Ibrani 12

Nasèhat kati betekun i was imen 12:1-17

Kerna kite munempui delé saksi, lagu emun si muringkeli kite, entahle kite muluahen bèwèné beben den dosa si olok muhalangi kite den belomba urum tekun wan pelombaen si iwajiben kin kite.

2 Entah mi kite mubuetené urum mata si tetuju ku Yesus, si mumimpin imen te den si munemah imente a ku kesemperneen, si gere muniroi Wé ihine tetapé tekun munarang salib, si se ni kunul i semelah kuen takhta ni Allah.

3 Ingetle Wé sabé, si tekun muhedepi jema bedosa si olok mulewen Wé, kati kam enti mujadi lemah den putus asa.

4 Wan pejuangen ni kam mulewen dosa, gere ilen sawah mamur rayohmu.

5 Den gere né inget ke kam tentang nasèhat si mumerin ku kam lagu ku kekanak:

“Woi anakku, entile anggap enteng penejeren ni Tuhen,

den entile tawar até ike ko itegor-É;

6 kerna Tuhen munegor jema si ikasihi-É

den mudere jema si iakui-É sebagé anak.”

7 Ukumen si iderite kam a oyale penejeren; Allah mubuaten ku kam dis lagu si ibueten-É ku anak-anak-É. Isihen ke ara anak si gere iejeri amaé?

8 Tetapé, ike kam gere kona dere si turah iderite setiep jema berarti kam numele anak, tetapé anak si gere muama.

9 Selanyuté: ari amante secara jasmani kite kona dere, den kite muhormati pakea; ike lagu noya gere ke kite turah lebih taat ku Ama segele roh, kati kite nguk murip?

10 Sebeb pakea mudidik kite wan waktu si singket sesué urum sana si ianggap pakea jeroh, tetapé Allah muhejer kite kati kite jeroh den mudepet bagien wan kekudusen-É.

11 Memang tiep ukumen i waktu iosanen gere mugèhen sukacité tapé kesedihen. Tetapé renye hal oya muhasilen kebenaran si munosah damé kin kite si nge munerimeé.

12 Sebeb oya kuetenle pumu si lemah den uku si goyah,

13 den lurusenle dené kin kidingmu, sehinge si mudèngkoh enti museltu, tetapé mujadi jeger.

14 Berusahale murip damé urum bèwèné jema den dedikle kekudusen, sebeb tanpa kekudusen gere sara jema pé malé munèngon Tuhen.

15 Jegele kati enti ara sara jema pé si mugipen dirié ari kasih karunie Allah, kati enti timul uyet si pit si mugèhen kekiruhen den mucemaren delé jema.

16 Entile ara jema si mujadi cabul atawa si munempui nepsu si renah lagu Esau, si mujuel haké sebagé anak sulu bere kin sepingen pemanganan.

17 Sebeb betih kam, bahwa mari oya, ketike wé malé munerime berkat oya, wé gere iterime, sebeb wé gere mudepet kesempaten kin munetahi kesalahené, seger pé  wé mungenalé urum luh mata.

Tangung jeweb si beret 12:18-29

18 Sebeb kam gere gèh ku sara bur si nguk iamat den si milang raraé den ku kegelepen urum kuyu badé,

19 ku ling ni sangkakala, den ling si mumerin den si munos jema si mumengéé muniro kati enti né pakea mumengéé,

20 sebeb pakea gere tehen mumengé perintah ini: “Bahkan ike benatang pé si mujontok bur a wé turah igeralungi urum atu.”

21 Den olok ngeri kejadien oya, sehinge Musa mumerin: “Aku olok keterihen den olok mugegir.”

22 Tetapé kam nge gèh ku Bur Sion, ku kute Allah si murip, Yerusalem sergewi den urum muribu-ribu malèkat, sara perkumpulen si meriah,

23 den ku jemaat anak-anak sulu bere ni Allah si geralé nge tedaptar i serge, den ku Allah, si muhakimi bèwèné jema, den ku roh-roh jema benar si nge mujadi semperne,

24 den ku Yesus, Pengantara pejanyinen ayu, den ku sempiren ni rayoh si  becerak lebih kuet bidak rayoh ni Habel.     

25 Jegele kati enti kam gere munerime Wé si becerak oya. Sebeb ike pakea si gere munerime Wé si becerak i Bur Sion gere luah ari ukumen, lebih mien kite, ike kite mubalik ari Wé si becerak ari serge.

26 Waktu oya ling-É muguncangen bumi, tetapé besilo Wé munosanen janyi: “Seger mi puren Aku malé muguncangen nume bumi pelin we melènen langit pé.”

27 Ucepen “Seger mi puren” munilok ku perubahen tentang sana si nguk iguncangen, kerna oya ijadinen kati si tetap taring oyale  si gere nguk iguncangen.

28 Jadi, kerna kite munerime kerejeen si gere lepas iguncangen, entahle kite mungucep sukur den beribadah ku Allah munurut cara si bekenak ku Wé, urum hormat den terih.

29 Sebeb Allah te oyale rara si mubenasanen.