Matius 25

Perumpamaen tentang sepuluh beberu 25: 1-13

“I waktu oya Kerejeen Serge seumpama sepuluh beberu si munemah lampue nye beluh munyamut aman mayak.

2 Lime ari pakea ogoh nye lime bijaksana.

3 Sebeb beberu si ogoh a munemah lampu, tapé gere munemah minyak kin persediené.

4 Tetapé beberu si bijaksana wa munemah minyak i wan toné urum lampué.

5 Entap ni aman mayak a mokot pedéh gèhé, pakea bèwèné mutunuh nye nomé.

6 Waktu kekelem tenengé ling metuk : Èngon, aman mayak gèh, tangkuhle kam munyamut wé!

7 Renyel uetle bèwèné beberu a nye munetahi lampu ni pakea.

8 Den beberu si ogoh a mumerinen ku beberu si bijaksana wa : Osanen pé minyak ni kam ku kami, sebeb lampu ni kami malé empot.

9 Tetapé jeweb beberu si bijaksana wa, kené : Enti, kasé gere genap kin kami urum kin ni kam; nguken kam beluh ku penjuel mubeli kin kam ken diri.

10 Den waktu pakea beluh mubeli minyak, sawahle aman mayak a, den beberu si nge siep a mayo urum aman mayak a ku pesta pengerjenen, renyel pintu itutup.

11 Nge mari oya, beberu si lèn a pé gèh, kené : Reje, reje, ukenen pé pintu kin kami!

12 Tetapé jeweb aman mayak a, kené : Sesunguhé kuperinen ku kam, aku gere ramah urum kam.

13 Entap ni oya bejege-jegele kam, sebeb gere ibetihi kam loé atawa jemé.”

Perumpamaen tentang talenta 25: 14-30

(Luk. 19:11-27)

14 “Sebeb hal oya dis lagu sara jema rawan si malé beluh ku negeri si gip, den wé munalu temuluk-temuluké nye munyerahen retaé ku pakea.

15 Ku si sara iosahé lime talenta, ku si sara mi iosahé roa talenta, den ku si lèné a iosahé sara talenta, masing-masing munurut kesangupené, renyel wé beluh.

16 Jema si munerime lime talenta wa langsung beluh mujelenen modalé a nye mudepet keuntungen lime talenta;

17 betapé jema si munerime roa talenta, mudepet keuntungen roa talenta.

18 Tetapé jema si munerime sara talenta wa beluh munguruk luang i tanoh nye mununinen sèn ni rejeé a.

19 Lemem nge mari oya, reje ni temuluk-temuluk a gèh nye munaranen perhitungen urum pakea.

20 Jema si munerime lime talenta wa gèh nye imahé lime talenta si lèn, kené : Reje, lime talenta iserahen reje kin naku; èngonle, aku nge mudepet keuntungen lime talenta.

21 Iperin rejeé ku wé : Jeroh pedéh buetmu a, temuluk si jeroh urum setie, ko nge setie atas pepien hal, aku malé munyerahen ku ko delé hal; mayo renyel ku wan galak naté ni rejemu.

22 Jema si munerime roa talenta wa pé gèh, kené : Reje, roa talenta iserahen reje kin naku; èngonle, aku nge mudepet keuntungen roa talenta.

23 Iperin rejeé ku wé : Jeroh pedéh buetmu a, temuluk si jeroh urum setie, ko nge setie atas pepien hal, aku malé munyerahen ku ko delé hal; mayo renyel ku wan galak naté ni rejemu.

24 Den jema si munerime sara talenta wa pé gèh, kené : Reje, kubetih bahwa reje sara reje si okeng, munuling i ton si gere isuk reje, den mungamulen i ton si gere isempak reje;

25 entap ni oya aku terih, nye beluh mununinen talenta ni reje i wan tanoh; inile empu ni reje.

26 Renyel jeweb rejeé ku wé, kené : Woi ko temuluk si jahat urum merke, gere ke nge ibetihi ko bahwa aku munuling i ton si gere kusuken, den mungamulen i ton si gere kusempaken? 

27 Ike beta seharusé ko munobonen sènku a ku bank, den waktu aku gèh kasé, aku munerime sènku iulaken urum bungeé.

28 Kerna oya, ueten renyel sèn a ari wé nye osanen ku jema si munempui sepuluh talenta wa;

29 sebeb ku jep jema si munempui malé iosanen mien den wé malé mukelimpahen; tetapé jema si gere munempui, bahkan sana si ara i wé pé malé iueten ari wé.

30 Den temuluk si gere begune a tekarenle wé ku wan kegelepen si i deret; i onéle kasé sebuku urum kertak ni ipon.”

Penghakimen pemarin 25: 31-46

31 “Ketike Anak ni Manusie gèh wan kemulien-É den bèwèné malèkat urum Wé, kasé Wé kunul i atan ni takhta kemulien-É.

32 Den bèwèné bengsa kasé ikamulen i arap-É, renyel Wé mumisahen pakea sara urum si lèn, lagu gembala mumisahen bebiri ari kaming;

33 den Wé munobonen bebiri-bebiri i semelah kuen-É, tapé kaming-kaming i semelah kiri-É.

34 Renyel Reje a kasé mumerin ku pakea si i semelah kuen-É : Ku inile, kam si iberkati Amang-Ku, warisile Kerejeen si nge isedienen kin kam ari denie mi ijadinen.

35 Sebeb waktu Aku mulapé, kam munosah Aku mangan; waktu Aku gerahan, kam munosah Aku minum; waktu Aku sebagé jema asing, kam munyamut Aku;

36 waktu Aku gere berupuh, kam munosanen Aku pekayan; waktu Aku sakiten, kam munentong Aku; waktu Aku i wan penjere, kam gèh mudemui Aku.

37 Renyel isut jema-jema benar a ku Wé, kené : Tuhen, selohen ke kami munèngon Tuhen mulapé den kami munosah Tuhen mangan, atawa gerahan den kami munosah minum?

38 Den selohen ke kami munèngon Tuhen sebagé jema asing den kami munyamut Tuhen, atawa gere berupuh den kami munosanen Tuhen pekayan?

39 Den selohen ke kami munèngon Tuhen sakiten atawa i wan penjere den kami gèh munentong Tuhen?

40 Jeweb Reje a, iperin-É ku pakea : Sesunguhé Kuperinen ku kam, segele sesanah si nge ibueten kam ku sara ari serinen-serinen-Ku si paling hine ni, kam nge mubuetené kin Aku.

41 Renyel Reje a pé kasé mumerin ku pakea si i semelah kiri-É : Beluh renyel ari arap-Ku, kam jema-jema tekutuk, ku wan rara si kekal, si isedienen kin Belis urum malèkat-malèkaté.

42 Sebeb waktu Aku mulapé, kam gere munosah Aku mangan; waktu Aku gerahan, kam gere munosah Aku minum;

43 waktu aku sebagé jema asing, kam gere munyamut Aku; waktu Aku gere berupuh, kam gere munosanen Aku pekayan; waktu Aku sakiten urum i wan penjere, kam gere munentong Aku.

44 Renyel pakea pé mesut, kené : Tuhen, selohen ke kami munèngon Tuhen mulapé, atawa gerahan, atawa sebagé jema asing, atawa gere berupuh, atawa sakiten, atawa i wan penjere den kami gere mulayani Tuhen?

45 Renyel Reje a kasé mujeweb pakea, kené : Sesunguhé Kuperinen ku kam, segele sesanah si gere ibueten kam ku sara ari si paling hine ni, kam pé gere mubuetené kin Naku.

46 Den pake ni kasé mayo ku wan hukumen si kekal, tapé jema benar ku wan murip si kekal.“