Efesus 2

Bèwèné  oyale kasih karunie 2:1-10

Kam tengaha nge benasa kerna salah den dosa-dosa ni kam.

2 Kam murip i wasé, kerna kam mununungi jelen denie ini, kerna kam munaati penguasa kerejeen angkasa, oyale roh si se ni bebuet i antara jema durhaka.

3 Sebenaré tengaha kami bèwèné pé teritung i antara pakea, ketike kami murip was hewe nepsu usi den munuruti kenak ni usi den pikiren kami si kotèk. Munurut tabiet, kami pé dis lagu jema si lèn a si turah imurkei.

4 Tetapé Allah si kaya urum rahmat, entap kasih-É si kul, si ilimpahen-É ku kite,

5 nge munuripen kite murum urum Yesus, seger pé kite nge benasa kerna kesalahente - entap kasih karunie kam iselamaten -

6 den i wan Kristus Yesus Wé nge mubangkiten kite den munosanen ton murum urum Wé i serge.

7 Kati i masa si malé gèh, Wé munuruhen ku kite kekayaen kasih karunie-É si olok mulimpah sesué urum kejerohen-É terhedep kite wan Kristus Yesus.

8 Sebeb kerna kasih karunie kam iselamaten mulalui imen, oya nume hasil usaha ni kam, tetapé penosahen Allah.

9 Oya nume hasil pebueten ni kam, kati enti ara jema si mumegahen diri.

10 Kerna kite ni bueten Allah iciptanen wan Kristus Yesus kin mubueten pebueten jeroh, si isiepen Allah sebelemé. Wé mera kati kite murip i wasé.

Isaranen wan Kristus 2:11-22

11 Kerna oya ingetle, bahwa tengaha kam sebagé jema nume Yahudi munurut usi, si isebut jema gere besunet ari pakea si mugerali dirié “sunet”, oyale sunet lahiriah si ibueten ari pumu manusie.

12 Bahwa waktu oya kam tanpa Kristus, gere temasuk kewarganegaraen Israel den gere mudepet bagien wan ketentuen si ijanyinen, tanpa pengharapen den tanpa Allah i wan denie.

13 Tetapé i wan Kristus Yesus kam, si tengaha “gip” se ni nge mujadi rap entap ni rayoh Kristus.

14 Kerna Wé le damé sejahterante,si nge munos  kedue pihak musara den si nge murèmoken rering pemisah, oyale pelewenen, urum munyerahen tubuh-É.

15 Sebeb urum benasa-É sebage manusie, Wé nge mubatalen hukum Taurat urum segele perintah den ketentuené, kin munyiptanen roane mujadi sara manusie ayu i wan diri-É, den urum oya munaranen dame sejahtera.

16 Mulalui kematénen-É i kayu salib, Kristus munos roa bengsa oya mujadi sara, den mudaménen pakea ku Allah, sehinge mosople pemusuhen oya.

17 We gèh mungeberen Keber Jeroh tentang pendaméen oya kin kam si gip den ku pakea si rap.

18 Kerna mulalui Wé kite roa pihak wan sara Roh mudepet jelen mayo ku Ama.

19 Betale kam nume ne jema asing den jema si gèh muranto, melènen pong sewarga ari jema-jema kudus den anggota keluarga Allah.

20 Si ibangun i atas dasar bèwèné rasul den nabi, den Yesus Kristus sebagé atu penjuru.

21 I wan Kristus seluruh bangunen isusun den mutamah-tamah mujadi umah Allah si kudus i wan Tuhen.

22 I wan ni Wé kam pé turut ibangun mujadi ton ni Allah taring, mulalui Roh-É.