Kisah Rasul-Rasul 10

Petrus urum Kornelius 10:1-48

I Kaisarea ara sara jema si begeral Kornelius, wé perwira ari pasuken si igerali pasuken Italia,

2 wé jema si saleh, wé urum seisi umahé terih kin Allah den delé munosah sedekah ku jema-jema miskin, den sabé bedoà ku Allah.

3. I wan sara lo, kire-kire jem tige iyo, wan sara penèngonen, jelas teridah ku wé sara malèkat ni Allah mayo ku was ni umahé nye mumerin ku wé : “Kornelius!”

4 Wé mumanang malèkat oya nye urum terih mumerin : “Ara sana Tuhen?” Jeweb malèkat a : “Doà-doàmu urum sedekahmu ku jema miskin nge nik ku hedepen ni Allah dan Allah muninget ko.

5 Den besilo, kinile jema ku Yope kin murai jema si begeral Simon si italu Petrus.

6 Wé munumpang i umah ni jema pengolah kulit begeral Simon, umahé i geniring ni lut.”

7 Nge mari malèkat si becerak ku wé a beluh, italué roa jema temuluké urum sara prajurit si saleh ari antara jema-jema si sabé urum wé.

8 Den wé mujelasen bèwèné hal oya ku pakéa, nye ikinié pakéa ku Yope.

9 Lang loé, ketike tetulun ni pakéa tengah wan pejelenen den nge rap ku kute Yope, kire-kire jem due belas ruhul, nikle Petrus ku atas ni umah kin bedoà.

10 Wé murasa mulapé den kenakné mangan; tetapé waktu pemanganen tengah isiepen, wé mudepet sara penèngonen.

11 Ièngoné langit muke, den turunle bene lagu sara rilah upuh si kolak si mugeneng i opat sagié, iturunen ku tanoh.

12 I wasé ara segele jenis benatang si opat kiding, benatang si mujorol urum manuk-manuk juah.

13 Renyel ara ling si mumerin ku wé : “Uetle Petrus, gelihen renyel nye panganle!”

14 Tetapé iperin Petrus : “Enggih Tuhen, sebeb gere ilen pernah kupangan sesanah si gere ienguken urum najis.”

15 Ling a mumerin mien ku wé kin kedue kalié : “Sana si nge ienguken Allah, gere nguk iperin ko najis.”

16 Hal ini terjadi sawah tige kali den bene a mutatang renyel ku langit.

17 Waktu Petrus pekekune wan atéwé, sana die arti ni penèngonen si nge ièngoné a, jema-jema si ikini Kornelius nge mudemunen umah ni Simon den tengah sesuk i pintu gerbang.

18 Pakéa munalu jema nye mungune : “Ara ke jema si begeral Simon si igerali Petrus, beringi i sien?”

19 Ketike Petrus tengah bepikir tentang penèngonen a, iperin Roh : “Èngonle, ara tulu jema tengah mungenali ko.

20 Uetle nye turun renyel, berangkatle urum pakéa, enti ragu-ragu, sebeb Akule si mungini pakéa ku ini.”

21 Renyel turunle Petrus ku tuyuh nye iperiné ku jema-jema wa : “Akule si ikenali kam; hana sebebpé kam gèh ku ini?”

22 Iperin pakéa : “Kornelius perwira Romawi, jema si jeroh den terih kin Allah, den bèwèné urang Yahudi muhormatié, wé ikini sara malèkat si kudus kati mungundang reje ku umahé den mumengé sana si malé iperinen reje.”

23 Petrus mupesilenen pakéa mayo nye beringi i oné.

Lang loé  wé uet nye berangkat urum pakéa, den pepien ni ari sudere ari Yope munepongi wé.

24 Lang loné a mien pakéa sawah i Kaisarea; Kornelius tengah munantinen pakéa den wé nge munalu biak sudere urum sebet-sebeté mukamul.

25 Ketike Petrus mayo, gèhle Kornelius munyamuté nye sujut ikidingé munyemah wé.

26 Tetapé isesuken Petrus wé, kené : “Uet renyel, aku pé manusie biese we.”

27 Sesire becerak urum wé, Petrus mayo nye mudepeti delé jema nge mukamul.

28 Iperiné ku pakéa : “Nge ibetih kam, dum kerasé larangen kin urang Yahudi begaul atawa mayo ku wan umah ni jema si nume urang Yahudi; tetapé Allah nge munuruhen ku aku bahwa aku gere nguk mumerin sahan pé kotek atawa najis.

29 Oyale sebebpé gere beret aténgku gèh. Besilo aku mungune, hana sebebpé kam munalu aku?”

30 Jeweb Kornelius : “Opat lo si liwet, waktué lagu besilo ni, sekiter jem tige iyo, aku tengah bedoà i umahku, minter sesuk sara jema i arapku, pekayanné mukekilet,

31 kené : Kornelius, doàmu nge ipengén Allah den bantuenmu ku jema miskin nge iingeti i hedepen ni Allah.

32 Kinile jema ku Yope kin murai Simon si italu Petrus; wé munumpang i umah ni Simon, pengolah kulit, i geniring ni lut.

33 Seketike oya pé kukini jema ku reje, den urum galak ni até reje nge gèh. Besilo kami bèwèné nge ara i sien i hedepen ni Allah kin mumengé sana si nge iperintahen Allah ku reje.”

34 Renyel Petrus pé becerak, kené : “Sesunguhé aku nge mungerti, bahwa Allah gere mubèdanen jema,

35 tetapé setiep jema ari bengsa sihen pé si terih ku Allah den mubueten sana si benar iterime-É.

36 Oyale peceraken si isawahen Allah ku urang Israel, mungeberen damé sejahtera mulalui Yesus Kristus, Wéle Tuhen ni bèwèné jema.

37 Kam kendiri mubetihi sana si terjadi i seluruh Yudea, muloi ari Galilea mi nge mari baptisan si ikeberen Yohanes,

38 tentang Yesus ari Nazaret, kune Allah mungurapi Wé urum Roh Kudus den kuasa; Wé beluh ku sihen-sihen mubueten hal si jeroh nye mujegeren bèwèné jema si ikuasai Belis, sebeb Allah urum Wé.

39 Den kamile saksi ari segele sesanah si ibueten-É i tanoh Yudea atawa pé i Yerusalem; den pakéa nge mununuh Wé nye mugantungen-É i kayu salib.

40 Tetapé Allah mubangkiten Wé i lo ketige den kenak ni Allah Wé munuruhen diri-É,

41 nume ku bèwèné jema, tapé ku saksi-saksi, si sebelemé nge ipilih Allah, ku kami si nge mangan urum minum murum urum Wé, nge mari Wé bangkit ari kematénen.

42 Den Wé mumerintahen kami kin mungeberen ku jema delé den bersaksi

bahwa Wé le si itentunen Allah mujadi Hakim kin jema si murip urum si nge benasa.

43 Tentang Wéle bèwèné nabi besaksi bahwa barik sahan percaya ku Wé munerime pengampunen dosa i wan geral Yesus.“

Roh Kudus turun ku jema si nume urang Yahudi

44 Waktu Petrus tengah becerak ilen, turunle Roh Kudus ku atas ni bèwèné jema si mumengén peceraken oya.

45 Den bèwèné jema si percaya ari golongen besunet si munepongi Petrus olok pedéh hèran, kerna karunie Roh Kudus pé ituangen ku atas ni jema si nume urang Yahudi;

46 sebeb pakéa mumengé jema-jema wa becerak wan basa roh nye mumulienen Allah. Renyel iperin Petrus :

47 “Nguk ke jema mungoai kin mubaptis jema-jema ni urum wih, sedangen pakéa nge munerime Roh Kudus dis urum kite?”

48 Den wé mungini pakéa ibaptis wan geral ni Yesus Kristus. Renyel itiro pakéa kati Petrus taring pepien loi urum pakéa.