Matius 3

Yohanes Pembaptis  3:1-12

(Mrk. 1:1-8; Luk. 3:1-18; Yoh. 1:19-28)

 I waktu oya gèhle Yohanes Pembaptis munejer i padang gurun Yudea,

2 kené :

“Betobatle kam, sebeb Kerejeen Serge nge rap.”

3 Sebeb inile wé si iperinen nabi Yesaya ketike iperiné :

“Ara ling ni jema

si metuk i padang gurun :

Siepen jelen kin

Tuhen,

tosen lurus jelen-jelen-É!”

4 Yohanes munyeluk jubah ari jangut ni unte, genit ari kulit mikot i awaké, den pemanganané lompong urum madu uten.

5 Renyel tangkuhle jema ari Yerusalem, ari seluruh Yudea den ari seluruh daerah sekiter Yordan mudemui wé,

6 den sesire mungaku dosaé pakea ibaptis Yohanes i wan wih Yordan.

7 Tetapé waktu ièngon Yohanes delé urang Parisi urum urang Saduki gèh kin ibaptis, iperiné ku pakea : “Woi kam keturunen ni lipé, sahan si mumerinen ku kam bahwa kam lepas munyangkanen diri ari murke si malé gèh puren?

8 Entap ni oya, hasilenle uah si sesué urum petobaten.

9 Den enti kire i wan até ni kam, nye mumerin : Abraham oya ama ni kami; sebeb kuperinen ku kam, bahwa Allah sangup mujadinen keturunen kin Abraham ari atu-atu ni.

10 Galang nge sedie i uyet ni batang kayu; entap ni oya jep batang kayu si gere muhasilen uah si jeroh kasé itebang nye itekaren ku wan rara.

11 Aku mubaptis kam urum wih sebagé tene petobaten, tetapé Wé si gèh nge mari aku lebih bekuasa ari aku, munemeng sepatu-É pé aku gere patut. Wé malé mubaptis kam urum Roh Kudus den urum rara.  

12 Niu-É nge i pumu-É, den Wé malé mubersihen ton penanginen-É nye mungamulen gandum-É ku wan keben, tapé sekam a malé itèlong-É wan rara si gere terempoten.”

Yesus ibaptis Yohanes  3: 13-17

(Mrk. 1:9-11; Luk. 3:21-22; Yoh. 1:32-34)

13 I waktu oya Yesus gèh ari Galilea ku wih Yordan kati Wé ibaptis Yohanes.

14 Tetapé Yohanes mungoai Wé, kené : “Akule si perlu i baptis Tuhen, masaken Tuhen si gèh ku aku?”

15 Tetapé ijeweb Yesus ku wé, ken-É : “Daténen lagu noya, sebeb betale sepatuté kite mugenapi bèwèné si ikenaki Allah.” Renyel Yohanes mubaptis Wé.

16 Mari ibaptis, Yesus langsung tangkuh ari wih; èngon, langit muke nye wé munèngon Roh Allah lagu manuk birahpati turun ku atas-É;

17 den tenengéle ling ari serge si mumerinen : “Inile Anak-Ku si Kukasihi ku Wéle Aku bekenak.”