Ibrani 1

Allah befirman urum perantaraen Anak-É 1:1-4

Nge mari Allah mupepienen befirman i jemen pudaha ku bèwèné muyang datunte urum bebagé cara mulalui nabi-nabi,

2 i jemen akhir ni Wé befirman ku kite urum perantaraen Anak-É si nge itetapen sebagé si berhak munerime bèwèné si ara. Mulalui Wé Allah nge mujadinen alam semesta.

3 Wéle caya kemulieen Allah den gamar Allah si teridah den munupang bèwèné si ara urum firman-É si bekuasa. Den nge mari Wé munaranen penyucinen dosa, Wé kunul i semelah kuen Si Mahakul, i ton si atas;

4 gip lebih mulie ari malèkat-malèkat, dis lagu geral si ikarunienen ku Wé gib lebih jeroh ari geral  pakea.

Anak Allah lebih atas bidak malèkat 1:5-14

5 Kerna ku sahan ke i antara malèkat oya Wé pernah mumerin :

“Anak-Ku Ko! I lo ini

Aku nge mujadi Ama-Mu?”

den  “Aku malé mujadi Ama-É,

den Wé male mujadi Anak-Ku?”

6 Den ketike Wé mumai Anak-É si sulu bere ku denie, Wé mumerin:       “Bèwèné malèkat Allah turah munyemah Wé.”

7 Den tentang malèkat-malèkat-É Wé mumerin:

“Si munos malèkat-malèkat-É mujadi badé den pelayan-pelayan-É mujadi rara.”

8 Tetapé tentang Anak Wé mumerin: “Tahta-Mu ya Allah, tetap ara selamaé; den tikon kerejeen-Mu oyale tikon keadilen.

9 Ko mungenaki keadilen den Ko begeli até kin kejahaten; oyale sebebpé Allah nge mungurapi Ko urum minyak sebagé tene kenak naté, mulebihi pong-pong-Mu.

10 Den: “Tuhen, Kole si ari pemulené munobonen dasar bumi den langit oyale penosen ni pumu-Mu.

11 Bèwèné oya malé benasa, tetapé Ko tetap ara, den bèwèné oya malé mujadi tue lagu pekayan;

12 lagu upuh ules malé igulungen Ko pakea, den lagu upuh baju bèwèné oya malé iubah, tetapé Ko tetap dis, den tun-Mu gere malé beakhir.”

 13 Den ku sahan ke i antara malèkat oya Wé pernah mumerin :

“Kunulle  i semelah kuen-Ku, sawah Kutos musuh-Mu mujadi tumpuen  ni kiding-Mu?”

14 Gere ke pakea bèwèné oyale roh si mulayani, si iutus kin mulayani pakea si malé mudepet keselamaten?