Matius 8

Yesus mujegeren  jema mubuduk 8: 1-4

(Mrk. 1:40-45; Luk. 5:12-16

Mari Yesus turun ari bur, delé jema mununungi Wé.

2 Renyel gèhle sara jema  mubuduk ku Yesus, den sujut munyemah nye kené : “Tuhen, ike Tuhen mera, Tuhen nguk mujegeren aku.”

3 Den Yesus mujurahen pumu-É munamat jema wa, nye ken-É : “Aku mera, jeger mile ko.” Den seketike oya pé jegerle jema wa ari buduké.

4 Renyel iperin Yesus ku wé : “Ingetle, enti sederen ku sahan pé, tapé beluh renyel, turuhen diri-mu ku imem den osanen pesemahen si iperintahen Musa sebagé bukti ku pakea ko nge jeger.”

Yesus mujegeren temuluk ni perwira i Kapernaum 8: 5-13

(Luk. 7:1-10)

5 Ketike Yesus mayo ku Kapernaum, gèhle sara perwira ku Yesus den muniro urum sunguh,

6 kené : “Tuhen, temulukku begulang i umah entap maté tubuh den wé olok muderite.”

7 Iperin Yesus ku wé : “Aku malé gèh mujegeren wé.”

8 Tetapé ijeweb perwira wa : “Tuhen, aku gere layak munerime Tuhen i wan umahku, tapé perinen padéh sara cerak, temulukku a pasti jeger.”

9 Sebeb aku pé jema bawahen den i tuyuhku ara prajurit. Ike kuperinen ku sara prajurit a : Beluh renyel, den wé pé beluh; den ike kuperinen ku prajurit si lèn : Gèh renyel, den wé pé gèh; den ike kuperinen ku temulukku : Bueten ini, den wé pé mubuetené.”

10 Ketike Yesus mumengéé hèranle Wé nye iperin-É ku pakea si mununungi-É : “Sesunguhé Kuperinen ku kam, gere ilen pernah Kudemui imen si lagu ini iantara umet i Israel.

11 Den Kuperinen ku kam bahwa delé jema malé gèh ari timur den barat nye malé kunul mangan urum Abraham, Isak den Yakup i wan Kerejeen Serge;

12 tetapé anak-anak ni Kerejeen a malé itekaren ku deret ku ton si paling gelep, i onéle kasé ara sebuku urum kertak ni ipon.”

13 Renyel iperin Yesus ku perwira wa : “Ulak mi renyel den jadile ku ko lagu si ipercayai ko.” Den waktu oya pé jegerle temuluk ni perwira wa.

Yesus mujegeren inen tue ni Petrus urum delé jema si sakiten 8: 14-17

(Mrk. 1:29-34; Luk. 4:38-41)

14 Waktu Yesus gèh ku umah ni Petrus, ièngon-É inen tue ni Petrus begulang entap sakit segé.

15 Iamat Yesus pumu inen tue ni Petrus a, renyel segéwé a munaringen wé; den wé pé uet nye mulayani Yesus.

16 Ketike lo malé kelem pakea mumai ku Yesus delé jema si kerasuken setan; den urum sara cerak iusir Yesus roh-roh a nye ijegeren-É bèwèné jema si sakiten.

17 Kati genaple si nge isawahen nabi Yesaya : “Wéle si munarang kelemahen urum munangung penyakitte.”

Tentang mununung Yesus 8: 18-22

(Luk. 9:57-62)

18 Ketike ièngon Yesus jema delé muringkeli-É, ikini-É murid-murid-É beluh ku serap ho.

19 Renyel gèhle sara ahli Taurat mumerin ku Wé : “Guru, aku malé mununung Guru ku sihen pé Guru beluh.“

20 Iperin Yesus ku wé : “Serigala munempui luang den manuk munempui umah, tetapé Anak ni Manusie gere munempui ton kin mumarinen ulu-É.”

21 Sara ari murid-murid-É si lèn mumerin ku Wé : “Tuhen, ijinen aku beluh mulo nye munguburen amangku.”

22 Tetapé iperin Yesus ku wé : “Tunungle Aku, daténen jema benasa munguburen jema benasa ni pakea.”

Yesus muredenen kuyu badé 8: 23-27

(Mrk. 4:35-41; Luk. 8:22-25)

23 Den ketike Yesus nik  ku wan perau, murid-murid-É  mununungi Wé.

24 Tibe-tibe mengesle kuyu badé i danau a, sehinge perau a olok idere gelumang; tetapé Yesus nomé.

25 Renyel gèhle murid-murid-É murungunen Wé, kené : “Tuhen, tulung, kite malé benasa!”

26 Iperin Yesus ku pakea : “Hana kati kam terih, kam si kurang percaya?” Renyel uetle Yesus mugerantang kuyu urum danau a, den danau a mujadi tenang pedéh.

27 Den jema-jema wa hèran nye kené : “Sahan ke die Jema ni, sehinge kuyu urum danau pé patuh kin Wé?”

Yesus mujegeren roa jema si kerasuken 8: 28-34

(Mrk. 5:1-20; Luk. 8:26-39)

28 Ketike Yesus sawah i serap ni danau ho, i daerah urang Gadara, gèhle ari pekuburen roa jema si kerasuken setan mudemui Yesus. Pakea olok pedéh bebahaya, sehinge gere sara jema pé si berani liwet tar jelen oya.

29 Den pakea metuk, kené : “Woi Anak ni Allah, hana urusen-Mu urum kami? Ko gèh ku ini kin munyikse kami sebelem waktué ke?”

30 Gere gip ari pakea ara sara kawanan babi si delé jemlahé tengah mungenal pakan.

31 Renyel setan-setan a muniro ku Yesus : “Ike iusir Ko kami, kininen kami mayo ku wan kawanan babi-babi a.”

32 Iperin Yesus ku pakea : “Beluh renyel!” Den tangkuhle pakea nye mayo ku wan babi-babi a; renyel musangkale bèwèné babi a nye terjun ari geniring ni jurang ku wan danau den maté i wan wih.

33 Renyel penjege-penjege babi a musangka ku wan kute, isederen pakeale bèwèné si nge terjadi urum tentang jema-jema si kerasuken setan a.

34 Den èngonle, bèwèné jema si ara i kute tangkuh kin mudemu urum Yesus. Nge mari mudemu urum Wé, pakea mudesak kati Wé munaringen daerah ni pakea.