Efesus 1

Salam 1:1-2

Ari Paulus, rasul Kristus Yesus kerna kenak ni Allah, ku jema-jema kudus i Efesus, jema si percaya wan Kristus Yesus.

2 Kasih karunie den damé sejahtera ari Allah, Amante den ari Tuhen Yesus Kristus munyertai kam.

Kekayaen jema si terpilih 1:3-14

3 Terpujile Allah den Ama Tuhente Yesus Kristus si i wan Kristus nge mungarunienen ku kite segele berkat rohani i wan serge.

4 Sebeb i wan Wé Allah nge mumilih kite sebelem denie ijadinen, kati kite kudus den gere becacat i arap-É.

5 Wan kasih Wé nge munentunen kite ari pemulo mulalui Yesus Kristus kin mujadi anak-anak-É, sesué urum kerelaen kenak-É,

6 kati terpujile kasih karunie-É si mulie si ikarunienen-É ku kite i was Wé, si ikasihi-É.

7 Sebeb i wan Wé den mulalui rayoh-É kite mudepet penebusen, oyale pengampunen dosa munurut kekayaen kasih karunie-É,

8 si ilimpahen-É ku kite wan segele hikmat urum pengertien.

9 Sebeb Wé nge munyatanen resie kenak ni Wé ku kite, sesué urum rencana kerelaen si ari mulo mi nge itetapen-É i wan Kristus

10 kin  mubueten ike waktué  nge sawah,   mujadinen sara i wan Kristus sebagé ulu ari segele sesanah si i serge betapé si i bumi.

11 Kuperinen “i wan Kristus “ kerna i wan Wéle kami mudepet bagien si ijanyinen - kami si ari pemulo itentunen kin munerime bagien oya sesué urum meksud Allah, si i wan segeleé bebuet munurut keputusen kenak-É kendiri.

12 Kati kami si sebelemé nge munobon harapen ku Kristus nguk mujadi puji-pujien bagi kemulieen-É.

13 I wan Wé kam pé, - nge mumengé firman kebenaran, oyale Injil keselamatenmu - i wan Wé kam pé waktu kam percaya, imeterénen urum Roh Kudus, si ijanyinen-É oya.

14 Den Roh Kudus a oyale jaminen bagiente sawah kite munerime seluruhé, oyale penebusen si mujadinen kite empu ni Allah, kin mumuji kemulieen-É.

Doa kin pengertien tentang kemulieen Kristus.1:15-23

15 Kerna oya, nge mari aku mumengé tentang imenmu wan Tuhen Yesus den tentang kasihmu terhedep bèwèné jema kudus,

16 aku pé gere teduh mungucep sukur kerna kam. Den Aku dor muninget kam wan doàku,

17 den muniro ku Allah Tuhente Yesus Kristus, oyale Ama si mulie, kati Wé munosanen ku kam Roh hikmat den wahyu kin mubetihi Wé urum benar.

18 Den kati Wé mujadinen mata atému terang, sehinge kam mungerti pengharapen hana si ara wan penalunen-É: beta kayaé kemulieen bagien si itentunen-É kin jema-jema kudus.

19 Dum hebat ni  kuasa-É kin kite si percaya, sesué urum kekueten kuasa-É,

20 si ibueten-É i wan Kristus urum mubangkiten Wé ari antara jema benasa den mungunulen Wé i semelah kuen-É i serge,

21 gip lebih atas ari segele pemerintah den penguasa den kekuasaen den kerejeen den jep geral si lepas isebut, nume i denie ni pelin, melènén i denie si male gèh.

22 Den segele sesanah nge iobonen-É i tuyuh kiding ni Kristus den Wé nge iosanen-É ku jemaat sebagé ulu ari segele si ara.

23 Jemaat a oyale tubuh-É , oyale keengkipen-É, si munengkipi bèwèné den segeleé.