Galatia 6

Saling munulungle kam 6:1-10

Sudere-sudere, ike pé sara jema idepeti mubueten sara kesalahen, kenaké kam si lebih rohani mumimpin jema wa ku jelen si benar was roh si lemah lemut, sire mujege dirimu kendiri, kati kam enti kona penyuben.

2 Saling munulungle was  munangung bebenmu! Urum lagu noya kam mubueten hukum Kristus.

3 Sebeb ike nalam sara jema bahwa wé muarti, pedehal wé tikik pé gere muarti, wé munipu dirié kendiri.

4 Tetapé kenaké jep jema munuji pebuetené kendiri, berole wé nguk bemegah munèngon keadaené den nume keadaen jema si lèn.

5 Sebeb jep jema malé mumikul tangungené kendiri.

6 Den jerohé, jema si munerime penejeren Kristus, mubaginen segele sesanah si ara i wé urum jema si munosanen penejeren oya.

7 Enti sesat! Allah gere mudaténen diri-É iololi. Kerna hana si isuk jema oyale si malé iulingé.

8 Sebeb barik sahan si munyuk i wan usié, wé malé munuling wan kebenasanen ari usié, tetapé barik sahan munyuk wan Roh, wé malé munuling murip si kekal ari Roh oya.

9 Entile kite bosan bebuet jeroh, kerna ike nge gèh waktué, kite male munuling, ike kite gere mujadi lemah.

10 Kerna oya, selama tengah ara kesempaten kin kite, entahle kite bebuet jeroh ku bèwèné jema terutama  ku pong-pongte seimen.

Peringeten den salam  6; 11-18

11 Èngonle, kune kulé huruf si kutulis ku kam urum pumuku kendiri.

12 Pakea si secara lahiriah galak munonjolen diri, pakeale si berusaha mumaksa kam kin besunet, urum meksud kati pakea enti ianiaya urang Yahudi kerna salib Kristus.

13 Sebeb pakea si munyunaten dirié pé gere munuruti hukum Taurat. Tapé pakea mungenaki, kati kam munyuneten diri, sehinge pakea lepas bemegah atas keadaenmu si lahiriah.

14 Tetapé aku tikik pé gere mera bemegah, selèn wan salib Tuhente Yesus Kristus. Kerna kematénen Yesus i kayu salib oya, denie nge isaliben bagiku den aku bagi denie.

15 Sebeb besunet atawa gere besunet gere ara artié, tetapé mujadi ciptaen ayu, oyale si ara artié.

16 Den bèwèné jema, si munosah dirié ipimpin patoken ini, turunle kireé damé sejahtera den rahmat atas pakea den atas Israel empu ni Allah.

17 Selanyuté entile ara jema si munyanyanen  ku, sebeb i tubuhku ara tene-tene empu ni Yesus.

18 Kasih karunie Tuhente Yesus Kristus munyertai rohmu sudere-sudere! Amin.