Efesus 3

Resie penalunen jema si nume Yahudi 3:1-13

Oyale sebebpé aku ni, Paulus,   ipenjeren kerna Kristus Yesus kin  jema-jema si gere mubetihi Allah,

2 memang kam nge mumengé tentang penyawahen kasih karunie Allah kin kam si ipercayanen ku aku,

3 kune resieé inyatanen ku aku urum wahyu, lagu si nge kutulisen i atas urum singket.

4 Ike kam mubacaé kam lepas mubetihi pengertienku tentang resie Kristus,

5 si i jemen angkaten tengaha gere ilen ikeberen ku anak-anak manusie, tetapé si se ni inyatanen i wan Roh ku rasul den nabi-nabi-É si kudus,

6 bahwa jema si nume Yahudi kerna Keber Injil, nge mujadi anggota sara tubuh den turut munerime hana si ijanyinen Allah mulalui Kristus Yesus.

7 Aku nge ijadinen pelayan Injil munurut karunie anugerah Allah si ikarunienen ku aku sesué urum kekueten kuasa-É.

8 Ku aku, si paling hine i antara segele jema kudus, nge ianugerahen kasih karunie ini, kin mungeberen ku jema si nume Yahudi kekayaen Kristus si gere mubatas oya,

9 den kin mujelasen hana isié tuges  penyawahen resie si nge berabad-abad tetuni wan Allah, si nge munyiptanen segeleé.

10 Kati mulalui jemaat ikeberen bebagé  hikmat Allah ku pemerintah den penguasa i serge.

11 Sesué urum meksud abadi si itetapen-É wan Kristus Yesus Tuhente.

12 I wan Wé kite mudepet keberanien den jelen mayo ku Allah urum engkip kepercayaen ari imen te ku Wé.

13 Kerna oya aku muniro ku kam, kati kam enti tawar até munengon kesesakenku kerna kam, sebeb kesesakenku oyale kemulieen ni kam.

Doa Paulus 3:14-21

14 Oyale sebebpé aku sujut ku Ama,

15 si ari Wé le bèwèné bengsa i serge den i atas bumi munerime geralé.

16 Aku bedoà kati Wé munurut kekayaen kemulieen-É,mungueten den muneguhen kam urum Roh-É i wan batinmu,

17 sehinge mulalui imenmu Kristus taring i wan atému den kam muuyet urum bedasar i wan kasih.

18 Aku bedoà kati kam murum urum bèwèné jema kudus lepas mumehemi, beta kolaké den narué den atasé den relemé kasih Kristus.

19 Den lepas mubetihi kasih Kristus si muliweti segele pemetihen. Aku bedoà kati kam iengkipi i wan bèwèné keengkipen Allah.

20 Bagi Wéle si lepas mubueten gip lebih delé ari si kite doànen atawa pikiren lagu si nge nyata ari kuasa si bebuet i wante,

21 bagi Wéle kemulieen i wan jemaat den i wan Kristus Yesus turun temurun sawah selamaé. Amin.