Galatia 3

Ibenaren kerna imen 3:1-14

Woi, urang Galatia si ogoh, sahan ke si nge mugodai kam? Nume ke Yesus Kristus si isaliben oya nge ijelasen urum terang i arapmu?

2 Cube sederen ku aku hal ni: Ara ke kam nge munerime Roh kerna mubueten hukum Taurat atawa kerna percaya ku pengeberen Injil?

3 Ara ke kam seogoh oya? Kam nge muloi urum Roh, mera ke kam besilo ni muakhirié wan usi?

4 Sie-sie ke bèwèné si nge irasanen kam sedelé oya? Masaken sie-sie!

5 Jadi kune se ni, ara ke Wé si munganugerahen Roh ku kam urum mulimpah den si mubueten mukjizet i antara kam, bebuet lagu noya kerna kam mubueten hukum Taurat atawa kerna kam percaya ku pengeberen Injil?

6 Urum cara oya pé Abraham percaya ku Allah, den Allah munitungen hal oya ku wé sebagé kebenaran.

7 Jadi engon kam, bahwa pakea si murip ari imen, pakeale anak-anak ni Abraham.

8 Den Kiteb Suci, si sebelemé mubetihi, bahwa Allah mubenaran jema si nume urang Yahudi kerna imen, nge lebih mulo mungeberen Injil ku Abraham : “Ari ko bèwèné bengsa malé munerime berkat.”

9 Jadi pakea si murip ari imen, pakeale si iberkati murum urum Abraham si berimen oya.

10 Kerna bèwèné jema si muharapen ari hukum Taurat, pakea ara ituyuh kutuk. Sebeb ara tertulis: “Terkutukle jema si gere setie mubueten segele sesanah si tertulis wan kiteb hukum Taurat.”

11 Den nge jelas bahwa gere ara jema si ibenaren i arap ni Allah kerna mubueten hukum Taurat, sebeb: “Jema benar malé murip ari imen.”

12 Tetapé dasar hukum Taurat numele imen, melènen sahan si mubuetené, male murip kernaé.

13 Kristus nge munebus kite ari kutuk hukum Taurat urum jelen mujadi kutuk kerna kite, sebeb ara tertulis: “Terkutukle jema si igantung i kayu salib.”

14 Yesus Kristus nge munos ini, kati i wan Wé berkat Abraham sawah ku bengsa-bengsa lèn, sehinge kite munerime Roh si ijanyinen oya mulalui imen te.

Hukum Taurat atawa janyi 3:15-29

15 Sudere-sudere, kugunen sara conto ari murip jep-jep lo. Sara wasiat si nge isahen, seger pé oya ari manusie, gere lepas ibatalen atawa itamahi sara jema pé.

16 Ara pé ku Abraham iucepen segele janyi oya den ku keturunené. Gere iperin “ku keturunen-keturunené” seakan imeksud delé jema, tapé sara jema we: “den ku keturunenmu”, oyale Kristus.

17 Meksudku: Janyi si sebelemé nge isahen Allah gere lepas ibatalen hukum Taurat, si gèh opat ratus tige puluh tun mari oya, sehinge janyi oya mosop kekuetené

18 Sebeb ike hana si itentunen Allah berasal ari hukum Taurat, oya gere berasal ari janyi; tetapé justru ari janyile Allah nge munganugerahen kasih karunie-É ku Abraham.

19 Ike lagu noya, hana ke meksud ni hukum Taurat? We itamahen kerna kesalahen - sawah gèh keturunen si imeksud ari janyi oya - den wé isawahen urum perantaraen malèkat ku wan pumu sara jema perantara.

20 Sara perantara nume muwakili sara jema pelin we, pedahal Allah oyale sara.

21 Ike lagu noya, betentangen ke hukum Taurat urum janyi-janyi Allah? Tentué gere. Sebeb sekireé hukum Taurat iosanen sebagé sesanah si lepas munuripen, tentu kebenaran asalé ari hukum Taurat.

22 Tetapé Kiteb Suci nge mungurung segele sesanah i tuyuh kekuasaen dosa, kati mulalui imen wan Yesus Kristus janyi oya iosanen ku pakea si percaya.

23 Sebelem imen oya gèh kite ara i tuyuh pengawalen hukum Taurat, den ikurung sawah imen oya nge inyatanen.

24 Jadi hukum Taurat a oyale penuntun bagi kite sawah Kristus gèh, kati kite ibenaran kerna imen.

25 Se ni imen oya nge gèh, kerna oya kite gere ara ne i tuyuh perintah penuntun.

26 Sebeb kam bèwèné oyale anak-anak Allah kerna imen i wan Yesus Kristus.

27 Kerna kam bèwèné, si ibaptis  wan Kristus nge mumakéen Kristus.

28 Wan hal ini gere ara urang Yahudi atawa urang Yunani, gere ara hamba atawa jema merdeka, gere ara rawan atawa banan, kerna kam bèwèné mujadi sara i wan Kristus.

29 Den ike kam empu ni Kristus kam pé keturunen Abraham den berhak munerime janyi Allah.