Matius 27

Yesus iserahen ku Pilatus 27: 1-2

(Mrk. 15:1; Luk. 23:1-2; Yoh. 18:28-32)

Waktu soboh renam imem-imem kepala urum petue-petue ni bengsa wa munuet keputusen mulewen Yesus kati Wé ihukum maté.

2 Pakea munikot Yesus, renyel mumai-É den munyerahen-É ku Pilatus, Gubernur oya.

Yudas maté mugenéngen diri 27: 3-10

(Kis. 1:18-19)

3 Ketike Yudas, si nge muhianati Yesus munèngon bahwa Yesus nge ituhi hukumen maté, munyesalle wé nye munulaken tige puluh sèn pirak ku imem-imem kepala urum petue-petue,

4 nye kené : “Aku nge bedosa entap muhienati rayoh ni Jema si gere besalah.” Tapé iperin pakea : “Hana urusen kami? Oya urusenmu!”

5 Renyel isempakné sèn pirak a ku wan Bait ni Allah, nye wé beluh, beluh mugenéngen dirié.

6 Tetapé imem-imem kepala munuet sèn pirak a nye mumerin : “Gere ienguken munayonen sèn ni ku wan peti pesemahen, sebeb ini sèn rayoh.”

7 Nge mari bepakat, pakea mubeli urum sèn a tanoh ni tukang kuren kin ijadinen ton pekuburen ni jema asing.

8 Oya kati tanoh a begeral Tanoh Rayoh sawah besilo ni.

9 Urum lagu noya genaple sana si iperinen nabi Yeremia : “Pakea munuet tige puluh sèn pirak, rege ni sara jema si itetapen ni urang Israel,

10 den munosanen sèn a kin mubeli tanoh tukang kuren, lagu si iperintahen Tuhen ku aku.”

Yesus i arap ni Pilatus 27: 11-26

(Mrk. 15:2-15; Luk. 23:3-5, 13-25; Yoh. 18:33-19:16)

11 Waktu Yesus sesuk i arap ni Gubernur, ikuneié Yesus, kené : “Ko ke reje ni urang Yahudi? Jeweb Yesus : “Ko nge mumeriné.”

12 Den ketike Wé ituduh imem-imem kepala urum petue-petue, Wé gere mujeweb sanah pé.

13 Renyel iperin Pilatus ku Yesus : “Gere ke ipengé Ko dum deléwé hal si isaksinen pakea mulewen Ko?”

14 Tetapé Wé gere mujeweb sara cerak pé, sehinge Gubernur a olok pedéh heran.

15 Nge mujadi resam jep reraya Paskah Gubernur muluahen sara jema tehenen sesué teniron ni jema delé.

16 Waktu oya ara sara jema tehenen si terkenal kejahatené, geralé Barabas.

17 Jadi, ketike pakea nge mukamul, iperin Pilatus ku pakea : “Sahan ke si ikenaki kam kuluahen kin ni kam? Barabas atawa Yesus si italu Kristus?”

18 Sebeb ibetihi Pilatus bahwa pakea munyerahen Yesus entap ni dengki.

19 Waktu Pilatus kunul i atan ni kersi pengadilen, ikini banané jema ku wé mumerinen : “Enti campuri perkara ni Jema si benar a; sebeb aku olok mederite serloni wan nipi entap ni Wé.”

20 Tetapé imem-imem kepala urum petue-petue mujalu jema delé a kati pakea muniro Barabas den mununuh Yesus.

21 Renyel iperin Gubernur a mien ku pakea : “Sahan ke i antara roa jema ni si ikenaki kam kuluahen kin ni kam?” Jeweb pakea : “Barabas.”

22 Iperin Pilatus ku pakea : “Ike beta, sana ke si turah kubueten urum Yesus si italu Kristus?” Pakea bèwèné metuk : “Wé turah isaliben!”

23 Den iperin Pilatus : “Hana kati? Kejahaten sana ke si nge ibueten-É?” Tapé pakea metuk lebih keras : “Wé turah isaliben!”

24 Waktu ièngon Pilatus bahwa segele usahaé sie-sie, bahkan kekarunen muloi terjadi, iuetné wih nye ibasuhé pumué i arap ni jema delé a, kené : “Aku gere besalah atas rayoh ni Jema ini; oya urusen ni kam!”

25 Den seluruh jema delé a mujeweb : “Rayoh-É itangungen ku kami urum ku anak-anak ni kami!”

26 Renyel wé muluahen Barabas kin pakea, tetapé Yesus icamuk nye iserahen kin isaliben.

Yesus iololi prajurit-prajurit 27: 27-31

(Mrk. 15:16-20; Yoh. 19:2-3)

27 Mari oya prajurit-prajurit ni Gubernur mumai Yesus ku ruang pengadilen, den pakea mungamulen seluruh pasuken i arap ni Yesus.

28 Pakea muluahen pekayan-É, nye munyeluken jubah ungu ku Wé,

29 den munayu sara mahkota ari rui nye munobonené i atan ni ulu-É, den munobonen sara uluh i pumu kuen-É, renyel pakea sujut munyemah i arap-É nye munololi Wé, kené : “Salam, woi reje ni urang Yahudi!”

30 Renyel pakea munilihi Wé den munuet uluh a nye muderenené ku ulu-É.

31 Nge mari munololi-É, iluahen pakea jubah ungu a ne ari Wé nye munyeluken pekayan-É mien; renyel mumai Wé ku deret kin isaliben.

Yesus isaliben 27: 32-44

(Mat. 15:21-32; Luk. 23:26-43; Yoh. 19:17-27)

32 Den i wan pejelenen, pakea mudemu urum sara jema urang Kirene, begeral Simon; jema ni ipaksa pakea munarang salib ni Yesus.

33 Waktu pakea sawah i ton si begeral Golgota, artié : Ton Tengkorak,

34 pakea munosah Yesus minum anggur si icampur urum uak bius mur; tetapé mari icecép-É Wé gere mera muminumé.

35 Nge mari pakea munyaliben Wé, pakea mubagi-baginen pekayan-É urum munundié.

36 Renyel pakea kunul nye mujege Wé i oné.

37 Den i atas ni ulu-É ipasang tulisen tuduhen kin Wé : “Inile Yesus, Reje ni urang Yahudi.”

38 Murum urum Yesus, pakea pé munyaliben roa jema perusuh, sara i semelah kuen-É nye sara i semelah kiri-É.

39 Den jema-jema si lepas tar ton oya muhine Wé sesire mugining-giningen ulué,

40 kené : “Woi Ko si malé muruntuhen Bait Suci nye malé munosé mien wan tulu lo, selamatenle diri-Mu kendiri! Ike Ko Anak ni Allah, turun renyel ari salib oya!”

41 Betapé imem-imem kepala, ahli-ahli Taurat urum petue-petue munololi-É, kené :

42 “Jema lèn iselamaten-É, tapé diri-É kendiri gere lepas iselamaten-É; Wé Reje ni Israel, besilo daténen Wé turun ari salib  oya, baro kami percaya ku Wé.

43 Wé percaya ku Allah, besilo daténen Allah munyelamaten-É, ike galak até ni Allah kin Wé; sebeb iperin-É : Aku Anak ni Allah.”

44 Den perusuh si isaliben urum Wé pé menghine Wé dis lagu oya.

Kematénen ni Yesus 27: 45-56

(Mrk. 15:33-41; Luk. 23:44-49; Yoh. 19:28-30)

45 Muloi ari jem due belas ruhul, terjadile kegelepen i seluruh daerah oya sawah ku jem tige.

46 Den tar jem tige Yesus metuk urum ling keras, ken-É : “Eli, Eli, lama sabakhtani?” Artié : Allah-Ku, Allah-Ku, hana kati itaringen Ko Aku?

47 Pepien jema si sesuk i oné mumengéé, nye mumerin : “Jema ni munalu Elia.”

48 Den sara ari pakea tir-tir musangka den munuet sara spon nye munyelomené urum anggur si masam, renyel munobonené ku sara batang ni uluh nye munosanené ku Yesus kin iminum.

49 Tetapé jema lèn mumerin : “Enti, kite èngon mulo, gèh ke Elia munyelamaten Wé.“

50 Renyel Yesus metuk mien urum ling keras den munyerahen nyawa-É.

51 Den èngonle, tire ni Bait Suci murèbèk mubelah due ari atas sawah ku tuyuh, den bur-bur atu mubelah,

52 kuburen-kuburen pé muke den delé  jema kudus si nge benasa bangkit;

53 den pakea tangkuh ari kuburé, nge mari Yesus bangkit ari kematénen, pakea mayo ku kute kudus nye munuruhen diri ku delé jema.

54 Kepala pasukan urum jema-jema si tengah mujege Yesus mujadi terih pedéh waktu munèngon gempa bumi urum sana si terjadi a, kené : “Sunguh, Wé ni Anak ni Allah.”

55 I oné pé ara delé jema banan si munèngon ari gip, si nge mununung Yesus muloi ari Galilea  kin mulayani Wé;

56 i antara ni pakea ara Maria Magdalena, Maria ine ni Yakobus urum Yusup, den ine ni anak-anak ni Zebedeus.

Yesus ikuburen 27: 57-61

(Mrk. 15:42-47; Luk. 23:50-56; Yoh. 19:38-42)

57 Ketike lo nge kelem, gèhle sara jema kaya ari Arimatea, geralé Yusup, wé pé nge mujadi murid ni Yesus.

58 Wé beluh muhedep Pilatus nye muniro mèt ni Yesus. Renyel Pilatus mumerintahen kin munosanené ku wé.

59 Den Yusup pé munuetné nye munyaputié urum upuh linen si bersih,

60 renyel mubaringené i wan kuburné si ayu, si nge ikurukné i wan bur atu, mari oya wé munèsoten sara atu si kul ku pintu ni kubur a.

61 Maria Magdalena urum Maria si lèn ara i oné, kunul i arap ni kubur a.

Kubur ni Yesus ijege 27: 62-66

62 Lang loé, mari lo persiepen, imem-imem kepala urum urang Parisi mukamul i arap ni Pilatus,

63 nye mumerin : “Reje, kami inget bahwa si penilet a waktu Wé murip ilen mumerin : Nge mari tulu lo Aku malé bangkit.

64 Entap ni oya perintahenle kin mujege kubur a sawah lo ketige, kati enti murid-murid-É gèh nye munusuh Wé nye mumerinen ku jema-jema : Wé nge ibangkiten ari kematénen, sehinge penyesaten si pemarin lebih kotek ari si pemulo.”

65 Iperin Pilatus ku pakea : “Ini penjege-penjege kin kam; beluh renyel den jegele kubur a lagu si ibetihi kam.”

66 Den beluhle pakea ku kubur a, mumatrénen atu penutup kubur a den mungini penjege kin mujegeé.