Ibrani 11

Saksi-saksi imen 11:1-40

Imen oyale dasar ari segele sesanah si kite harapen den keyakinen tentang hal si gere kite èngon.

2 Sebeb kerna imenle Allah bekenak ku muyang datunte.

3 Kerna imen kite mungerti, bahwa alam semesta nge ijadinen mulalui firman Allah, jadi ,sana si lepas  ièngon nge terjadi ari sana si gere lepas kite èngon.

4 Kerna imen Habel nge mupesemahen ku Allah kerben si lebih jeroh bidak kerben ni Kain. Kerna imené a Allah bekenak kin pesemahené , den kerna imené wé becerak ilen nge mari wé benasa.

5 Kerna imen Henokh mutatang ku serge, kati wé gere murasanen  kebenasanen, den wé gere idemunen,kerna Allah nge munatangé. Sebeb sebelem wé itatang, nge ara kesaksien tentang wé bahwa wé bekenak i arap Allah.

6 Tetapé tanpa imen gere mungkin jema bekenak ku Allah. Sebeb barik sahan muhedep Allah wé turah percaya bahwa Allah ara, den bahwa Allah munosah upah ku jema si besunguh mungenal Wé.

7 Entap imen, Nuh pé kerna isederen Allah tentang hal si malé terjadi, den taat ku Allah sehinge wé munos sara perau kul kin munyelamaten keluargaé; den kerna imené a wé muhukum denie den wé inyatanen benar kerna imené.

8 Kerna imen Abraham taat, ketike wé italu kin berangkat ku negeri si malé iterimeé mujadi warisané, renye wé berangkat urum gere mubetihi ton si itujuié

9 Kerna imen wé taring i tanoh si ijanyinen oya lagu taring i tanoh asing den i oné wé taring i kemah urum Isak den Yakup si turut mujadi ahli waris janyi si sara oya.

10 Sebeb wé munanti-nantinen kute si munempui dasar si irencananen den ibangun Allah.

11 Kerna imen wé pé urum Sara mudepet kekueten kin munempui anak kumpu bier pé umuré nge liwet, kerna wé muanggap Wé si munosanen janyi oya setie.

12 Oyale sebebpé ari sara jema, bahkan jema si nge maté pucuk gèh sara keturunen si delé lagu bintang i langit den lagu one i geniring ni lut si gere teritung deléwé.

13 I was imen pakea  bèwènè nge maté sebagé jema si gere munerime sana si ijanyinen oya, tetapé si ari gip pelin munèngoné, sire mungaku bahwa pakea oyale jema asing den si munumpang i wan denie ni.

14 Sebeb pakea si mumerin lagu noya munyederen, bahwa pakea urum denem mungenal sara negeri.

15 Numele negeri si nge itaringen pakea oya si ipikiri pakea, sebeb ike lagu noya delé kesempaten kin pakea lepas ulak ku oné.

16 Tetapé besilo pakea denem tanah air sergewi. Sebeb oya Allah gere kemél italu Allah ni pakea, kerna Wé nge munyiepen sara kute kin pakea.

17 Kerna imen ketike Abraham iuji, wé mupesemahen Isak. Wé si nge munerime janyi oya rela mupesemahen anaké si tungel,

18 bier pé ku wé nge iperinen: “Keturunen si asalé ari Isakle si malé isebut keturunenmu.”

19 Kerna wé bepikir, bahwa Allah bekuasa mubangkiten jema seger pé ari antara jema maté. Den ari oné seakan wé nge munerime Isak ulak.

20 Kerna imen, Isak sesire mumanang gip ku arap, munosahen berkaté ku Yakup den Esau.

21 Kerna imen, Yakup ketike malé sawah waktué benasa, muberkati roané anak ni Yusup, renye munyemah sire beséré ku ulu ni tikoné.

22 Kerna imen, Yusup waktu wé malé benasa munyederen tentang tangkuhé urang Israel den munosah manat tentang tulené.

23 Kerna imen, Musa nge mari wé lahir, ituninen jema tueé selama tulu bulen, kerna pakea munèngon bahwa anak a belangi rupeé den pakea gere terih kin perintah reje.

24 Kerna imen, Musa waktu wé nge kul, gere mera isebut anak puteri Piraun,

25 kerna wé lebih mera muderite sengsara urum umet Allah bidak kin sekejep waktu murasai kesenangen ari dosa.

26 Wé muanggap penghineen kerna Kristus sebagé kekayaen si lebih kul ari

bèwèné reta i Mesir, sebeb wé mungarahen panangené ku upah.

27 Kerna imen, wé nge munaringen Mesir urum gere terih kin murke ni reje. Wé betehen dis lagu wé munèngon hana si gere telas.

28 Kerna imen, wé munaranen Paskah den munyempiren rayoh, kati penunuh kekanak sulu bere enti mujontok pakea.

29 Kerna imen pakea nge muliweti lut Ilang dis lagu muliweti tanoh kering, pedahal urang Mesir mutelnom wan wih, waktu pakea munyube muliwetié.

30 Kerna imen, benteng Yerikho runtuh, nge mari kute a iringkeli pitu lo lememé.

31 Kerna imen, Rahab, banan sundal oya gere turut benasa murum urum jema durhaka, kerna wé nge munerime pengintai-pengintai oya urum jeroh.

32 Den hana ilen si turah kuperinen, sebeb aku malé kekurangen waktu ike aku malé munyederen tentang Gideon, Barak, Simson, Yefta, Daud, den Samuel, den nabi-nabi,

33 si kerna imen nge munakluken kerejeen-kerejeen, mungamalen kebenaran, munerime sana si ijanyinen, munutup awah ni kule,

34 munempoten rara si dahsyat, pakea nge luah ari pedang, nge mudemu kekueten i was kelemahen, nge mujadi kuet i was peperangen den nge mugues munur pasuken tentara asing.

35 Delé ine nge munerime ulak anggota keluargaé si nge benasa kerna ibangkiten. Tetapé jema lèn mudaténen dirié isikse den gere mera iluahen, kati pakea mudepet kebangkiten si lebih jeroh.

36 Ara mien pé si iololi, idere, iikot urum ranté den iayonen ku wan penjere;

37  igeralungi, igergaji, iunuh urum pedang, idedik urum mumaké  baju kulit bebiri den kulit kaming, sire muderite kekurangen, kesesaken den sikseen.

38 Denie ni gere layak kin pakea. Pakea beluh ku ton-ton i padang gurun, ku bur den ku gue-gue den luang-luang i tanoh.

39 Den pakea bèwèné gere mudepet sana si ijanyinen oya, seger pé pakea nge terpuji entap ni imené.

40 Sebeb Allah nge munyedienen sesanah si lebih jeroh kin kite; rencana Allah oyale bahwa tanpa kite pakea gere lepas mujadi semperne.