mungamulen jema-jema pilihen-É ari keopat arah ni kuyu, ari ujung langit si sara sawah ku ujung langit si lèn.”

Pelejeren ari perumpamaen tentang batang ara 24: 32-35

(Mrk. 13:28-31; Luk. 21:29-33)

32 “Belejerle kam ari perumpamaen tentang batang ara : Ketike ranting-rantingé mujadi lemut den muloi muceding, ibetihi kam bahwa musim porak nge rap.

33 Betapé, ketike ièngon kam hal-hal ni terjadi, betihile bahwa waktué nge dekat, nge i arap ni pintu.

34 Sesunguhé Kuperinen ku kam bahwa angkatan ni gere belalu sawah bèwèné ni terjadi.

35 Langit urum bumi malé belalu, tetapé pecerakan-Ku gere malé belalu.”

Nasihet kati bejege-jege 24: 36-44

(Mrk. 13:32-37; Luk. 17:26-30,

36 “Tetapé tentang lo atawa saaté gere ara sara jema pé si mubetihié, malèkat-malèkat i serge pé gere, Anak pé gere, kecuali Ama we.

37 Dis lagu jemen ni Nuh, betapé keadaen gèh ni Anak ni Manusie kasé puren.

38 Sebeb dis lagu jemen pudaha sebelem banjir si kul, pakea mangan urum minum, kerje urum mungerjenen, sawah ku lo Nuh mayo ku wan perau kul,

39 den pakea gere munyadarié sawah banjir kul a tibe nye mubenénen bebèwèné, betapé halé gèh ni Anak ni Manusie kasé puren.

40 I waktu oya ara roa jema i empus, sara imai den sara itaringen;

41 roa jema banan mugiling i ton penggilingen, sara imai den sara itaringen.

42 Entap ni oya bejege-jegele, sebeb gere ibetihi kam selohen waktué Tuhenmu gèh.

43 Tetapé betihile ini, bahwa ike penempu ni umah nge mubetihi selohen waktué perusuh gèh, tentu wé bejege-jege nye gere idaténené umahé ibungker.

44 Oya kati kam pé kenaké siep- siep, sebeb Anak ni Manusie gèh i waktu si gere ikire kam.”

Perumpamaen tentang temuluk si setie urum temuluk si jahat 24: 45-51

(Luk. 12:41-48)

45 “Sahan ke temuluk si setie urum bijaksana si iangkat rejeé atas seisi ni umahé kin munosanen pakea mangan i waktué?

46 Mubahgie mile temuluk si waktu rejeé gèh, wé idepeti tengah mubueten tugesé;

47 sesunguhé Kuperinen ku kam, bahwa wé  malé iangkat rejeé

atas bèwèné si iempuié. 

48 Tetapé ike temuluk a jahat nye mumerin : Rejengku lemem ilen gèh,

49 den wé muloi muderei temuluk-temuluk si lèn, den mangan minum urum pemabuk.

50 Renyel rejeé a gèh i lo si gere ikireé den i waktu si gere ibetihié,

51 nye mununuh wé, den munos wé sara nasib urum jema-jema munapèk; i onéle kasé ara sebuku urum kertaken ni ipon.”