Kisah Rasul-Rasul 15

Sidang i Yerusalem 15: 1-21

Pepien ni jema gèh ari Yudea ku Antiokia nye munejeren ku sudere-sudere i oné : “Kecuali kam isunet munurut hukum Musa, kam gere lepas iselamaten.”

2 Paulus urum Barnabas olok munentang den mubantah pendepet ni pakéa. Aheré itetapen kati Paulus urum Barnabas, den pepien ni jema si lèn ari jemaat a beluh ku rasul-rasul urum penetue-penetue i Yerusalem kin mubicaranen masalah oya.

3 Pakéa ijule jemaat sawah ku deret ni kute, renyel pakéa remalan mulalui Fenisia urum Samaria, den i ton oya pakéa munyederen tentang petobaten ni bengsa-bengsa si lèn. Hal oya munegèhen galak ni até si kul kin sudere-sudere i oné.

4 Ketike pakéa tibe i Yerusalem, pakéa isamut jemaat, rasul-rasul, den penetue-penetue, renyel ilaporen pakéa bèwèné si nge ibueten Allah mulalui pakéa.

5 Tetapé pepien ni jema ari golongen Parisi si nge percaya sesuk, kené : “Pakéa si nume urang Yahudi turah isunet den iperintahen kin munuruti hukum Musa.”

6 Renyel rasul-rasul urum penetue-penetue mukamul kin munyeraken masalah oya.

7 Nge mokot betuker pikiren, sesukle Petrus nye iperiné ku pakéa : “Woi sudere-sudere, ibetihi kam bahwa nge ari awal Allah mumilih aku ari antara ni kam, kati mulalui awahku bengsa-bengsa si lèn mumengé Injil den pakéa percaya.

8 Den Allah, si mubetihi até ni manusie, nge munosah kesaksien ku pakéa, urum mungerunienen Roh Kudus ku pakéa dis lagu si nge ikarunien-É ku kite,

9  den Allah gere mubedanen kite urum pakéa, nge mari Wé munyucinen até ni pakéa entap ni pakéa percaya.

10 Jadi besilo, hana kati kam munyubei Allah urum mumarinen ku rongok ni murid-murid a sara igu, si gere lepas iarang muyang datunte atawa pé kite.

11 Sebaliké, kite percaya, bahwa kite iselamaten entap ni kasih karunie ni Tuhen Yesus; pakéa pé dis lagu noya.”

12 Den ongotle bèwèné jema si mukamul a, renyel pakéa mumengén Paulus urum Barnabas si munyederen tene ajaib urum mukjizet si nge ibueten Allah mulalui pakéa i lelah ni bengsa-bengsa si lèn.

13 Nge mari Paulus urum Barnabas selesé becerak, iperin Yakobus : “Woi sudere-sudere, pengén kamle aku :

14 Nge isederen Simon kune Allah munuruhen rahmat-É kin pertama kalié ku bengsa-bengsa si lèn, urum mumilih sara umet ari antara pakéa kin geral-É.

15 Hal oya sesué urum si iperinen nabi-nabi lagu si tertulis :

16 Nge mari ini, Aku malé ulak

nye mubangun mien

kemah ni Daud si nge

rubuh,

den reruntuhené malé

Kubangun den malé

Kukukuhen,

17 kati bèwèné jema si lèn

mungenali Tuhen

urum bèwèné bengsa si gere

mubetihi Tuhen

 si nge Kutalu kin

mujadi empung-Ku.

Betale peceraken ni Tuhen,

si mubueten bèwèné ni,

18 si nge ibetihi ari pudaha mi.

19 Entap ni oya, munurut pendepetku, kite enti munyanyanen jema ari bengsa-bengsa si lèn si mubalik ku Allah,

20 tetapé kite turah munulis suret ku pakéa, kati pakéa munegipen diri ari pemanganen si nge ipesemahen ku berhala-berhala, ari pencabulen, ari dengké benatang si nge maté icekek, den ari rayoh.

21 Sebeb ari jemen pudaha mi hukum Musa ikeberen i setiep kute, den sawah besilo hukum a ibacanen tiep-tiep lo Sabat i umah-umah ibedet.”

Suret ku urang percaya si nume  urang Yahudi 15: 22-34

22 Renyel rasul-rasul, penetue-penetue urum seluruh jemaat mumutusen kin mumilih ari antara ni pakéa pepien ni jema si malé iutus ku Antiokia murum urum Paulus den Barnabas. Pakéa mumilih Yudas, si igerali Barsabas urum Silas, roané jema tekemuke i antara ni sudere-sudere seimen.

23 Urum perantaraen ni pakéa ikirim suret, isié lagu ni ni : “Salam ari rasul-rasul urum penetue-penetue, ari sudere-suderemu ku sudere-sudere i Antiokia, Siria urum Kilikia si berasal ari bengsa-bengsa si lèn.

24 Kami nge mumengé bahwa ara pepien ni jema i antara ni kami, si gere kami utus, nge munyanyanen kam den mugangu pikiren ni kam urum ejeren ni pakéa.

25 Entap ni oya, kami nge sepakat kin mumilih nye munutus pepien ni jema ku kam murum urum Barnabas den Paulus si kami kasihi,

26 jema-jema si nge mupertaruhen nyawaé demi geral ni Tuhen kite Yesus Kristus.

27 Jadi kami nge munutus Yudas urum Silas kati pakéa munyawahen secara langsung manat si tertulis wan suret ni ku kam.

28 Sebeb keputusen ni Roh Kudus betapé keputusen ni kami, bahwa enti kam ibebeni mulebihi hal-hal si perlu ini :

29 Kam turah munegipen diri ari pemanganan si ipesemahen ku berhala, ari rayoh, ari dengké ni benatang si icekek, den ari pencabulen. Ike kam mujege dirimu ari hal-hal ini, kam bebuet jeroh, sekien, salam ari kami.”

30 Nge mari besinen, berangkatle pakéa ku Antiokia; i oné pakéa mungamulen jemaat nye munyerahen suret oya.

31 Nge mari mubaca suret a, jemaat besukacite entap nasehat wan suret a muhibur pakéa.

32 Yudas urum Silas, roané nabi, mokot munasèhati sudere-sudere a den mungueten até ni pakéa.

33 Den nge pepien waktu lememé pakéa i oné, sudere-sudere a muberangkaten pakéa urum damé kin ulak ku si munutus pakéa.

34 [Tetapé Silas mumutusen kin tetap taring i oné.]

35 Paulus urum Barnabas mokot taring i Antiokia. Pakéa murum urum delé jema si lèn munejer den mungeberen peceraken ni Tuhen.

Paulus urum Barnabas mupisah 15: 36-41

36 Pepien loi nge mari oya, iperin Paulus ku Barnabas : “Entah mi kite ulak mien munentongi sudere-sudere i setiep kute, i sihen kite nge mungeberen peceraken ni Tuhen, kin munèngon kune keadaen ni pakéa.”

37 Kenak ni Barnabas mumai Yohanes si igerali Markus;

38 tetapé kekire ni Paulus gere cocok mumai wé, si nge munaringen pakéa i

Pampilia, den gere beluh murum urum pakéa kin pebueten oya.

39 Entap ni oya, terjadile peselisihen si olok, sehinge pakéa mupisah sara urum si lèn, den Barnabas mumai Markus nye belayar ku Siprus.

40 Tetapé Paulus mumilih Silas, nge mari iserahen sudere-sudere a ku kasih karunie ni Tuhen

41 berangkatle wé muringkeli Siria urum Kilikia sesire mungueten imen ni jemaat-jemaat si ara i oné.