Galatia 1

Salam  1:1-5

Ari Paulus, rasul, nume kerna manusie, nume pé ari manusie, melènen ari Yesus Kristus den Allah, Ama, si nge mubangkiten Wé ari antara jema benasa,

2 den ari bèwèné sudere si ara murum urum aku, ku jemaat i Galatia:

3 Kasih karunie munyertai kam den damé sejahtera ari Allah, Amante, den ari Tuhen Yesus Kristus,

4 si nge munyerahen diri-É kerna dosa-dosante, kin muluahen kite ari denie jahat si se ni, munurut kenak ni Allah den Amante.

5 Bagi Wéle kemulieen selama-lamaé! Amin.

Injil we sara 1:6-10

6 Aku hèran, bahwa kam tir pedéh mubalik ari Wé, si entap kasih karunie Kristus nge munalu kam, den mununungi Injil si lèn,

7 si sebenaré nume Injil ; cume ara jema si mungarunen kam den bemeksud mumuterbaliken Injil Kristus.

8 Tetapé seger pé kami atawa sara malèkat ari serge si mungeberen ku kam sara Injil si mubèda urum Injil si kami keberen ku kam, terkutukle wé.

9 Lagu si nge kami perinen tengaha , se ni kuperinen seger mi: ike ara jema si mungeberen ku kam sara Injil si gere dis urum si nge iterime kam, terkutukle wé.

10 Jadi kune se ni, ara ke kukenali galak naté ni manusie atawa galak naté ni Allah? Ara ke kucube bekenak ku manusie? Sekireé aku mera bekenak ku manusie, aku ni numele hamba Kristus.

Kune Paulus mujadi rasul 1:11-24

11 Sebeb oya kutegasen ku kam, sudere-suderengku, bahwa Injil si kukeberen oya numele Injil manusie.

12 Kerna aku nume munerimeé ari manusie, den nume manusie si munejerené ku aku, tetapé aku munerimeé ari penyataen Yesus Kristus.

13 Sebeb kam nge mumengé tentang muripku tengaha wan agama Yahudi: tanpa batas aku munganiaya jemaat Allah den berusaha mubenasanené.

14 Den i wan agama Yahudi aku gip lebih maju ari delé pong si sebaya urum aku i antara bengsangku, sebagé jema si lisik pedéh munuruti edet istiedet muyang datungku.

15 Tetapé waktu Wé, si nge mumilih aku ari kanungen ine ku den munalu aku entap kasih karunie-É,

16 bekenak munyatanen Anak-É i was aku, kati aku mungeberen Wé i antara bengsa-bengsa si nume Yahudi, aku gere niro petimangen ku sahan pé.

17 Aku pé gere beluh ku Yerusalem mudemui pakea si nge mujadi rasul sebelem aku, tetapé aku berangkat ku tanoh Arab den ari oné ulak mien ku Damsyik.

18 Renye, tulu tun mari oya, aku beluh ku Yerusalem kin munentongi Kefas den aku numpang i umahé lime belas lo.

19 Tetapé aku gere munèngon sara jema pé ari rasul-rasul si lèn, kecuali Yakobus, sudere Tuhen Yesus.

20 I arap ni Allah kutegasen: hana si kutulisen ku kam ini betul, aku gere cogah.

21 Renye aku beluh ku daerah Siria den Kilikia.

22 Tetapé rupeku tetap gere itene jemaat Kristus i Yudea.

23 Pakea mumengé pelin we, bahwa jema si tengaha munganiaya pakea, se ni mungeberen imen, si pernah malé ibenasanené.

24 Den pakea mumulienen Allah kerna aku.