Galatia 2

Paulus iakui bèwèné rasul 2:1-10

Renye nge mari liwet empat belas tun, aku beluh ku Yerusalem urum Barnabas den Titus pé ku mai.

2 Aku beluh bedasaren sara penyataen. Den wan pecerakan khusus  kujelasen Injil si kukeberan i antara bengsa nume Yahudi ku pemimpin- pemimpin si tepanang i oné, kati enti sie-sie aku berusaha atawa nge berusaha.

3 Tetapé bier pé Titus, si murum urum aku urang Yunani, wé gere ipaksa kin besunet.

4 Memang ara desaken ari sudere pelsu si mayo urum ongot-ongot oyale pakea si munyusup ku was, si berusaha kati Titus a isuneten. Pakea muhalangi kebebasen te si kite empui i was Kristus Yesus, kati urum cara oya  pakea mubaliken kite ku keadaen sebagé hamba.

5 Tetapé kejep pé kami gere mera surut den tungkuk ku pakea, kati kebenaran Injil tetap murni kin kam.

6 Den tentang pakea si ianggap tepanang oya -kune keduduken pakea tengaha gere penting bagiku, sebeb Allah gere mumanang rupe - den kerna pakea gere mumaksanen hana pé ku aku.

7 Sebaliké, nge mari pakea munèngon bahwa ku aku nge ipercayanen pengeberen Injil ku jema-jema gere besunet, dis lagu Petrus ku jema besunet,

8 kerna We si nge munosanen kekueten ku Petrus kin mujadi rasul bagi jema besunet, Wé pé si nge munosanen kekueten ku aku kin jema-jema si gere besunet.

9 Den nge mari munèngon kasih karunie si ianugerahen ku aku, Yakobus, Kefas den Yohanes, si ipanang sebagé sokoguru jemaat, salamen urum aku den urum Barnabas sebagé tene bahwa kami bepong, kati kami beluh ku jema-jema gere besunet den pakea ku jema-jema si besunet.

10 Cume, kami turah tetap muninget jema miskin den memang oyale sunguh kuusahanen mubuetené

Paulus betentangen urum Petrus 2:11-14

11 Tetapé waktu Kefas gèh ku Antiokia, aku terang-terangen munentangé, sebeb wé salah.

12 Kerna sebelem sesidah jema ari golongen Yakobus gèh, wé mangan sara edangan urum sudere si gere besunet, tetapé nge mari pakea gèh, wé mungunduren diri den mugipi pakea kerna terih kin sudere si besunet.

13 Den urang Yahudi si lèn pé turut betingkah munapék urum wé, sehinge Barnabas kendiri turut museret kerna kemunapéken ni pakea.

14 Tetapé waktu kuèngon, bahwa pebueten pake oya gere sesué urum kebenaren Injil, aku becerak ku Kefas

arap ni pakea bèwèné, “ike ko, urang Yahudi, murip lagu urang si nume Yahudi, hana kati ko lepas mumaksa sudere-sudere si gere besunet kin murip secara Yahudi?”

Yahudi den si nume Yahudi iselamaten kerna percaya kin Kristus 2:15-21

15 Munurut kelahiren kami oyale urang Yahudi den nume jema bedosa ari bengsa-bengsa lèn.

16 Betih kam, bahwa gere ara sara jema pé si ibenaran kerna mubueten hukum Taurat, tetapé kerna imen was Yesus Kristus pelin we. Sebeb oya kami pé nge percaya ku Yesus Kristus, kati kami ibenaran kerna imen was Kristus den nume kerna mubueten hukum Taurat. Sebeb: “gere ara sara jema pé si ibenaran “ kerna mubueten hukum Taurat.

17 Tetape ike kami kendiri, berusaha kin ibenaren was Kristus den nge mari oya ternyata kami jema-jema bedosa ilen, ara ke artié, bahwa Kristus oyale pelayan dosa? Tentué gere.

18 Kerna ike aku mubangun mien hana si nge kuremoken, aku munyatanen diriku sebagé si munyalahi hukum Taurat.

19 Sebeb aku nge benasa kerna hukum Taurat kin hukum Taurat, kati aku murip kin Allah. Aku nge isaliben urum Kristus;

20 ara pé muripku ini, nume ne aku pelin si murip, melènen Kristus si murip i wan aku. Den muripku si besilo ni ara i wan usi, oyale murip entap imen wan Anak Allah si nge mungasihi aku den munyerahen diri-É kin aku.

21 Aku numele gere munerime kasih karunie Allah. Sebeb sekireé ara kebenaran ari hukum Taurat, sie-siele kematénen Kristus.