Matius 28

Kebangkiten ni Yesus 28: 1-10

(Mrk. 16:1-10; Luk. 24:1-12; Yoh. 20:1-10)

Ketike nge liwet lo Sabat, soboh renam i lo pemulo mingu oya, Maria Magdalena urum Maria si lèn beluh kin munèngon kubur a.

2 Den èngonle, terjadi gempa bumi si olok; sebeb sara malèkat ni Tuhen turun ari serge nye gèh ku atu a den munèsotené, renyel kunul iatasé.

3 Salaké lagu kilet den pekayané putih lagu salju.

4 Penjege-penjege a mugegir entap ni keterihen kin wé, den mujadi lagu jema maté.

5 Renyel malèkat a mumerin ku jema-jema banan a : “Enti terih, sebeb kubetih bahwa kam mengenal Yesus si nge isaliben oya;

6 Wé gere ara i sien, sebeb Wé nge bangkit lagu si nge iperin-É; gèh nye, èngonle ton Wé ibaringen.

7 Tir renyel kam beluh, sederen ku murid-murid-É bahwa Wé nge bangkit ari kematénen; den èngonle, Wé mulonen beluh ari kam ku Galilea, i oné kasé kam munèngon Wé. Sesunguhé aku nge mumerinené ku kam.”

8 Renyel tir-tir pakea beluh munaringen kubur a urum perasaen terih nye olok sukacite, pakea musangka kin munyederen hal oya ku murid-murid ni Yesus.

9 Den èngonle, Yesus mudemu urum pakea nye mumerin : “Salam!” Den pakea mudekati Wé, den munamat kiding-É nye munyemah Wé.

10 Renyel iperin Yesus ku pakea : “Enti terih, beluh renyel den  sederen ku sudere-sudereng-Ku, kati pakea beluh ku Galilea, den i oné kasé pakea munèngon Aku.”

Cogah ni Mahkamah Agama 28: 11-15

11 Waktu pakea beluh, èngonle, pepien ari penjege-penjege a beluh ku kute munyederen ku imem-imem kepala segele sesanah si nge terjadi.

12 Den ketike imem-imem kepala mukamul urum petue-petue nye beruning, pakea munosah delé sèn   ku prajurit-prajurit oya,

13 kené : “Kam turah mumerinen bahwa murid-murid-É gèh tar lo kelem nye munusuh mèt-É, waktu kami tengah nomé.

14 Den ike hal ini tenengé ku Gubernur, kasé kami becerak urum wé, sehinge kam gere mudepet kesuliten sanah pé.”

15 Renyel pakea munuet sèn a nye mubueten sana si iperintahen ku pakea. Oya kati cerite ini musier i antara urang Yahudi sawah besilo ni.

Perintah kin mungeberen Injil 28: 16-20

(Mrk. 16:14-18; Luk. 24:36-49; Yoh. 20:19-23; Kis. 1:6-8)

16 Renyel kesebelas murid a pé beluh ku Galilea, ku bur si nge itentunen Yesus ku pakea.

17 Ketike munèngon Yesus, pakea munyemah Wé, tapé ara pepien ni jema si ragu-ragu.

18 Yesus mudekati nye becerak ku pakea, ken-É : “Segele kuasa i serge urum i bumi nge iosanen ku Aku.

19 Entap ni oya beluh renyel kam, jadinenle bèwèné bengsa murid-Ku, baptisenle pakea wan geral ni Ama den Anak den Roh Kudus,

20 ejerle pakea munurut segele sesanah si nge Kuperintahen ku kam; den èngonle, Aku senantiasa urum kam sawah ku akhir jemen.”