Ibrani 5

Sebeb setiep imem Kul si ipilih ari antara manusie, itetapen bagi manusie wan hubungen ni pakea urum Allah, kati wé mupesemahen pesemahen den kerben kerna dosa-dosa ni jema.

2 Wé turah lepas mungerti terhedep jema jahil den jema si sesat, sebeb wé kendiri pé engkip urum kelemahen;

3 entap oya wé wajib mupesemahen kerben kerna dosa, nume kin umat pelin we, tapé bagi dirié kendiri pé.

4 Den gere sara jema pé si munueten kehormaten oya kin dirié kendiri, melènen wé italu Allah kin tuges oya, lagu Harun.

5 Lagu oyale Kristus gere mumulienen diri-É kendiri urum mujadi Imem Kul, tetapé imulienen Allah si nge befirman ku Wé:     

“Anak-Ku Ko! Serloni Aku nge mujadi Ama-Mu”,

6 lagu iperin Kiteb Suci i was bagien si lèn:

“Kole Imem kin selama-lamaé, munurut peraturen Melkisedek.”

7 I was murip-É sebagé manusie Kristus nge mupesemahen doà den peniron urum ling keras den luh mata, ku Wé, si bekuasa munyelamaten Wé ari maut, den doà-É nge ikabulen entap ni kesaléhen-É.

8 Den bier pé Wé Anak, Wé nge belejer mujadi taat ari hana si nge iderite-É,

9 den nge mari Wé sawah ku kesemperneen Wé mujadi dasar keselamaten si kekal bagi bèwèné jema si taat ku Wé.

10 Den Wé italu Allah mujadi Imem Kul munurut peraturen Melkisedek.

Peringeten kati enti murtad 5:11-6:8

11 Tentang hal oya delé si turah kami perinen si nyanya kin ijelasen, kerna kam nge bengkep was hal mumengénen.

12 Sebeb bier pé kam, ipanang ari segi waktu, turahé kam nge mujadi  penejer, tetapé kam perlu ilen iejeren dasar-dasar ari penyataen Allah, den kam mumerlunen susu ilen, nume pemanganan teger.

13 Sebeb barik sahan mumerlunen susu ilen wé gere mumehemi tentang kebenaran, sebeb wé oyale kekanak kucak.

14 Tetapé pemanganan teger oyale kin jema kul, kerna wé munempui pancaindra si terlatih kin mubédanen si jeroh ari si jahat.