Galatia 5

Kemerdékaen si ianugerahen Kristus 5:1-15

Kati kite betul-betul merdéka, Kristus nge mumerdékanen kite. Kerna oya sesukle teguh den enti mera ne ikonanen igu perhambaen.

2 Sesunguhé, aku, Paulus, becerak ku kam: ike kam munyuneten dirimu, Kristus tentué gere mupaèdah bagi kam.

3 Seger mi kuperinen ku bèwèné jema si munyuneten dirié, bahwa wé wajib mubueten bèwèné hukum Taurat.

4 Kam si muharapen ibenaran kerna hukum Taurat, kam mupisah ari Kristus, kam murip ideret kasih karunie Allah.

5 Sebeb urum kuasa Roh den kerna imen,kite munantinen kebenaran si kite harapen.

6 Sebeb bagi jema-jema si ara i wan Kristus Yesus hal besunet atawa gere besunet gere muarti, imen pelin si bebuet kerna kasih.

7 Tengaha kam belomba urum jeroh, sahan ke si muhalangi kam sehinge kam gere ne munuruti kebenaran?

8 Teniron kin gere ne munurutié nume gèh ari Wé si munalu kam.

9 Ragi si tikik nge mumarinasinen bèwèné adonen.

10 Wan Tuhen aku yakin tentang kam, bahwa kam gere munempui pikiren si lèn, tetapé sahan pé si mungaconen atému wé malé munangung ukumené.

11 Den aku pé,sudere-sudere, ike aku tengah mungeberen sunet, hana kati aku tetap ianiaya? Sebeb ike beta salib nume né atu sandungen.

12 Jerohé pakea si mujalu kam a mungebirinen diriè.

13 Sudere-sudere, memang kam nge italu kin merdéka, tetapé enti le kam mugunen kemerdékaen oya sebagé kesempaten kin murip wan dosa, sebaliké kam turah saling mungasihi den saling mulayani.

14 Sebeb seluruh hukum Taurat mayo wan sara perintah ini, oyale: Kasihile sesabé kam manusie lagu kam mungasihi dirimu kendiri.

15 Tetapé ike kam saling munekét den saling mudolot, jege-jegele kati enti kam saling mubenasanen.

Murip munurut usi atawa Roh 5:16-26

16 Meksudku oyale : Muriple ari Roh, tentu kam gere munuruti kenak ni usi.

17 Sebeb kenak ni usi belewenen urum kenak ni Roh den kenak ni Roh belewenen urum kenak ni usi - kerna roane a saling betentangen - sehinge kam gere mubueten hana si ikenaki kam.

18 Tetapé ike kam munosah dirimu ipimpin Roh, tentu kam gere murip i tuyuh hukum Taurat.

19 Pebueten usi nge nyata, oyale: pencabulen, kecemaran, hewe nepsu,

20 munyemah berhala, tube, pelewenen, peselisihen, iri até, bengis, mumentingen diri kendiri, mupihak-pihak, roh pemecah,

21 kedengkien, kemabuken, pesta pora urum si lèné. Terhedep bèwèné oya kuperingeten kam - lagu si ku bueten tengaha - bahwa barik sahan si mubueten hal si lagu noya, wé gere malé mudepet bagien wan Kerejeen Allah.

22 Tetapé uah Roh oyale: kasih, sukacite, damé sejahtera, keseberen, kemurahen, kejerohen, kesetieen,

23 kelemahlemuten, penguasaen diri, gere ara hukum si munentang hal oya.

24 Barik sahan mujadi empu ni Yesus Kristus, wé nge munyalipen usi urum bèwèné hewe nepsu, den kenaké.

25 Ike kite murip ari Roh, jerohé murip kite pe ipimpin Roh.

26 Den entile kite gile hormat, entile kite saling munentang den saling mudengki.