Ibrani 9

Ton kudus i bumi urum i serge 9:1-10

Memang pejanyinen si pemulen pé munempui peraturen-peraturen kin ibadah den kin ton kudus si itos pumu manusie.

2 Sebeb sara kemah nge isiepen, si bagien paling arap i wasé ara ton ni lampu, den meja den ruti pesemahen, si igerali ton kudus.

3 Den i kuduk ni tire si kedue ara ilen sara kemah si isebut ton maha kudus.

4 I oné ara ton pedupen ari emas , peti pejanyinen si ibalut urum emas; i was peti pejanyinen oya ikemas sara ayan emas berisi manna, tikon ni Harun si pernah beceding den roa kerat atu si i atasé tertulis pejanyinen.

5 I atas peti pejanyinen a ara roa Kerub kemulieen oyale makhluk bekepék si mulongohi ton oya. Tetapé hal ni gere nguk kite ceraken besilo sara-sara.

6 Lagu oyale caraé ton si kudus oya iatur. Imem-imem dor mayo ku was kemah si paling arap oya kin mubueten ibadah pakea.

7 Tetapé ku was kemah si kedue oya imem kul pelin we si mayo seger wan sara tun, den turah munemah rayoh si ipesemahené kerna dirié kendiri den kerna kesalahen si ibueten umet oya.

8 Urum ini Roh Kudus munyatanen, bahwa dené ku ton maha kudus oya gere ilen muke, semokot kemah bagien arap oya ara ilen.

9 Oyale si mujadi sara kiesen masa besilo ni, artié bahwa pesemahen oya gere nguk munos até nurani jema si mupesemahené a semperne.

10 Sebeb bèwèné oya tentang pemanganan, minumen den bebagé cara pembasuhen pelin we, peraturen-peraturen lahiriah si ibueten sawah ku waktué Allah munaranen perubahan si ayu.

Kristus pengantara ari pejanyinen si ayu 9:11-28

11 Tetapé Kristus nge gèh sebagé Imem Kul kin hal-hal si jeroh si malé gèh: Wé nge muliweti kemah si lebih kul den lebih semperne, si nume ari manusie; artié si nume ari alam ini.

12 Den Wé nge mayo seger kin selama-lamaé ku was ton si kudus nume urum munemah rayoh bebiri rawan atawa rayoh anak lemu, tetapé urum munemah rayoh-E kendiri. Wé mayo seger ku ton si kudus den mubueten penebusen si kekal.

13 Sebeb ike rayoh bebiri rawan den rayoh lemu rawan den sempiren dul lemu mude mungudusen pakea si najis, sehinge pakea isucinen secara lahiriah,

14 betape lebih mien rayoh Kristus. Si ari Roh si kekal oya nge mupesemahen diri-É kendiri ku Allah urum gere becacat cela, malé munyucinen até nuraninte ari pebueten si munemah ku kematénen, kati kite nguk beribadah ku Allah si murip.

15 Oyale sebebpé Wé mujadi pengantara sara Pejanyinen si ayu, kati pakea si nge italu nguk munerime warisen si kekal si nge ijanyinen, sebeb Wé nge benasa kin munebus kesalahen si nge ibueten pejanyinen tue si pemulen.

16 Sebeb i sihen ara wasiet, i one turah ara isederen kebenasanen jema si muwasietené a.        

17 Kerna sara wasiet barole sah, ike jema si bewasiet a nge benasa, ike jema si munos wasiet oya murip ilen wasiet a gere berlaku.

18 Oyale sebebpé pejanyinen si pemulen gere isahen tanpa rayoh.

19 Sebeb nge mari Musa munyederen bèwèné perintah hukum Taurat ku bèwèné umet, wé munueten rayoh anak lemu urum rayoh bebiri rawan den wih, renye urum jangut ilang den kerpe hisop isempirne rayoh oya ku Kiteb Taurat den ku seluruh umet,

20 sesire mumerin : “Inile rayoh pejanyinen si itetapen Allah bagi kam.”

21 Urum cara si lagu oya pé Musa munyempiren kemah TUHEN urum bèwèné perkakas si igunen wan ibadah.

22 Den malé segele sesanah isucinen munurut hukum Taurat urum rayoh, den ike gere ara rayoh si ituangen gere ara pangampunen.

23 Kemah TUHEN si isucinen oya gamaren ari kemah si asli i serge. Jadi ike kemah deniewi turah isucinen urum cara lagu oya, tentu kemah si sesunguhé turah isucinen urum pesemahen si gip lebih mulie ari rayoh benatang.

24 Sebeb Kristus gere mayo ku wan ton kudus si itos manusie si oyale gamaren pelin ari si sebenaré, meksudé besilo ni Wé muhedep Allah kerna kepentingen te.

25 Den Wé gerele gati mayo mupesemahen diri-É kendiri, lagu imem kul setiep tun mayo ku was ton kudus urum rayoh si nume rayohé kendiri.

26 Sebeb ike lagu oya Kristus turah mulang-ulang muderite muloi denie ijadinen mi. Tetapé besilo Wé seger pelin we munyatanen diri-É, i jemen akhir kin munapusen dosa mulalui kerben-É.

27 Den dis lagu manusie itetapen kin benasa seger pelin we, den nge mari oya ihakimi,

28 lagu oya pé Kristus benasa seger pelin we sebagé kerben kin munangung bèwèné dosante. Ketike Wé gèh kedue kalié Wé gere né munangung dosa. I waktu oya Wé malé munganugerahen keselamaten ku pakea si munantinen-É