Ibrani 10

Pesemahen si semperne 10:1-18

I was hukum Taurat, kite munempui bayangen pelin we ari keselamaten si malé gèh, den nume hakiket ari keselamaten oya kendiri. Kerna oya urum kerben si dis, si setiep tun dor ipesemahen, hukum Taurat gere mungkin munos jema si munuet bagin i wasé mujadi semperne.

2 Sebeb ike hal oya mungkin, pasti jema gere né mupesemahen kerben, sebeb pakea nge kudus kin selamaé den pakea gere né munempui perasaen besalah.       

3 Tetapé justru mulalui kerben-kerben oya setiep tun jema iingeten tentang dosa oya ara.

4 Sebeb gere mungkin rayoh lemu rawan atawa rayoh bebiri rawan munapusen dosa.

5 Kerna oya ketike Kristus mayo ku wan denie, Wé mumerin:

“Kerben  den pesemahen

gere ikenaki Ko

- tetapé Ko nge munyedienen beden bagi-Ku-.

6 Ko gere bekenak kin kerben siuten urum kerben kin munapusen dosa.

7 Renye Aku becerak:

Èngonle, Aku gèh;

i was gulungen Kiteb ara itulis tentang Aku kin mubueten kenak-Mu, ya Allah-Ku.”

8 I atas Wé nge mumerin : “Kerben den pesemahen, kerben siuten den  penapus dosa gere ikenaki Ko den Ko gere bekenak kin oya” - bier pé ipesemahen munurut hukum Taurat -.

9 Den renye ken-É: “Èngonle, Aku gèh kin mubueten kenak-Mu.” Si pemulen ihapusen-É, kati mubangun si kedue.

10 Den kerna kenak-É inile kite nge ikudusen seger kin selamaé mulalui pesemahen beden Yesus Kristus.

11 Selanyuté setiep imem mubuaten pelayanené jep-jep lo den mupesemahen kerben si dis muulang-ulang si sebetulé gere lepas munapusen dosa.

12 Tetapé Kristus nge mupesemahen sara kerben pelin we kerna dosa, Wé kunul kin selamaé i semelah kuen ni Allah,

13 den besilo Wé taring munantinen saaté, waktu musuh-musuh-É ijadinen lapik ni kiding-É.

14 Jadi urum sara kerben pelin Wé menyempernenen pakea si ikudusen-É kin selamaé.

15 Den tentang hal oya Roh Kudus pé munosah kesaksien ku kite,

16 sebeb mari Wé mumerin:

“Inile pejanyinen si malé

Kuaranen urum pakea

nge mari masa oya,”

Tuhen pé mumerin: “Aku malé munobon  hukum-Ku

i was até ni pakea

den munulisené wan akal budi  pakea.

17 den Aku gere né  muninget dosa-dosa

den salah ni pakea.”

18 Jadi ike kin bèwèné oya ara pengampunen, tentu gere né perlu ipesemahen kerben kerna dosa.

Ketekunen 10:19-39

19 Jadi, sudere-sudere, urum rayoh Yesus kite besilo engkip keberanien nguk mayo ku ton kudus,

20 kerna Wé nge munuke dené si ayu si munosah murip kin kite, mulalui tire oyale diri-É kendiri.

21 Den kite munempui sara Imem Kul sebagé si bekuasa atas umah Allah.

22 Kerna oya entahle kite muhedep Allah urum até si tulus ikhlas den urum imen kerna até kite nge ibersihen ari até nurani si jahat den beden te ibasuh urum wih si bersih.

23 Entahle kite teguh beramat ku pengakuen tentang harapen te urum gere bimang, sebeb Wé si bejanyi oya setie.

24 Den entahle kite saling muperatinen kati kite saling mubangkiten  semangat i was mungasihi den was pebueten si jeroh.

25 Entile kite mugipen diri ari ibadah waktu kite mukamul lagu ibiesenen pepien ni jema, tetapé entahle kite saling munasèhati den makin rajin mubuetené sebeb lo Tuhen nge rap.

26 Sebeb ike kite urum sengeje mubueten dosa nge mari kite mubetihi kebenaran, gere ara né  kerben kin munapus dosa oya.

27 tetapé si ara kin kite oyale malé muhedep pengadilen ni Allah den rara si dahsyat si munyiuten bèwèné jema si mulewen Wé.   

28 Ike ara jema si gere munerime hukum Musa, wé ihukum maté urum gere ara ampun atas keterangen roa atawa tulu jema saksi.

29 Kune lebih bereté ukumen si turah ituhen ku wé, si mumerjak-merjak Anak Allah, si muanggap najis royoh pejanyin si mungudusené den si muhine Roh si munosah kasih karunie .

30 Sebeb kite mubetihi Wé si becerak:

“Pembelesen oyale hak-Ku.

Aku le si malé mununtut pembelesen.”

Den ara ilen:

“Tuhen malé muhakimi

umet-É.”

31 Olok ngeri, ike metuh ku was pumu ni Allah si murip.

32 Ingetle si terjadi masa lalu mari kam munerime terang, delé ari kam muderite entap kam betehen was perjuangan si beret,

33 waktu kam ijadinen tontonen ari penghineen i arap ni umum, den waktu kam mumihak  pakea si mungalami hal oya.

34 Memang kam nge turut munuet bagien was penderiteen jema si ipenjerenen den kam rela waktu reta ni kam irebut, sebeb betih kam, bahwa kam munempui reta si lebih jeroh den si kekal.

35 Kerna oya entile kam munaringen kepercayaenmu, sebeb kul upah simunantiné.

36 Sebeb kam mumerlunen ketekunen, kati nge mari kam mubueten kenak Allah, kam munerime hana si ijanyinen oya.

37 ”Sebeb tikik mi we, bahkan tikik pedéh waktué Wé malé gèh den gere munundaé.

38 Tetapé umet-Ku si benar malé murip entap imen, den ike wé mungunuren diri, Aku gere bekenak ku wé.”

39 Tetapé kite numele jema si mungunuren diri den benasa, tetapé jema si percaya den menerime murip.