Matius 6

Tentang munosah sedekah 6: 1-4

 “Perhatinenle, enti kam mubueten ibedetmu i arap ni jema delé kati ièngon pakea; sebeb ike lagu oya, kam gere mudemu upah ari Amamu si i serge.

2 Entap ni oya waktu kam munosah sedekah, enti muguel canang i arapmu, lagu si ibueten jema munapèk i umah-umah ibedet urum i jelen-jelen kati pakea ipuji jema. Sesunguhé Kuperinen ku kam : Pakea nge munerime upahé.

3 Tetapé waktu kam munosah sedekah, enti ibetihi pumu kirimu sana si ibueten pumu kuenmu,

4 sehinge sedekahmu a iosahen urum mutuni, den Amamu si munèngon si mutuni malé mubalasé ku kam.”

Tentang berdoa 6: 5-15

(Luk. 11:2-4)

5 “Den waktu kam bedoa, enti kam lagu jema munapèk; sebeb pakea galak atéwé sesuk bedoa i wan umah-umah ibedet urum i simpang-simpang ni dené kati pakea ièngon jema. Sesunguhé Kuperinen ku kam, pakea nge mudepet upahé.

6 Tetapé waktu kam bedoà, mayole ku wan kamarmu, tutuple pintu nye bedoàle ku Amamu si gere teridah; den Amamu si munèngon si mutuni malé mubelesé ku kam.

7 Den waktu kam bedoà enti munulang-ulangi cerak lagu jema si gere mubetihi Allah, kerna nalam ni pakea, ike delé cerak doàé, pakea malé ipengénen.

8 Tetapé kam enti lagu pakea; sebeb Amamu mubetihi sana si iperlunen kam, sebelem itiro kam ku Wé.

9 Entap ni oya, bedoàle kam lagu ini :

Ama ni kami si i serge,

ikudusenle geral-Mu,

10 gèhle Kerejeen-Mu,

kenak-Mule si terjadi

i denie ni lagu i serge.

11 Osanenle ku kami serloni pemanganan si kami perlunen.

12 Den ampunile kesalahen

ni kami lagu kami,

nge munampuni jema

si besalah ku kami.

13 Den enti mai kami

ku wan penyubeen,

tetapé luahenle kami ari

 si jahat.

 [Sebeb Amale si munempu Kerejeen den kuasa den kemulieen sawah selemem-lememé. Amin.]

14 Sebeb ike kam munampuni kesalahen ni jema, Amamu si i serge pé malé munampuni kesalahenmu.

15 Tetapé ike kam gere munampuni kesalahen ni jema, Amamu pé gere malé munampuni kesalahenmu.”

Tentang bepasa 6: 16-18

16 “Den waktu kam bepasa, enti muram salakmu lagu jema munapèk. Pakea munubah salaké, kati ièngon jema bahwa pakea bepasa. Sesunguhé Kuperinen ku kam, pakea nge mudepet upahé.

17 Tetapé waktu kam bepasa, minyakile ulumu den basuhle salakmu,

18 kati enti ibetih jema kam bepasa, tapé Amamu pelin si ara i ton si mutuni; den Amamu si munèngon si mutuni malé mubelesé ku kam.”

Tentang mugamulen reta 6: 19-21

(Luk. 12:33-34)

19 “Enti mungamulen reta kin kam i denie ni, i denie ngengat urum karat murusaké, den perusuh mubungker nye munusuhé;

20 tetapé kamulenle retamu i serge, i serge ngenget urum karat gere murusaké, den perusuh gere mubungker nye munusuhé.

21 Sebeb i sihen retamu ara, i oné pé atému ara.”

Tentang beden 6: 22-23

(Luk. 11:34-36)

22 “Mata oyale suluh ni beden; entap ni oya, ike matamu terang, terangle bèwèné tubuhmu.

23 Tetapé ike matamu gelep, geleple bèwèné tubuhmu. Jadi ike terang si ara i was ni kam gelep, dum gelepé kegelepen oya.

Tentang pekekit ni até 6: 24-34

(Luk. 16:13; 12:22-31)

24 “Gere ara sara jema pé nguk mungabdi ku roa reje; sebeb wé malé begeli até ku si sara nye mungasihi si lèn, atawa wé malé setie ku si sara nye gere muniron si lèn. Kam gere nguk mungabdi ku Allah urum ku Mamon.

25 Oya kati Kuperinen ku kam : Enti pekekit tentang muripmu, sana si malé ipangan atawa iminum kam, den enti pekekit tentang tubuhmu, sana si malé iseluk kam. Gere ke murip oya lebih penting ari pemanganan den tubuh oya lebih penting ari pekayan?

26 Èngonle manuk-manuk i langit, pakea gere munyuk urum gere munuling, den pakea pé gere mungamulen persedieen wan keben, tapé Amamu si i serge munosah pakea mangan. Gere ke kam lebih murege ari manuk-manuk oya?

27 Sahan ke i antara ni kam si kerna pekekit ni atéwé nguk munamah seneta kin umuré?

28 Den hana kati kam pekekit kin pekayan? Perhatinenle bunge bakung i belang, kune muripé; bunge bakung gere bebuet urum gere mumintal,

29 tetapé Kuperinen ku kam : Salomo wan segele kemuliené pé gere bepekayan sebelangi sara ari bunge-bunge oya.

30 Jadi ike kerpé i belang si serloni ara nye lang itekaren ku wan rara ihiesi Allah lagu oya, gere ke kam lebih mien, woi jema si kurang percaya?

31 Entap ni oya enti pekekit até ni kam nye mumerin : Sana ke si malé kami pangan? Atawa, sana ke si malé kami minum? Atawa, sana ke si malé kami seluk?

32 Sebeb bèwèné hal oya ikenal bengsa-bengsa si gere mubetihi Allah; kerna Amamu si i serge mubetihi bahwa kam mumerlunen bèwèné oya.

33 Tetapé kam kenalle mulo Kerejeen ni Allah urum kebenaran-É, den bèwèné ni malé itamahen ku kam.

34 Oya kati enti pekekit até ni kam kin lang, sebeb lang ara kenyanyanen ken dirié mien; kenyanyanen serloni genaple kin serloni.”