Efesus 4

Kesatuen jemaat den karunie si mubeda-beda 4:1-16

Kerna oya aku munasèhati kam, aku jema si ipenjerenen kerna Tuhen,  sebagé jema si nge italu kenaké muripmu sesué urum penalun oya.

2 Kenaké kam sabé renah até, lemah lemut den seber, telasenle kasihmu wan hal saling munulung.

3 Den berusahale mujege kesatuen Roh urum ikoten dame sejahtera.

4 Sara tubuh den sara Roh, lagu kam nge italu ku sara pengharapen si ara wan penalunenmu,

5 sara Tuhen, sara imen, den sara baptisen,

6 sara Allah den Ama ari bèwèné, Allah si iatas bèwèné den ari bèwèné den i was bèwèné.

7 Tetapé ku kite masing-masing nge ianugerahen kasih karunie munurut ukuren penosanen Kristus.

8 Oyale sebebpé itulis wan Kiteb Suci:

“Waktu Wé nik ku ton atas,

Wé mumai   tawanen;

Wé nge mungarunienen

penosahen ku

manusie.”

9 Nume ke “Wé nge nik”, bearti, Wé pé nge turun ku bagien bumi si paling tuyuh.

10 Wé si nge turun, Wé pé si nge nik gip lebih atas ari bèwèné langit kin munengkipen segeleé.

11 Den Wéle si munosanen bier rasul bier pé nabi, bier si mungeberen Injil bier pé gembala den penejer,

12 kin mulengkapi jema kudus bagi buet pelayanen gune pembangunen tubuh Kristus,

13 sehinge kite bèwèné nge sawah ku kesatuen imen den pemetihen si benar tentang Anak Allah, kedewasaen engkip, den tingket pertumbuhen si sesué urum keengkipen Kristus.

14 Sehinge kite nume ne kekanak, si iomang-amingen bebagé rupe kuyu penejeren ari cara pelsu manusie wan keliciken pakea si munyesaten.

15 Tetape urum teguh beramat ku kebenaran, i wan kasih kite mutamah-tamah wan segele hal ku arah Wé, Kristus, si oyale ulu.

16 Ari Wéle seluruh tubuh, - si rapi mususun  den muikot mujadi sara entap pelayanen setiep bagiené,sesué urum derjet buet ni tiep anggota - munerime pertumbuhené den mubangun dirié wan kasih.

Manusie ayu 4:17-32

17 Sebeb oya kuperinen den kutegasen ini ku kam i wan Tuhen: Enti ne murip dis lagu jema si gere mubetihi Allah urum pikirené si sie-sie

18 den pengertiené si gelep, gip ari murip persekutuen urum Allah, kerna keogohen si ara i was ni pakea den kerna keudelen até ni pakea.

19 Perasaen ni pakea nge tumpul sehinge pakea munyerahen diri ku hewe nepsu den mubueten urum serakah segele jenis kekotèken.

20 Tetapé kam nume lagu noya, kam nge belejer mubetihi Yesus.

21 Kerna kam nge mumengé tentang Wé den munerime penejeren i was-É munurut kebenaran si nyata wan Yesus.

22 Bahwa kam, mukait urum muripmu si tengaha, turah munaringen manusie lemem si mudemui kebenasanené ari nepsué si munyesaten,

23 kati kam mujadi ayu i wan roh den pikirenmu,

24 den mumakéen manusie ayu, si nge iciptanen munurut kenak ni Allah i wan kebenaran den kekudusen si sesunguhé.

25 Kerna oya tekarenle cogah den becerakle benar sara ku si lèn, sebeb kite sesabé anggota.

26 Ike kam mujadi bengis, entile kam bebuet dosa, entile matanlo mutelnom, sebelem bengis mu mosop

27 den entile osah kesempaten ku Belis.

28 Jema si nusuh, enti ne wé munusuh, tetapé jerohé wé bebuet keras den mubueten pebueten si jeroh urum pumu dirié, kati wé lepas mubaginen sesanah ku jema si bekekurengen.

29 Entile ara peceraken kotèk tangkuh ari awahmu, tetapé gunenle ucepen si jeroh kin mubangun isi perlu, kati pakea si mumengéé mudepet kasih karunie.

30 Den entile kam munos Roh Kudus berues até, si nge mumeterénen kam sebelem lo keselamatén.

31 Bèwèné si pit, kegeramen, kebengisen, pelolo, fitnah kenaké itekaren ari kam, betapé bèwèné kejahaten.

32 Tetapé kenaké kam ramah sara terhedep si lèn, saling mungasihi, den saling munampuni, sekune Allah i wan Kristus nge munampuni kam.