Ibrani 6

Sebeb oya entah le kite taringen penejeren pemulen ari ejeren tentang Kristus, den minah ku kesemperneen. Entile kite munulangi mien tentang dasar petobaten den tentang munaringen pebueten si sie-sie den imen ku Allah,

2 den penejeren tentang baptisen, den tentang munobonen pumu ku atas jema, den tentang jema bangkit ari kematénen , den ukumen si kekal.

3 Den oyale si malé kite bueten, ike Allah munijinené.

4 Sebeb jema si murtad gere mungkin ibimbing ulak. Pakea si pernah iterangi atéwé, pernah murasanen karunie sergewi, den pernah mudemu bagien i was Roh Kusus,

5 den si mubetihi ari pengalamen pakea bahwa firman Allah oya jeroh, den pakea nge murasanen karunie-karunie ari jemen si malé gèh.

6 Tetapé nge mari oya pakea murtad! Selo mungkin mubimbing pakea kin betobat mien ari dosa-dosa ni pakea. Sebeb pakea munyaliben mien Anak Allah  bagi diri ni pakea den muhine Wé i arap ni umum.

7 Sebeb tanoh si munisep wih uren si gati turun ku atasé, den si muhasilen senuen-senuen si begune bagi pakea si mubuetené munerime berkat ari Allah.

8 Tetapé ike tanoh oya muhasilen tamas murui den kerpe murui, tanoh a gere begune nye malé ikutuk Allah den berakhir urum penèlongen.

Beramat teguh ku pengharapen 6:9-20

9 Tetapé sudere-sudere si kukasihi, bier pé kami becerak lagu oya, kami yakin tentang kam bahwa kam munempui hal-hal si lebih jeroh, si ara hubungené urum keselamatenmu.

10 Sebeb Allah nume gere adil, sehinge Wé gere inget kin buetmu den kasihmu si ituruhen kam tehedep geral-É mulalui pelayanenmu ku jema-jema kudus si ibueten kam ilen sawah besilo ni.

11 Tetapé kenak kami, kati kam masing-masing munuruhen kesunguhen si dis, kin mujadinen pengharapen ni kam sara empu si pasti sawah ku akhiré,

12 kati kam enti mujadi bengkep, tetapé tunungle teleden ni jema si muwarisi janyi Allah kerna imen den seber.

13 Sebeb ketike Allah munosah janyi-É ku Abraham, Wé besumpah demi diri-É kendiri, kerna gere ara jema si lebih atas ari Wé,

14 ken-É: “Sesunguhé Aku malé muberkati ko urum berkat mukelimpahen, den munos ko olok delé.”

15 Abraham munantin urum seber den urum lagu oya wé mudepet hana si ijanyinen ku wé.

16 Sebeb manusie besumpah demi jema si lebih atas ari dirié den sumpah oya mujadi kekueten bagi wé den muakhiri bèwèné si munentang .

17 Allah nge munikot diri-É urum sumpah, kati pakea si munerime janyi-É lebih yakin bahwa Wé gere malé murubah rencana-É.

18 Roa hal ni gere berubah, Allah gere mungkin munyogahi janyi-É den sumpah-É. Sebeb oya kite si mungenal perlindungen i wan Allah, ikuaten kati beramat teguh ku pengharapen si ara i arap ni kite.

19 Pengharapen a oyale sauh si kuet den aman bagi jiwente, si nge ilabuhen sawah ku kuduk ni tire,

20 ku sihen Yesus nge mayo sebagé Perintis bagi kite, ketike Wé, munurut peraturen Melkisedek mujadi Imem Kul sawah selama-lamaé.