Ibrani 7

Kristus den Melkisedek 7:1-10

Sebeb Melkisedek oyale reje Salem den imem Allah si paling atas; wé beluh mudemui Abraham ketike Abraham ulak ari mungalahen reje-reje, den muberkati wé.

2 Den ku wé Abraham munosahen sepersepuluh ari segeleé. Munurut arti ni geralé Melkisedek oyale pemulen reje kebenaran,den reje Salem pé artié reje damé sejahtera.

3 Wé gere beama, gere beine, gere besilsilah, loé gere bemule den muripé gere beakhir, den kerna wé ijadinen dis urum Anak Allah, wé tetap mujadi imem sawah selama-lamaé.

4 Pehemile dum kulé jema oya, si ku wé Abraham, muyang datunte munosahen sepersepuluh ari bèwèné si paling jeroh ari si irebuté.

5 Den pakea ari anak-anak Lewi, si munerime jebeten imem, munerime tuges, munurut hukum Taurat, kin munuet sepesepuluh ari umat Israel, oyale ari sudere-sudere pakea, bier pé paké ni pé oyale keturunen Abraham.

6 Tetapé Melkisedek, si nume keturunen pakea, munerime sepesepuluh ari Abraham den muberkati wé, bier pé Abrahamle si munempui janyi.

7 Memang gere nguk isangkal, bahwa si lebih renahle iberkati si lebih atas.

8 Imem-imem si munerime pesepuluhen oyale manusie biese si i was sara  lo pasti benasa, tapé Kiteb Suci mumerin, bahwa Melkisedek murip selamaé.

9 Jadi ngukle iperin, bahwa urum perantaraen Abraham iueten pé sepesepuluh ari Lewi, si berhak munerime pesepuluhen.

10 Sebeb wé ara ilen i wan beden Abraham muyang datué, ketike Melkisedek  mudemu urum Abraham muyang datué a.

Kristus imem si lebih atas ari Harun 7:11-28

11 Kerna, sekireé imamat Lewi nge sawah kesemperneené gere perlu né imem si lèn. Tapé kerna keimamen Lewi gere semperne, perlu ara imem ari golongen si lèn, oyale munurut golongen imem Melkisedek si ijanyinen Allah den si gere ari golongen Harun.

12 Sebeb ike imamat berubah, tentu hukum Taurat oya pé berubah.

13 Sebeb Tuhen te, si i meksud i sien, oyale ari suku lèn, si ari suku ini gere pernah sara jema pé mulayani sebagé imem.

14 Sebeb nge ibetihi bèwèné jema, bahwa Tuhente asalé ari suku Yehuda. Den Musa gere pernah munyebut suku ini waktu wé mumerinen tentang imem-imem.

15 Nge mujadi jelas, bahwa itetapen sara imem si lèn munurut cara Melkisedek,

16 si mujadi imem nume bedasaran peraturen-peraturen manusie, tetapé bedasaran murip si gere nguk benasa.

17 Sebeb tentang Wé iosah kesaksien:

“Ko oyale Imem kin selama-lamaé, munurut peraturen Melkisedek.”

18 Urum lagu oya hukum pudaha gere belaku né, sebeb gere munempui kekueten den gere begune.

19 - sebeb hukum Taurat tikik pé gere munemah ku kesemperneen - tetapé besilo timul pengharapan si lebih jeroh, si mumai kite rap urum Allah.

20 Den dis lagu hal ini gere  terjadi  tanpa sumpah - memang pakea nge mujadi imem tanpa sumpah,

21 tetapi Yesus jadi imem urum sumpah, waktu Allah mumerin ku Wé:

“Tuhen nge besumpah den Wé gere munyesal :

Ko  imem kin selama-lamaé ”-

22 betale Yesus  jaminen ari sara pejanyin si lebih kuet.

23 Den wan jemlah si delé pakea nge mujadi imem, sebeb entap kematénen pakea gere nguk tetap betuges sebagé imem.

24 Tetapé, kerna Yesus tetap selama-lamae, imamat-É gere nguk mupinah ku jema lèn.

25 Kerna oya Wé sangup munyelamaten urum semperne bèwèné jema si mulalui Wé gèh ku Allah. Sebeb Wé murip sabé kin mujadi pengantara pakea.

26 Sebeb Imem Kul si lagu oyale si kite perlunen: oyale si kudus, gere besalah, gere benoda, si tepisah ari jema-jema bedosa, den lebih atas ari tingket-tingket serge,

27 gere lagu imem-imem kul lèn si jep lo turah mupesemahen kerben kin dosaé kendiri, den nge mari oya barole kin dosa ni umeté, sebeb hal oya nge ibueten-É seger we kin selama-lamaé, ketike Wé mupesemahen diri-É kendiri sebagé kerben.

28 Sebeb hukum Taurat munetapen jema-jema urum kelemahené mujadi imem kul, tetapé sumpah  si isawahen nge mari hukum Taurat, munetapen Anak, si nge semperne sawah selama-lamaé.