Galatia 4

Gere ara ne perhambaen 4:1-11

Meksudé oyale: Selama sara ahli waris gere ilen akil balig, tikik pé wé gere mubèda urum sara hamba, bier pé wéle empu ni segeleé;

2 Tetapé wé ara i tuyuh ni perwalien den pengawasen sawah i saat si nge itentunen amaé.

3 Betapé kite, selama kite gere ilen akil balig, kite takluk ku roh-roh si munguasai denie ni.

4 Tetapé ketike nge sawah saaté Allah munutus Anak-É, si lahir ari sara jema banan den takluk ku hukum Taurat.

5 Wé iutus kin munebus pakea, si takluk ku hukum Taurat, kati kite iterime mujadi anak.

6 Den kerna kam anak, Allah nge mungini Roh Anak-É ku wan até kite si munalu: “O Abba, O Ama!”

7 Jadi kam nume né hamba, melènen anak; ike kam anak, kam pé ahli waris ni Allah.

8 Tengaha, ketike kam gere mubetihi Allah, kam muhambanen diri ku allah-allah si hakekaté nume Allah.

9 Tetape besilo ni waktu kam nge mubetihi Allah, atawa lebih jeroh, nge mari kam ibetihi Allah, kune ke kam ulak mien ku roh-roh denie si lemah den miskin den mera mien mupehambanen diri  ku wé?

10 Kam urum teliti munuruti perayaan lo-lo tertentu, bulen-bulen, musim-musim den tun-tun.

11 Macik atéku ike nyanyaku kin kam sie-sie.

Ingetle kin hubungen te si pemulo   4:12-20

12 Kutiro ku kam, sudere-sudere, jadile dis lagu aku, sebeb aku pé nge mujadi dis lagu kam. Gere ilen pernah kurasanen sesanah si gere jeroh ari kam.

13 Betih kam, bahwa aku pemulo pedéh nge mungeberen Injil ku kam entap ni aku kurang sèhat i tubuhku.

14 Bier pé lagu noya keedeen tubuhku ini, si mujadi penyubeen bagi kam, tapé kam gere muanggapé sebagé sesanah si hine den si mice, tapé kam nge munyamut aku, dis lagu munyamut sara malèkat Allah, malahen dis lagu munyamut Kristus Yesus kendiri.

15 Dum bahgieé kam i waktu oya! Den besilo ni isihen ke bahgiemu a? Kerna aku lepas besaksi tentang kam, bahwa ike mungkin, kam nge munyongkel matamu den munosanené ku aku.

16 Kerna munyeraken kebenaran ku kam, aku nge mujadi lewenmu ke?

17 Pakea urum giet berusaha kin munegu kam, tetapé gere urum até tulus, kerna pakea mera mumaraken kam kati kam urum giet mununungi pakea.

18 Memang jeroh ike jema urum giet berusaha munegu jema lèn wan perkara si jeroh, den nume ike aku ara urum kam pelin we.       

19 Woi anak-anakku, kerna kam aku muderite bise besalin mien, sawah rupe ni Kristus mujadi nyata i was kam.

20 Beta denemku kin ara i antara ni kam besilo ni den lepas becerak urum ling si mubèda, kerna aku nge mèh akal muhedepi kam.

Hagar den Sara 4:21-31

21 Perinenle ku aku, woi kam si mera murip i tuyuh hukum Taurat, gere ke ipengé kam hukum Taurat?

22 Gere ke ara tertulis, bahwa Abraham munempui roa anak, sara ari banan si mujadi hambaé den sara mi ari banan si merdeka?

23 Tetapé anak ari banan si mujadi hambaé a iperanaken munurut usi, den anak ari banan si merdeka oya ari kerna janyi.

24 Ini oyale kiesen, sebeb keroa banan a oyale ketentuen Allah; si sara asalé ari bur Sinai den mulahiren anak-anak perhambaen, oyale Hagar.

25 Hagar oyale bur Sinai i tanoh Arab, den wé dis urum Yerusalem si se ni, kerna wé murip wan perhambaen urum anak-anaké.

26 Tetapé Yerusalem sergewi oyale banan si merdeka, den oyale inente.

27 Kerna ara tertulis:

“Besukacitale, woi ko si gempus

si gere pernah besalin!

Begegalakle den

besesurakle woi ko

si gere pernah

muderite bise besalin!

Sebeb si itaringen

rawané male munempui

anak lebih delé

ari si murawan.”

28 Den kam sudere-sudere, kam dis lagu Ishak oyale anak-anak janyi.

29 Tetapé lagu tengaha, wé si iperanaken ari usi munyikse si iperanaken munurut Roh, betapé se ni.

30 Tetapé hana ke si itulis wan Kiteb Suci?  “Usirle hamba banan oya urum anaké, sebeb anak hamba banan oya gere malé mujadi ahli waris murum urum anak banan merdéka oya.”

31 Kerna oya, sudere-sudere, kite numele anak-anak hamba banan, melènen anak-anak banan merdéka.