Ibrani 4

Lo peteduhen si isedienen Allah 4:1-13

Sebeb oya, jerohé kite bejege-jege, kati enti ara sara jema pé si ianggap taring bier pé janyi kin mayo ku wan peteduhen-É  ara ilen.

2 Kerna kin kite pé ikeberen keber kenak até lagu ku pakea. Pakea mumengé keber oya tapé gere mupaèdah kin pakea sebeb ketike pakea mumengéé pakea gere percaya.

3 Sebeb kite si berimen, malé mayo ku ton peteduhen lagu si nge iperin-É: “Sehinge Aku besumpah i was murke-

Ku: Pakea gere malé mayo ku ton peteduhen-Ku,” 

seger pé buet-É nge munge ari denie ijadinen.

4 Sebeb tentang lo kepitu ara tertulis i was Kiteb Suci: “Den Allah teduh i lo kepitu ari bèwèné buet-É.”

5 Ara ilen kite baca: “Pakea pasti gere mayo ku ton peteduhen-Ku.”

6 Jadi nge jelas, bahwa ara sejemlah jema malé mayo ku ton peteduhen oya. Tetapé pakea si lebih mulo munerime keber kenak até oya gere mayo kerna kegeretaaten ni pakea.

7 Sebeb oya Wé pé munetapen sara lo, oyale “serloni” , ketike Wé nge lagu oya mokoté befirman urum perantaraen Daud lagu iperin i atas:

“I lo ini, ike kam mumengé ling-É, entile kerasen atému!”

8 Sebeb sekireé Yosua nge mumai pakea mayo ku ton peteduhen,  pasti Allah gere malé becerak nge mari oya tentang lo si lèn.

9 Jadi tersedie ilen sara lo peteduhen, lo kepitu, bagi umat Allah.

10 Sebeb barik sahan nge mayo ku ton peteduhen-É, wé kendiri nge teduh ari bèwèné bueté, dis lagu Allah teduh ari buet-É.

11 Kerna oya jerohé kite berusaha kin mayo ku wan peteduhen oya, kati enti sara jema pé  metuh kerna mununung conto kegeretaaten oya.

12 Sebeb firman Allah murip den kuet den lebih tejem ari pedang bemata roa sihen pé; wé munisok olok relem sawah mumisahen jiwe urum roh, seni-seni urum utok ni tulen;  wé sangup mubédanen petimangen den niet aténte.

13 Den gere ara sara makhluk pé si tetuni i arap ni Allah, sebeb segele sesanah telas den muke i arap mata-É, si ku Wé kite turah munosah petangung jeweben.

Yesus sebagé Imem Kul 4:14-5:10

14 Kerna kite besilo munempui Imem Kul si Agung si nge muliweti bèwèné langit, oyale Yesus, Anak Allah, jerohé kite teguh beramat ku pengakuen imen te.

15 Sebeb Imem Kul si kite empui, numele imem kul si gere nguk turut murasanen kelemahen-kelemahen te, sebaliké dis urum kite, Wé nge icubei, tapé gere bebuet dosa.

16 Sebeb oya entah mi kite urum engkip keberanien mudekati takhta kasih karunie, kati kite munerime rahmat den mudepet kasih karunie kin mudemu petulungen te i waktué.