Ibrani 3

Yesus lebih atas ari Musa 3:1-6

Sebeb oya, sudere-sudere si kudus, si nge ipilih Allah, panangle ku Rasul den Imem Kul, si kite akui, oyale Yesus,

2 si setie ku Wé si nge munetapen-É, lagu Musa pé setie i was seluruh umah ni Allah.

3 Yesus layak munerime kemulieen lebih kul ari Musa. Dis lagu ahli

bangunen lebih ihormati ari umah si ibanguné.

4 Sebeb setiep umah ibangun sara ahli bangunen, tetapé ahli bangunen segele sesanah oyale Allah.

5 Den Musa memang setie i was seluruh umah Allah sebagé pelayan kin munosah kesaksien tentang hana si malé ikeberen  puren.

6 Tetapé Kristus setie sebagé Anak si bekuasa atas umah Allah; den kitele umah-É, ike kite sawah ku akhiré teguh beramat ku kepercayaen urum pengharapen si kite megahen.

Benasa kerna murtad 3:7-19

7 Sebeb oya, lagu si iperinen Roh Kudus:

“I lo ini, ike kam mumengé ling-É,

8 entile kerasen atému lagu tengaha waktu kam gere taat i padang gurun den waktu kam munuji Allah.

9 I oné muyang datumu munyubei Aku urum cara munuji Aku, seger pé pakea munèngon pebueten-pebueten-Ku opat puluh tun moketé.

10 Oyale sebebpé Aku murke ku angkatan oya nye becerak:

Até ni pakea dor sesat, den pakea gere mubetihi jelen-Ku, 

11 sehinge Aku besumpah was murke-Ku:

Pakea gere malé mayo ku ton peteduhen-Ku.”

12 Jege-jegele sudere-sudere, kati i antara ni kam enti ara sara pé si atéwé jahat den si gere percaya entap wé murtad ari Allah si murip.

13 Tetapé nasèhatile sara urum si lèn jep lo, waktu nguk ilen iperinen: “serloni”, kati enti ara i antara kam si mujadi ukang atéwé kerna tipu daya dosa.

14 Kerna kite nge mudepet bagien i wan Kristus, ike kite teguh beramat ku keyakinen te si pemulo sawah  ku akhiré.

15 Kiteb Suci mumerin:

“I lo ini, ike kam mumengé ling-É, entile kerasen atému lagu muyang datumu gere taat, mulewen Allah,”

16 sahan ke pakea si mubangkiten murke Allah bier pé pakea nge mumengé ling-É? Gere ke paké ni  jema si nge tangkuh ari Mesir i tuyuh pimpinen  Musa?

17 Den sahan ke si nge i murkei-É opat puluh tun mokoté? Gere ke pakea si bebuet dosa si mèté besempaken i padang gurun?

18 Den sahan ke si nge isumpahi-É, bahwa pakea gere malé mayo ku ton peteduhen-É? Gere ke pakea si gere taat?

19 Betale kite èngon, bahwa pakea gere nguk mayo entap kegerepercayaen ni pakea.