Matius 9

Yesus mujegeren jema lumpuh 9: 1-8

(Mrk. 2:1-12; Luk. 5:17-26)

Mari oya Yesus nik ku wan perau nye munyeberang, renyel sawahle Wé ku kute diri-É.

2 Èngonle, pepien jema mumai ku Wé sara jema lumpuh begulang i ton noméwé. Waktu ièngon Yesus imen ni pakea, iperin-É ku jema lumpuh a : “Kuetenle atému, anak-Ku, dosamu nge iampuni.”

3 Den pepien ahli Taurat becerak sesabé dirié : “Jema ni muhujet Allah.”

4 Yesus mubetihi pikiren ni pakea, nye ken-É : “Hana kati kam mumikiren hal-hal si jahat i wan até ni kam?

5 Sihen ke lebih murah mumerinen : Dosamu nge iampuni, atawa mumerinen : Uet renyel den remalanle?

6 Tetapé gelah ibetihi kam bahwa Anak ni Manusie bekuasa munampuni dosa i denie ni.” – renyel iperin Yesus ku jema lumpuh a – : “Uet renyel, tatangen ton nomému den ulak mi renyel ku umahmu.”

7 Den wé pé uet nye ulak ku umahé.

8 Jema delé si munèngon hal oya terih nye mumulienen Allah si nge munosanen kuasa si lagu oya ku manusie.

Yesus munalu Matius 9: 9-13

(Mrk. 2:13-17; Luk. 5:27-32)

9 Mari Yesus beluh ari oné, ièngon-É sara jema si begeral Matius, tengah kunul i kantur pajak, renyel iperin-É ku wé : “Tunungle Aku.” Den Matius pé sesuk nye mununung Yesus.

10 Ketike Yesus mangan i umah ni Matius, delé penagih pajak urum jema bedosa gèh nye mangan urum Yesus den murid-murid-É.

11 Waktu urang Parisi munèngon hal oya, iperin pakea ku murid-murid ni Yesus : “Hana kati gurumu mangan urum penagih pajak den jema bedosa?”

12 Tetapé Yesus mumengéé nye iperin-É : “Jema sehat gere mumerlunen dokter, tapé jema sakiten.

13 Beluhle nye pelejeri arti ni cerak ini : Si Kukenaki oyale belas kasihen nume pesemahen; sebeb Aku gèh nume kin munalu jema benar, tapé jema bedosa.”

Tentang bepasa 9: 14-17

(Mrk. 2:18-22; Luk. 5:33-39)

14 Renyel gèhle murid-murid ni Yohanes ku Yesus nye mumerin : “Hana kati kami urum urang Parisi bepasa, tapé murid-murid-Mu gere bepasa?”

15 Jeweb Yesus ku pakea : “Nguk ke rakan sebet ni aman mayak berues até sumur aman mayak a urum pakea? Tetapé waktué malé gèh, ketike aman mayak a iueten ari pakea, i waktu oyale pakea malé bepasa.

16 Gere sara jema pé munampalen sara rilah ruje si gere ilen susut ku baju si nge tue; sebeb ruje penampal a malé murèbèken baju si nge tue a, nye makin kolakle rèbèké.

17 Betapé anggur si ayu gere ikemasen jema ku was ni kantong kulit si tue; sebeb ike lagu noya, kantong kulit a malé murèbèk sehinge anggur si ayu a mamur den kantong kulit a pé mubeltak. Tetapé anggur si ayu ikemas jema ku was ni kantong kulit si ayu, sehinge tejegele reroané.”

Anak ni kepala umah ibedet urum jema banan si sakit pendarahen 9: 18-26

(Mrk. 5:21-43; Luk. 8:40-56)

18 Waktu Yesus tengah munejeren hal-hal oya ku pakea, gèhle sara kepala umah ibedet sujut munyemah Wé, kené : “Anak berungku ben pedéh benasa, tetapé gèh renyel den parinen pumu ni Guru ku atan ni wé, den wé malé murip mien.”

19 Renyel Yesus pé uet nye mununungi kepala umah ibedet a, betapé urum murid-murid-É.

20 Waktu Yesus remalan, sara jema banan si nge due belas tun lememé muderite sakit pendarahen mudekati Yesus ari kuduk nye mujontok reramu ni jubah-É.

21 Sebeb iperiné wan atéwé : “Ike kujontoken we jubah-É, aku pasti jeger.”

22 Yesus mubalik nye munèngon wé, ken-É : “Kuetenle atému anak-Ku, imenmu nge mujegeren ko.” Den ari saat oya mi jegerle jema banan a.

23 Ketike Yesus sawah i umah ni kepala umah ibedet a den ièngon-É

peniup-peniup suling urum jema delé kiruh,

24 Iperin-É ku pakea : “Tangkuhle kam, kerna ipak ni gere benasa tapé nomé.” Den pakea mungediki Wé.

25 Mari jema delé a tangkuh, Yesus mayo nye munamat pumu ni ipak a, renyel uetle ipak a ne.

26 Den musierle keber oya ku seluruh daerah a.

Yesus mujegeren mata ni roa jema si mbota 9: 27-31

27 Ketike Yesus munaringen umah ni kepala umah ibedet a, roa jema mbota mununungi Wé sesire metuk, kené : “Kasihanile kami, o Anak ni Daud!”

28 Nge mari Yesus sawah i umah, gèhle roané jema mbota wa ku Wé, renyel iperin Yesus ku pakea : “Percaya ke kam bahwa Aku sangup mubuetené?” Jeweb pakea ku Wé : “Kami percaya Tuhen.”

29 Renyel Yesus munamat mata ni pakea, nye iperin-É : “Jadile ku kam munurut imenmu.”

30 Den mukele mata ni pakea. Renyel urum olok Yesus muperingeten pakea, ken-É : “Inget, enti sara jema pé mubetihi hal ni.”

31 Tetapé pakea tangkuh nye mungeberen tentang Yesus ku seluruh daerah oya.

Yesus mujegeren sara jema bisu 9: 32-34

32 Ketike kedue jema mbota wa beluh, imai jemale ku Yesus sara jema bisu si ikuasai setan.

33 Mari iusir Yesus setan a, jema bisu a pé nge lepas becerak. Den hèranle jema delé a, kené : “Gere ilen pernah ièngon si lagu ini i Israel.”

34 Tetapé urang Parisi mumerin : “Urum kuasa reje ni setan Wé munusir setan-setan.”

Belas kasihen ni Yesus kin jema delé 9: 35-38

35 Renyel Yesus beluh muringkeli bèwèné kute urum kampung-kampung. Wé munejer i wan umah-umah ibedet ni pakea den mungeberen Injil Kerejeen Serge, nye munosopen segele penyakit urum kelemahen.

36 Munèngon jema delé a, mugerakle até ni Yesus entap ni kasih-É ku pakea, kerna pakea nge hèk den muderite lagu bebiri si gere ara mugembala.

37 Renyel iperin-É ku murid-murid-É : “Penulingen delé pedéh, tetapé jema si munuling tikik.

38 Entap ni oya, tirole ku Tuhen si penempu penulingen a, kati ikini-É jema-jema si munuling ku ton penulingen-É oya.”