Matius 4

Penyubeen i padang gurun  4: 1-11

(Mrk. 1:12-13; Luk. 4:1-13)

Renyel Yesus imai Roh Kudus ku padang gurun kin icubei Belis.

2 Mari bepasa empat puluh lo empat puluh ingi, mulapéle Yesus.

3 Den gèhle si penyube oya nye mumerin ku Wé : “Ike Ko Anak ni Allah, perinen renyel kati atu-atu ni mujadi ruti.”

4 Tetapé ijeweb Yesus, ken-É : “Ara tertulis : Manusie murip nume ari ruti pelin we, tapé ari setiep firman si tangkuh ari awah ni Allah.”

5 Renyel Belis mumai Yesus ku kute suci Yerusalem, den ikinié Wé sesuk i atas bubung Bait ni Allah,

6 nye iperiné ku Wé : “Ike Ko Anak ni Allah, tuhen renyel diri-Mu ku tuyuh, sebeb ara tertulis : Tentang Ko, Wé malé mumerintahen malèkat-malèkat-É den pakea malé munengkam Ko i atan ni pumué, kati kiding-Mu enti muantuk ku atu.”

7 Iperin Yesus ku wé : “Ara mien tertulis : Enti kam munyubei Tuhen Allahmu!”

8 Imai Belis mien Yesus ku atan ni bur si olok atas nye ituruhené ku Wé bèwèné kerejeen ni denie urum kemuliené,

9 nye iperin-é ku Wé : “Bèwèné ni malé kuosanen ku Ko, ike Ko sujut munyemah aku.”

10 Renyel iperin Yesus ku wé : “Beluh ko Belis! Sebeb ara tertulis : Ko turah munyemah Tuhen Allahmu, den ku Wé pelin we ko beribadah.”

11 Nge mari oya Belis munaringen Yesus, den èngonle, malèkat-malèkat gèh mulayani Wé.

Yesus muloi munejer  4: 12-17

(Mrk. 1:14-15; Luk. 4:14-15)

12 Waktu ipengé Yesus bahwa Yohanes nge ipenjerenen, beluhle Wé ku Galilea.

13 Itaringen-É Nazaret nye beluh ku Kapernaum den taring i oné, i geniring ni danau, i daerah Zebulon urum Naptali,

14 kati genaple sana si iperinen nabi Yesaya : 

15 “Tanoh Zebulon urum tanoh Naptali, jelen ku danau, i serap

ni sungai Yordan ho,

daerah Galilea, wilayah ni bengsa-bengsa

si lèn,-

16 bengsa si taring i wan

kegelepen, nge munèngon Terang

si kul den bagi pakea

si taring i negeri

si ikuasai maut, nge mencér

Terang atas ni pakea.”

17 Ari waktu oya mi Yesus muloi mungeberen : “Betobatle kam, sebeb Kerejeen Serge nge rap!”

Yesus munalu murid-murid si pemulo  4: 18-22

(Mrk. 1:16-20; Luk. 5:1-11)

18 Ketike Yesus tengah remalan i geniring ni danau Galilea, Wé munèngon roa jema beserinen, Simon si igerali Petrus urum Andreas serinené, tengah munyempaken jele i danau; sebeb pakea penjele gulè.

19 Iperin Yesus ku pakea : “Entah mi renyel, tunungle Aku, den Aku malé mujadinen kam penjele manusie.”

20 Pakea pé langsung munaringen jeleé nye mununungi Wé.

21 Mari Yesus beluh ari oné, ièngon-É roa beserinen si lèn, Yakobus anak ni Zebedeus urum Yohanes serinené, i wan perau murum ama ni pakea, tengah munetahi jele; italu Yesus pakea.

22 Den pakea langsung munaringen perau urum amaé, nye mununungi Wé.

Yesus munejer urum mujegeren jema  sakiten  4: 23-25

(Luk. 6:17-19)

23 Renyel Yesus beluh muringkeli seluruh daerah Galilea, Wé munejer wan umah-umah ibedet ni pakea, mungeberen Injil Kerejeen ni Allah, den mujegeren segele penyakit urum kelemahen i antara ni bengsa wa.

24 Den musierle keber tentang Wé sawah ku seluruh daerah Siria; den imai pakeale ku Wé bèwèné jema si sakiten, si muderite bagé-bagé penyakit urum sengsara, si kerasuken setan, si sakit pungur ni babin, den si lumpuh; den Yesus mujegeren pakea.

25 Oya kati delé pedéh jema mununungi Wé; ara ari Galilea, ari Dekapolis, ari Yerusalem, ari Yudea den ari serap ni sungai Yordan no.