Matius 7

Tentang muhakimi 7: 1-6

(Luk. 6:37-38; 41-42)

“Enti muhakimi, kati kam pé gere ihakimi;

2 sebeb urum penghakimen si ipaké kam kin muhakimi jema, kam pé malé ihakimi, den ukuren si ipaké kam kin munukur, malé iukuren ku kam.

3 Hana kati ko munèngon ampas ni kayu i mata ni serinenmu tetapé beruti i wan matamu gere ibetihi ko?

4 Atawa kune ko lepas mumerinen ku serinenmu : Ijinen aku munangkuhen ampas ni kayu a ari matamu pedahal ara beruti i wan matamu?

5 O jema munapèk, tangkuhen mulo beruti a ari wan matamu, renyel barole ko lepas munèngon urum terang kin munangkuhen ampas kayu si ara i wan mata ni serinenmu.

6 Enti osanen bene si suci ku asu, betapé enti tekaren mutiaramu i arap ni babi, kati enti iperjak-perjaké urum kidingé, renyel mubalik murèbék kam.”

Tiro, kenal, tetok 7: 7-12

(Lukas 11:9-13)

7 “Tirole, den oya malé iosanen ku kam; kenalle, den kam malé mudemunené; tetokle, den pintu malé iukenen kin kam.

8 Sebeb jep jema si muniro, munerime; jep jema si mungenal, mudemu; den jep jema si munetok, pintu iukenen kin wé.

9 Arake i antara ni kam si munosah atu ku anaké, ike wé muniro ruti,

10 atawa munosah lipé, ike wé muniro gulé?

11 Jadi ike kam si jahat mubetihi munosanen penosahen si jeroh ku kekanakmu, lebih-lebih miené Amamu si i serge, Wé malé munosanen si jeroh ku pakea si muniro ku Wé.

12 Oya kati segele hal si ikenaki kam kati ipebuet jema ku kam, buetenle lagu oya ku pakea. Inile isi ni hukum Taurat urum kiteb nabi-nabi.”

Pintu si impit 7:13-14

(Luk. 13:24)

13 “Mayole kam tar pintu si impit a; entap kolakle pintu urum luesle jelen si munuju ku kematénen, den delé jema si mayo mulaluié;

14 tetapé impitle pintu den impitle jelen si munuju ku kehidupen, den tikik we jema si mudemunené.”

Tentang penejeren si sesat 7: 15-23

(Luk. 6:43-44, 13:25-27)

15 “Inget-ingetle ku nabi-nabi pelsu si gèh ku kam munyeluk jangut bebiri, tapé sesunguhé pakea serigala si bues.

16 Ari uahéle ibetihi kam pakea. Ara ke ipelték jema uah ni anggur ari tamas murui, atawa uah ara ari kerpé murui?

17 Betapé, jep batang kayu si jeroh muhasilen uah si jeroh, tapé batang kayu si gere jeroh muhasilen uah si buruk.

18 Batang kayu si jeroh gere lepas muhasilen uah si buruk, betapé batang kayu si gere jeroh gere lepas muhasilen uah si jeroh.

19 Jep batang kayu si gere muhasilen uah si jeroh, itebang nye itekaren ku wan rara.

20 Jadi ari uahéle malé ibetihi kam pakea.

21 Nume jep jema si munyeru ku Aku : Tuhen, Tuhen, kasé mayo ku wan Kerejeen Serge, melènen wé si mubueten kenak ni Amang-Ku si i serge.

22 I lo pemarin delé jema malé mumerin ku Aku : Tuhen, Tuhen, gere ke kami nge benubuat wan geral ni Tuhen, nge munusir setan-setan wan geral ni Tuhen, den nge munos delé mukjizet wan geral ni Tuhen?

23 I waktu oyale Aku malé beterus terang ku pakea : Aku gere pernah ramah urum kam; beluh renyel ari Aku, kam si mubueten kejahaten.”

Roa macam dasar 7: 24-27

(Luk. 6:47-49)

24 “Entap ni oya jep jema si mumengé pecerakan-Ku ini nye mubuetené, wé iumpamanen lagu sara jema si bijaksana si munos umahé i atan ni atu karang.

25 Renyel turunle uren den gèhle banjir nye kuyu munimpe umah a, tapé umah a gere murebah, sebeb itos i atan ni atu karang.

26 Den jep jema si mumengé peceraken-Ku ini nye gere mubuetené, wé iumpanen lagu sara jema si ogoh, si munos umahé i atan ni oné.

27 Renyel turunle uren den gèhle banjir nye kuyu munimpe umah a, sehinge murebahle umah a, den olok pedéh kerusakené.

Kesan ni jema si mumengé 7: 28-29

28 Den mari Yesus munyelesènen pecerakan ini, takjuble jema delé kin penejeren-É a;

29 sebeb Yesus munejer pakea sebagé jema si bekuasa, gere lagu ahli-ahli Taurat ni pakea.