Matius 5

PENEJEREN I BUR  5 - 7

Ucepen bahgie 5: 1-12

(Luk. 6:20-23)

Ketike ièngon Yesus jema delé a, Wé nik ku atan ni bur; den waktu Wé kunul, gèhle murid-murid-É ku Wé.

2 Den Yesus muloi becerak den munejer pakea, ken-É :

3 “Mubahgie mi jema

si miskin i arap ni Allah,

sebeb pakeale

si munempui Kerejeen Serge.

4 Mubahgie mi jema

si berues até,

sebeb pakea malé ihibur.

5 Mubahgie mi jema

si lemah lemut,

sebeb pakea malé muwarisi

bumi.

6 Mubahgie mi jema si mulapé 

urum gerahen kin kebenaran,

sebeb pakea malé ipuesen.

7 Mubahgie mi jema 

si pemurah,

sebeb pakea malé mudemu

 kemurahen.

8 Mubahgie mi jema si suci

atéwé,

sebeb pakea malé munèngon

Allah.

9 Mubahgie mi jema

si munemah damé,

sebeb pakea malé iperin

anak-anak ni Allah.

10  Mubahgie mi jema

si ianiaya entap ni kebenaran,

sebeb pakeale

si munempui Kerejeen Serge.

11 Mubahgie mile kam, ike

entap ni Aku kam ihine den

ianiaya nye ifitnahen

segele si jahat ku kam.

12 Besukacite urum begegalakele, kerna upahmu kul i serge,

sebeb betapé pakea nge      

munganiaya nabi-nabi sebelem kam.”

Poa urum terang 5: 13-16

(Mrk. 9:50; Luk. 14:34-35)

13 “Kamle poa ni denie, tetapé ike poa wa gere ne masin, urum sana ke wé malé imasinen? Gere ara ne guneé, kecuali itekaren nye iperjak-perjak jema we.

14 Kamle terang ni denie. Sara kute si ara i atan ni bur gere lepas ituninen.

15 Betapé jema gere munyalanen lampu nye munobonené i tuyuh ni gantang, melènen ibobonen i ton si atas kati munerangi bèwèné jema si ara i was ni umah a.

16 Betale kenaké terangmu mucaya i arap ni jema, sehinge pakea lepas munèngon pebuetenmu si jeroh renyel mumulienen Amamu si i serge.”

Penejeren tentang hukum Taurat  5: 17-20

17 “Enti kire bahwa Aku gèh kin munosopen hukum Taurat atawa kiteb nabi-nabi; Aku gèh nume kin munosopené melènen kin mugenapié.

18 Sebeb sesunguhé Kuperinen ku kam : Sawah langit urum bumi bené, sara iota atawa sara titik pé ari hukum Taurat a gere ara si malé bené, sawah bèwèné terjadi.

19 Entap ni oya, barik sahan si munosopen sara perintah hukum Taurat si paling kucak nye munejerené dis lagu oya ku jema lèn, wé malé iperin si paling kucak i wan Kerejeen Serge; tetapé barik sahan si mubueten nye munejerené, wé malé iperin si kul i wan Kerejeen Serge.

20 Oya kati  Kuperinen ku kam : Kecuali kebenaranmu mulebihi ari kebenaran ni ahli-ahli Taurat urum urang Parisi, kam gere mungkin mayo ku wan Kerejeen Serge.”

Tentang bengis 5: 21-26

21 “Nge ipengé kam sana si iperinen ku muyang datunte : Enti mununuh, den barik sahan si mununuh turah ihukum.

22 Tetapé Kuperinen ku kam : Jep jema si bengis ku serinené turah ihukum; den barik sahan si mumerin ku serinené : Kapir! Wé turah muhedep Mahkamah Agama; den barik sahan si mumerin : Ogoh! Wé patut iserahen ku wan api neraka.

23 Kerna oya ike ko munemah pesemahenmu ku ton pesemahen den i oné ko teringet kin sakit naté ni serinenmu ku ko,

24 taringenle pesemahenmu i arap ni ton pesemahen a, nye beluh mi bedamé mulo urum serinenmu, renyel ulak mien kin mupesemahen-pesemahenmu a.

25 Tir mi le ko bedamé urum lewenmu sewaktu ko urum wé i dené ilen, kati enti lewenmu a munyerahen ko ku hakim, den hakim munyerahen ko ku pegawéé, renyel ko iayonen ku wan penjere.

26 Sesunguhé Kuperinen ku ko : Ko gere mungkin tangkuh ari oné, sebelem ko munebir hutangmu sawah lunes.”

Tentang jine 5: 27-30

27 “Nge ipengé kam bahwa ara iperinen : Enti bejine.

28 Tetapé Kuperinen ku kam : Jep jema si mumanang jema banan urum benesu, wé nge bejine urum jema banan a ne i wan ni atéwé.

29 Jadi ike matamu si kuen munos ko bedosa, congkelenle oya nye tekarenle! Sebeb jerohen kin ko ike sara ari anggota ni tubuhmu bené bidak seluruh tubuhmu itekaren ku wan neraka.

30 Den ike pumumu si kuen munos ko bedosa, keratenle oya nye tekarenle! Sebeb jerohen kin ko ike sara ari anggota ni tubuhmu bené bidak seluruh tubuhmu itekaren ku wan neraka.”

Tentang pecerénen 5: 31-32

(Mat. 19:9; Mrk. 10:11-12; Luk. 16:18)

31 “Ara mien iperinen : Sahan si munyerénen banané turah munosanen suret ceré ku wé.

32 Tetapé Kuperinen ku kam : Jep jema si munyerénen banané kecuali entap ni jine, wé mujadinen banané a bejine; den sahan si kerje urum jema banan si icerénen, wé pé bebuet jine.”

Tentang besumpah  5: 33-37

33 “Kam pé nge mumengé sana si iperinen ku muyang datunte : Enti ko besumpah pelsu, melènen tepatile sana si nge isumpahen ko i arap ni Tuhen.

34 Tetapé Kuperinen ku kam : Enti besumpah tentang sanah pé, enti besumpah demi langit, kerna langit oyale kenunulen ni Allah;

35 enti besumpah demi bumi, kerna bumi oyale alas ni kiding-É, betapé enti besumpah demi Yerusalem, kerna Yerusalem oyale kute ni Reje si Kul.

36 Atawa, enti besumpah demi ulumu, kerna ko gere sangup munubah serilah wuk pé mujadi putih atawa item.

37 Perinenle : O ike o, gere ike gere. Sana si lebih ari oya berasal ari si jahat.”

Tentang mubeles 5: 38-42

(Luk. 6:29-30)

38 “Nge ipengé kam bahwa nge iperinen : Mata ganti mata den ipon ganti ipon.

39 Tetapé Kuperinen ku kam : Enti mulewen jema si bebuet jahat ku kam, melènen sahan si munampar pipimu si kuen, osanen ku wé pipimu si kiri pé.

40 Den ike jema mungadunen ko entap ni wé mungenaki bajumu, osanenle jubahmu pé kin wé.

41 Den ike ara jema mumaksa ko remalan sara kilometer, beluhle urum wé roa kilometer.

42 Osanenle ku jema si muniro ku ko, den enti munulak jema si malé muminyem ari ko.”

Mungasihi lewen 5: 43-48

(Luk. 6:27-28; 32-36)

43 “Nge ipengé kam si nge iperinen : Kasihile pongmu den begeli atéle kin lewenmu.

44 Tetapé Kuperinen ku kam : Kasihile lewen-lewenmu den bedoàle kin pakea si munganiaya kam;

45 kati kam mujadi anak-anak ni Amamu si i serge. Sebeb Wé mumancaren matanlo kin jema si jahat urum jema si jeroh den munurunen uren kin jema si benar urum jema si gere benar.

46 Ike kam mungasihi jema si mungasihi kam pelin we, sana ke upahmu? Gere ke penagih pajak pé bebuet dis lagu noya?

47 Den ike kam munosah salam kin sudere-suderemu pelin we, sana ke lebihé buet ni kam ari jema lèn? Gere ke jema si gere mubetihi Allah pé mubueten dis lagu oya?

48 Entap ni oya kam turah semperne, dis lagu Amamu si i serge pé semperne.”