Ibrani 8

Imem Kul pejanyinen ayu 8:1-13

Inti ari bèwèné si nge kite ceraken a oyale, kite munempui Imem Kul si lagu oya, si kunul i semelah kuen takhta Si Mahakul i serge,

2 den si mulayani ibadah i ton si kudus, oyale kemah si asli si isesuken Tuhen den nume manusie.

3 Sebeb setiep Imem Kul itetapen kin mupesemahen kerben urum pesemahenen den kerna oya Yesus perlu munempui sesanah kin ipesemahen.

4 Sekireé Wé i bumi ini, tentu Wé gere malé mujadi imem, kerna i sien nge ara jema-jema si mupesemahen pesemahen munurut hukum Taurat.

5 Pelayanen pakea oyale gamaren den bayangen ari hana si ara i serge, dis lagu si nge isederen ku Musa, waktu wé malé munos kemah oya: “Peratinenle kati ko munosé munurut conto si nge ituruhen ku ko i atas bur oya.”

6 Tetapé besilo Yesus mudepet tuges imem si gip lebih agung, kerna Wé mujadi pengantara ari pejanyinen si lebih mulie, si idasaran ari janyi si lebih atas.

7 Sebeb sekireé pejanyinen si pemulen oya gere becacat, gere perlu né pejanyin si kedue.

8 Tetapé Allah nge mudemunen kesalahen ni umat-É, sehinge Wé mumerin:

“Sesunguhé malé gèh waktué,

“ lagu oyale firman Tuhen,

“Aku malé munaranen

Pejanyinen Ayu

urum urang Israel

den urum urang Yehuda;

9  nume lagu pejanyinen si

nge Kuaranen urum

muyang datu ni pakea,

i waktu Aku munamat

pumu pakea kin mumai pakea tangkuh ari negeri Mesir; sebeb pakea gere setie ku pejanyinen-Ku, den gere Kuterime pakea,” lagu oyale firman Tuhen.

10 ”Inile pejanyinen si Kuaranen urum urang Israel nge mari waktu oya,“ betale firman Tuhen.

“Aku malé munobonen hukum-Ku i was akal budi ni pakea den munulisené i was até ni pakea,

renye Aku malé mujadi Allah ni pakea den pakea malé mujadi umet-Ku.

11 Den pakea masing-masing gere  munejer né sesama wargaé atawa sesama sudereé urum mumerinen: Betihile  Tuhen!

Sebeb pakea bèwèné kul urum kucak malé mubetihi Aku.

12 Sebeb Aku malé munosah belas kasihen terhedep pakea

den gere né muninget dosa-dosa ni pakea.”

13 Kerna Wé mumerin tentang pejanyinen si ayu, Wé munyatanen pejanyinen si pemulen sebagé pejanyinen si nge mujadi tue. Den hana si nge mujadi tue den mokot oya malé berakhir.