Ibrani 13

Nasèhat den doà selamat 13:1-25

Tetaple kam saling mungasihi sebagé sudere i was Kristus.

2 Ingetle munosah tumpangen kin jema, sebeb urum bebuet lagu noya pepien ni jema nge mujamu malèkat-malèkat urum gere ibetihié.

3 Ingetle jema-jema hukumen, kerna kam kendiri pé oyale jema hukumen. Den ingetle jema-jema si ianiaya seakan kam pé murasanen kesengsaraen ni pakea.

4 Kenaké kam bèwèné engkip hormat terhedep hal betempat, den entile kam mucemaren ton nomé, sebeb jema cabul den pejine malé ihakimi Allah.

5 Entile kam mujadi hamba sèn, den genapenle dirimu urum sana si ara i kam. Sebeb Allah nge mumerin: “Selo mungkin aku mudaténen  ko den selo mungkin aku munaringen ko.”

6 Sebeb oya urum yakin kita lepas mumerin:

“Tuhen oyale penulungku.

Aku gere malé terih.

Hana ke lepas ibueten

manusie terhedep aku?”

7 Ingetle pemimpin-pemimpinmu, si nge munyawahen peceraken ni Allah ku kam. Peratinenle akhir murip ni pakea den contole imen ni pakea.

8 Yesus Kristus gere berubah, bier pé mane, serloni den sawah selamaé.

9 Entile kam isesaten bebagé ejeren asing. Sebeb si jeroh oyale, kuetenle imenmu urum kasih karunie den nume urum bebagé pemanganan si gere munosah paedah kin jema si munuruti peraturen pemanganan si lagu noya.

10 Kite munempui sara ton kerben den jema si mulayani kemah gere nguk mangan ari sana si ara i wasé.

11 Kerna beden benatang si rayohé imai Imem Kul mayo ku ton kudus sebagé kerben munapus dosa, isiut ideret perkèmahen.

12 Oyale sebebpé Yesus nge muderite i deret pintu gerbang kin mungudusen umet-É urum rayoh-É kendiri.

13 Kerna oya entahle kite beluh ku Wé ku deret perkemahen den munangung kehineen-É.

14 Sebeb i sien kite gere munempui ton taring si tetap; kite mungenal kute si malé gèh .

15 Sebeb oya entahle kite, mulalui Wé, dor mupesemahen kerben sukur ku Allah, oyale ucepen bibir si mumulienen geral-É.

16 Den ingetle mubueten si jeroh den munosah bantuen, sebeb Allah bekenak ku kerben si lagu noya.

17 Taatile pemimpin-pemimpinmu den patuhle ku pakea, sebeb pakea bejege -jege  atas jiwemu,  sebagé jema si turah betangung jeweb atasé, kati pakea mubuetené urum galak naté nume urum sedih naté, sebeb hal oya gere munemah keuntungen bagimu.

18 Bedoàle dor kin kami; sebeb kami yakin, bahwa até nurani kami jeroh, kerna wan segele hal kami sabé mera mubueten sana si jeroh.

19 Den secara khusus aku munasèhati kam, kati kam mubuetené, sehinge aku lebih tir iulaken ku kam.

20 Den Allah damé sejahtera, si mulalui rayoh pejanyin si kekal nge mumai ulak ari antara jema benasa Gembala Agung segele bebiri, oyale Yesus, Tuhente,

21 kireé mulengkapi kam urum segele si jeroh kin mubueten kenak-É, den mubueten i was kite sana si bekenak ku Wé, mulalui Yesus Kristus. Bagi Wé le kemulieen sawah selamaé.

22 Den aku munasèhati kam sudere-sudere, kati nasèhat ini iterime kam urum rela até, bier pé suretku ini singket we.

23 Betihile, bahwa Timotius, sudere te, nge berangkat. Tir nge mari wé gèh, aku malé munentongi kam murum urum wé.

24 Sawahen salam ku bèwèné pemimpin ni kam den bèwèné jema kudus. Terimele salam ari sudera-sudera i Italia.

25 Kasih karunie munyertai kam bèwèné.