Ibrani 2

Keselamaten si kul 2:1-4

Kerna oya kite turah lebih teliti muperatinen hana si nge kite pengé, kati kite enti manut imai arus.

2 Sebeb ike firman si iperin Allah urum perantaraen malèkat-malèkat tetap berlaku, den tiep kesalahen den kegeretaaten ara belesené si setimpal,

3 kune kite nguk luah,  ike kite munyie-nyienen keselamaten si kul oya, si pemulen ikeberen Tuhen, renye pakea si nge mumengéé munyawahené ku kite urum cara si nguk ipercayai

4 den Allah muneguhen kesaksien ni pakea urum tene-tene den mukjizat den urum bebagé penyataen kekuasaen,

karunie Roh Kudus si ibagi-bagin-É munurut kenak-É.

Yesus seketike lebih renah ari malèkat-malèkat 2:5-18

5 Sebeb nume kin malèkat-malèkat nge itakluken-É denie si malé gèh, si kite ceraken ni.

6 Ara jema si pernah munosah kesaksien i was kiteb suci, kené: “Hana ke manusie, sehinge Ko muningeté, atawa anak manusie sehinge Ko muperatinené?

7 Tape Ko nge munosé kin waktu si singket tikik lebih renah ari malèkat-malèkat den nge mumahkotaié urum kemulieen den hormat,

8 segele sesanah nge itakluken i tuyuh kiding-É.” I wan munakluken segele sesanah ku Wé, gere ara sara pé si ikecualinen-É, si gere takluk ku Wé. Tetapé besilo ni gere ilen kite èngon, bahwa segele sesanah nge itakluken ku Wé.

9 Tetapé Wé, si kin waktu si singket itos tikik lebih renah ari malèkat-malèkat, oyale Yesus, kite èngon, si imahkotai urum kemulieen den hormat entap ni sengsara maut si iderite-E, sehinge urum anugerah Allah Wé murasai maut kerna bèwèné manusie.

10 Sebeb nge patut bagi Allah, - si mulalui Wé den bagi Wé  segele sesanah ijadinen -kati Wé  mumai delé jema ku kemulieen, den munos Yesus, Penyelamat pakea, semperne mulalui penderiteen.

11 Sebeb Wé si mungudusen den pakea si ikudusen, pakea bèwèné asalé ari Sara; oyale sebebpé Wé gere kemél munyebut pakea sudere,

12 kené:

“Aku malé munyederen geral-Mu ku sudere-sudere-Ku, den mumuji- muji Ko i lelah ni jemaat,”

13 Ara mien :

“Aku malé munobon kepercayaen ku Wé,” 

ara ilen :

“Sesunguhé inile Aku den anak-anak si nge iosahen Allah ku Aku.”

14 Sebeb anak-anak a oyale anak-anak ari rayoh den usi, kerna oya Wé pé mujadi dis urum pakea, munuet bagin wan keadaen pakea, kati mulalui kematén-É Wé mubenasanen  wé oyale Belis, si bekuasa atas maut.

15 Den kati urum cara lagu noya Wé mubèbasen pakea si seumur muripé ara i was perhambaan ari kerna terihé ku maut.

16 Sebeb sesunguhé nume malèkat-malèkat si itulung-É, tetapé keturunen Abrahamle si itulung-É.

17 Oyale sebebpé,wan segele hal Wé turah idisen urum sudere-sudere-É, kati Wé mujadi Imem Kul si munosah belas kasihan den setie ku Allah gune mudaménen dosa bèwèné bengsa.

18 Sebeb entap Wé kendiri nge muderite penyubeen, Wé pé lepas munulung pakea si icubei.