Matius 26

Penyederen keopat tentang kematénen ni Yesus 26: 1-5

Ketike Yesus nge munyelesénen bèwèné pecerakan ini, Wé mumerin ku murid-murid-É :

2 “Ibetih kam bahwa roa lo mi reraya Paskah, den Anak ni Manusie malé iserahen kin isaliben.”

3 I waktu oya imem-imem kepala urum petue-petue urang Yahudi mukamul i istana Imem Kul si begeral Kayapas,

4 den pakea muruningen kati pakea lepas munengkam urum mununuh Yesus urum cara ilet;

5 tetapé iperin pakea : “Enti pas reraya, kati enti terjadi kekarunen i antara jema delé.”

Yesus iurapi i Betania 26: 6-13

(Mrk. 14:3-9; Yoh. 12:1-8)

6 Ketike Yesus ara i Betania, i umah ni Simon si buduk,

7 gèhle ku Wé sara jema banan munemah sara botol pualam berisi minyak wangi si mal pedéh regeé, nye ituangé minyak a ku atan ulu ni Yesus si tengah kunul mangan.

8 Den ketike murid-murid munèngon hal oya, pakea mujadi bengis nye kené : “Kin hana irumponen ini?

9 Sebeb minyak ni nguk ijuel urum rege si mal den sèné iosanen ku jema miskin.”

10 Yesus mubetihié nye iperin-É ku pakea : “Hana kati kam munyanyanen jema banan ni? Sebeb wé nge mubueten sara pebueten si jeroh kin Aku.

11 Jema-jema miskin dor ara urum kam, tetapé Aku gere dor urum kam;

12 sebeb jema banan ni munuangen minyak ni ku atan ni tubuh-Ku, wé nge mubuetené kin penguburen-Ku.

13 Sesunguhé Kuperinen ku kam, i sihen pé Injil ni ikeberen i seluruh denie, hana si nge ibueten jema banan ni pé malé iceraken kin muninget wé.”

Yudas muhianati Yesus 26: 14-16

(Mrk. 14:10-11; Luk. 22:3-6)

14 Renyel beluhle sara ari kedue belas murid a, si begeral Yudas Iskariot ku imem-imem kepala,

15 nye iperiné : “Sana si malé iosanen kam ku aku, ike aku munyerahen Yesus ku kam?” Den pakea munebir tige puluh sèn pirak ku wé.

16 Den muloi ari waktu oya mi, wé mungenal kesempaten kin munyerahen Yesus ku pakea.

Yesus mangan Paskah urum murid-murid-É 26: 17-25

(Mrk. 14:12-21; Luk. 22:7-14, 21-23; Yoh. 13:21-30)

17 I lo pemulo ni reraya Ruti Gere Muragi, gèhle murid-murid ku Yesus, kené : “I sihen ke ikenaki Guru kami munyedienen mangan Paskah kin Guru?”

18 Iperin Yesus : “Beluhle kam ku kute, ku sara jema nye perinen ku wé, iperin  Guru : Waktung-Ku nge rap; Aku malé mangan Paskah urum murid-murid-Ku i umahmu.”

19 Den murid-murid mubueten lagu si nge ikini Yesus ku pakea, nye munyedienen mangan Paskah.

20 Ketike lo nge kelem, Yesus kunul mangan urum kedue belas murid-É.

21 Waktu pakea tengah mangan, iperin-É : “Sesunguhé Kuperinen ku kam bahwa sara ari kam malé muhienati Aku.”

22 Den pakea olok pedéh sedih, nye muloi mumerin ku Wé sara  sara : “Ke nume aku, Tuhen?”

23 Jeweb Yesus : “Jema si munyelomen pumué ku wan pingen urum Aku, wéle si malé muhienati Aku.”

24 Asa Anak ni Manusie malé beluh lagu si nge tertulis tentang Wé, tetapé celakale jema si entap ni wé Anak ni Manusie iserahen; jerohen kin jema wa sekireé wé gere ilahiren.”

25 Isut Yudas, si malé muhianati Wé, kené : “Ke nume aku, Rabi?” Iperin Yesus ku wé : “Ko nge mumerinené.”

Perjamuen Kelem 26: 26-30

(Mrk. 14:22-26; Luk. 22:15-20; I Kor. 11:23-25)

26 Ketike pakea tengah mangan, Yesus munuet ruti nye mari muberkatié ipecah-pecah-É, den iosan-É ku murid-murid, ken-É : “Ueten renyel, nye panganle; inile tubuh-Ku.”

27 Renyel iuet-É cawan, mari mungucep sukur, iosan-É ku pakea, ken-É : “Minum renyel kam bèwèné ari cawan ni;

28 sebeb inile rayoh-Ku, rayoh pejanyinen si ituangen kin delé jema, kin pengampunen dosa.

29 Kuperinen ku kam, muloi ari besilo ni mi  Aku gere ne minum uah batang ni anggur ini sawah i lo oya, waktu Aku muminumé si ayu urum kam i wan Kerejeen ni Amang-Ku.”

30 Nge mari munyanyinen pujien, pakea beluh ku Bur Zaitun.

Yesus mumerinen bahwa Petrus kasé munyangkal Wé 26: 31-35

(Mrk. 14:27-31; Luk. 22:31-34; Yoh. 13:36-38)

31 Renyel iperin Yesus ku pakea : “Kasé, kelem ni pé kam bèwèné musangka munaringen Aku, sebeb nge tertulis : Aku malé mununuh gembala oya, den kawanan bebirié malé mutempier.

32 Tetapé mari Aku ibangkiten, Aku beluh mulonen ari kam ku Galilea.”

33 Isut Petrus, iperiné ku Yesus : “Bierpé pakea bèwèné munaringen Guru, aku gere pernah munaringen Guru!”

34 Iperin Yesus ku wé : “Sesunguhé Kuperinen ku kam bahwa kelem ni pé sebelem metuk kurik, ko nge munyangkal Aku mutulunen.”

35 Iperin Petrus ku Wé : “Bierpé aku turah benasa urum Guru, aku gere mungkin munyangkal Guru!” Bèwèné murid si lèn pé mumerinen lagu oya.

Yesus berdoà i Getsemani 26: 36-46

(Mrk. 14:32-42; Luk. 22:39-46)

36 Mari oya Yesus beluh urum pakea ku sara ton geralé Getsemani, nye iperin-É ku murid-murid-É : “Kunulle kam i sien, den Aku beluh ku oné malé bedoà.”

37 Den imai-É Petrus urum roa anak-anak ni Zebedeus, den muloile ues até-Wé nye mujadi olok macik.

38 Renyel iperin Yesus ku pakea : “Ateng-Ku olok pedéh ues, lagu malé maté rasaé; taringle kam i sien den bejege-jegele urum Aku.”

39 Den Wé remalan ku arapen pora nye sujut bedoà, ken-É : “O Amang-Ku, ike sekireé mungkin, uetenle cawan ni ari Aku; tapé enti lagu si Kukenaki, melènen lagu si ikenaki Ama.”

40 Renyel Yesus gèh ku murid-murid den idepeti-É ketulu murid a tengah nomé, nye iperin-É ku Petrus : “Gere sangup ke ko bejege-jege sara jem pé urum Aku?

41 Bejege-jegele den bedoàle kati enti kam metuh ku wan cubeen; asa roh penurut tapé usi lemah.”

42 Seger mi, kin kedue kalié Wé beluh nye bedoà, ken-É : “O Amang-Ku, ike cawan ni gere lepas belalu kecuali Aku muminumé, kenak ni Amale si terjadi.”

43 Renyel Yesus gèh mien den idepeti-É pakea tengah nomé, sebeb mata ni pakea nge beret.

44 Den itaringen-É mien pakea nye beluh kin ketige kalié bedoà, mungucepen doà si dis lagu sine.

45 Renyel Yesus gèh ku murid-murid nye iperin-É ku pakea : “Besilo kam nomé renyel den istirahat renyel; èngon, waktué nge rap den Anak ni Manusie iserahen ku pumu ni jema bedosa.

46 Uet renyel, entah mi kite beluh; èngonle, jema si munyerahen Aku nge rap.”

Yesus itengkam 26: 47-56

(Mrk. 14:43-50; Luk. 22:47-53; Yoh. 18:3-12)

47 Waktu Yesus becerak ilen, gèhle Yudas, sara ari kedue belas murid-É urum sara rombongen jema si munemah pedang urum kayu pendere, si ikini imem-imem kepala den petue-petue ni urang Yahudi.

48 Arapé jema si muhianati Yesus nge munosah tene ku pakea, kené : “Kasé sahan si kucum, Wéle jemaé; tengkamle Wé.”

49 Seketike oya pé gèhle Yudas mudekati Yesus, kené : “Salam Rabi,” renyel icumné Yesus.

50 Tapé iperin Yesus ku wé : “Sebet, bueten renyel sana si ikenaki ko.” Renyel pakea maju munamat Yesus nye munengkam Wé.

51 Den èngonle, sara ari pakea si urum Yesus mujurahen pumué den muhunus pedangé, renyel munyerang temuluk ni Imem Kul nye munengkah kemiringé.

52 Renyel iperin Yesus ku wé : “Ayonen mien pedangmu a ku wan sarungé; sebeb bèwèné jema si mugunenen pedang malé benasa urum pedang.

53 Atawa nalammu Aku gere lepas muniro ku Amang-Ku, kati Wé besilo ni pé munyedienen lebih ari due belas pasuken tentara malèkat kin Aku?

54 Ike beta, kune Kiteb Suci lepas igenapi, bahwa turah terjadi lagu ini?”

55 I waktu oya pé iperin Yesus ku jema delé a : “Perusuh ke Aku ni sehinge kam gèh urum pedang den kayu pendere kin munengkam Aku? Jep-jep lo Aku kunul munejer wan Bait ni Allah, den kam gere munengkam Aku.

56 Tetapé bèwèné ni terjadi kati kiteb nabi-nabi igenapi.” Renyel bèwèné murid a munyangkanen diri den munaringen Wé.

Yesus i arap ni Mahkamah Agama 26: 57-68

(Mrk. 14:53-65; Luk. 22:54-55, 63-71; Yoh. 18:13-14, 19-24)

57 Renyel pakea si nge munengkam Yesus a mumai-É ku Imem Kul Kayapas, i oné ahli-ahli Taurat urum urang Parisi nge mukamul.

58 Den Petrus mununungi Yesus ari gip sawah ku wan alam-alamen umah ni Imem Kul, den mayo ku was nye kunul urum pengawal-pengawal kin munèngon kune akhiré.

59 Arapé imem-imem kepala urum seluruh anggota Mahkamah Agama mungenal kesaksien pelsu mulewen Yesus kati pakea lepas mununuh Wé;

60 den pakea gere mudepetié, bierpé delé saksi pelsu gèh. Tetapé akhiré gèhle roa jema,          

61 kené : “Jema ni mumerinen, Aku lepas muruntuhen Bait Suci, nye mudirinené mien wan tulu lo.”

62 Renyel sesukle Imem Kul a nye mumerin ku Yesus : “Gere ke ara jeweb-Mu kin tuduhen jema ni ku Ko?”

63 Tetapé Yesus tetap ongot. Den Imem Kul mumerin ku Wé : “Demi Allah si murip, perinen ku kami ike Ko Kristus, Anak ni Allah.”

64 Iperin Yesus ku wé : “Ko nge mumerinené; tapé Kuperinen ku kam, ari besilo ni mi ko malé munèngon Anak ni Manusie kunul i semelah kuen ni Si Mahakuasa nye gèh i atan ni emun i langit.”

65 Renyel Imem Kul a murèbèken pekayané, nye kené : “Wé muhujet Allah; hana guneé kite perlu saksi ilen? Besilo kam nge mumengé hujet-É;

66 kune pendepet ni kam? Den pakea mujeweb, kené : “Wé turah ihukum maté.”

67 Renyel pakea munilihi salak-É nye munesuh-É; den ara si munampar Wé,

68 nye kené : “Cube tebak nye sederen   ku   kami,  woi   Kristus,

sahan si munesuh Ko?”

Petrus munyangkal Yesus 26: 69-75

(Mrk. 14:66-72; Luk. 22:56-62; Yoh. 18:15-18, 25-27)

69 Arapé Petrus tengah kunul i deret i alam-alamen; den gèhle ku wé sara pelayan beru, nye kené : “Ko pé dor urum Yesus, urang Galilea wa.”

70 Tetapé Petrus munyangkalé i arap ni bèwèné jema, kené : “Gere kubetih sana si iceraken ko a.”

71 Renyel wé tangkuh ku pintu gerbang, sara pelayan beru si lèn munèngon wé, nye mumerin ku jema-jema si ara i oné : “Jema ni pé murum urum Yesus, urang Nazaret a.”

72 Den We munyangkalé mien urum besumpah : “Aku gere ramah urum Jema wa.”

73 Gere lemem mari oya, jema-jema si sesuk i one gèh nye mumerin ku Petrus : “Pasti ko pé sara ari pakea, sebeb ari cara becerakmu a pé nge jelas.”

74 Renyel muloile Petrus mungutuk den besumpah : “Aku gere ramah urum Jema wa.” Seketike oya pé metukle kurik.

75 Den teringetle Petrus kin pecerakan si nge iperinen Yesus ku wé : “Sebelem metuk kurik, ko nge munyangkal Aku mutulunen.” Renyel wé tangkuh den mongot urum uesé.