Efesus 6

Taat den kasih 6:1-9

Hei kekanak, taatile jema tuemu i wan Tuhen, kerna betale turahé.

2 Hormatile amangmu den inemu oyale perintah si pemulo urum sara pejanyinen

3 kati kam mubahgie den naru umurmu i denie.

4 Den kam bèwèné ama, entile bangkiten bengis i wan até ni kekanakmu, tetapé didikle pakea i wan ejeren den nasèhat ni Tuhen.

5 Hei kam bèwèné temuluk, taatile rejemu si i denie urum terih den gentar den urum tulus até, dis lagu kam taat ku Kristus,

6 enti i arap ni pakea pelin kin munyenangen até jema, tetapé sebagé hamba Kristus si urum segenap até mubueten kenak ni Allah,

7 den urum rela bebuet lagu kin Tuhen den nume kin manusie.

8 Betih kam, bahwa jep jema, bier temuluk bier pé jema merdeka, ike wé nge bebuet sesanah si jeroh, wé malé munerime belesené ari Tuhen.

9 Den kam reje-reje, buetenle lagu noya pé terhedep temulukmu den gipile ancamen. Ingetle, bahwa Tuhen ni pakea den Tuhenmu ara i serge den Wé gere mumanang rupe.

Perlengkapen rohani 6:10-12

10 Akhiré, kenaké kam kuet i wan Tuhen, i wan kekueten kuasa-É.

11 Pakéenle bèwèné perlengkapen senjata Allah, kati kam lepas betehen mulewen tipu muslihat Belis.

12 Kerna perjuangente numele mulewen rayoh den usi, tetapé mulewen pemerintah, mulewen penguasa, mulewen penghulu denie si gelep ni, mulewen roh jahat i angkasa.

13 Kerna oya uetenle bèwèné perlengkapen senjata Allah, kati kam lepas munaranen perlewenen i lo si jahat oya den tetap sesuk, nge mari kam munyelesènen segele sesanah.

14 Jadi sesukle tegep berikotawaken kebenaran den baju zirah keadilen,

15 kidingmu bekasuten kerelaen kin mungeberen Injil damé sejahtera;

16 wan segele keadaen gunenenle perisai imen, sebeb urum perisai a kam malé lepas munempoten bèwèné panah rara ari si jahat.

17 Den terimele ketopong keselamaten den pedang Roh, oyale firman Allah,

18 wan segele doà den penironen. Bedoàle jep waktu i wan Roh den bejegele i wan doàmu oya urum penironen si gere metus kin bèwèné jema kudus,

19 kin aku pe, kati ku aku, ike aku munuke awahku, ikarunienen peceraken si benar, kati urum keberanien aku mungeberen resie Injil.

20 Kerna Injil oyale aku mujadi utusen si ipenjerenen. Bedoàle kati urum keberanien aku munyatanené, sekune turahé aku becerak.

Tentang Tikhikus den salam 6:21-24

21 Kati kam pé mubetihi keadaen den hal ihwalku, kerna oya Tikhikus, sudere nte si kekasih den pelayan si setie wan Tuhen, male munyederen bèwèné ku kam.

22 Urum meksud inile wé kukini ku kam, kati betihi kam hal ihwal kami den kati wé muhibur até ni kam.

23 Dame sejahtera den kasih urum imen ari Allah, Ama den ari Tuhen Yesus Kristus munyertai kam bèwèné.

24 Kasih karunie munyertai bèwèné jema, si mungasihi Tuhente Yesus Kristus urum kasih si gere benasa.