Kisah Rasul-Rasul 17

Paulus urum Silas i Tesalonika 17: 1-9

Paulus urum Silas mulanyuten pejelenen-É mulalui kute Ampipolis urum Apolonia nye tibe i Tesalonika. I oné ara umah ibedet ni urang Yahudi.

2 Lagu biese Paulus mayo ku umah ibedet a, den mutulun Sabat beturut-turut wé betuker pikiren urum pakéa tentang Kiteb Suci.

3 Wé mujelasen nye mubuktinen ku pakéa bahwa Kristus turah muderite nye bangkit ari kematénen, kené : “Yesus si kukeberen ku kam, Wéle Kristus oya.”

4 Pepien ni ari pakéa mujadi percaya nye begabung urum Paulus den Silas; betapé delé urang Yunani si terih ku Tuhen, den gere tikik jema-jema banan tekemuke.

5 Tetapé urang Yahudi mujadi cemburu, ikamulen pakéa pepien ni penjahat si ara i kedé, den pakéa mungaco kute a nye munyerbu umah ni Yason urum meksud mumai Paulus urum Silas ku arap ni jema delé.

6 Ketike gere idemunen pakéa Paulus urum Silas, pakéa munyaren Yason urum pepien ni sudere ku hedepen ni pejebet-pejebet ni kute sesire metuk, kené : “Jema-jema si mungaco seluruh denie nge gèh ku ini,

7 den Yason nge munerime pakéa i umahé. Bèwèné jema ni bertindak mulewen ketetapen ni Kaisar urum mumerin bahwa ara reje si lèn, geralé Yesus.”

8 Ketike jema delé urum pejebet-pejebet ni kute mumengé hal oya, pakéa mujadi gelisah.

9 Tetapé mari munerime sèn jaminen ari Yason urum ari sudere-sudere si lèn, pakéa pé iluahen.

Paulus urum Silas i Berea 17: 10-15

10 Den kelem lo oya pé, ikini sudere-sudere a renyel Paulus urum Silas berangkat ku Berea. Ketike sawah i oné, beluhle pakéa ku umah ibedet ni urang Yahudi.

11 Urang Yahudi i kute a lebih jeroh atéwé dibak urang Yahudi i Tesalonika, pakéa nge munerime peceraken ni Tuhen a urum galak ni atéwé den setiep lo pakéa munyelidiki Kiteb Suci kin mubuktinen sana si iperinen Paulus a benar.

12 Entap ni oya delé i antara ni pakéa si mujadi percaya; gere tikik jema-jema banan tekemuke betapé jema rawan Yunani.

13 Tetapé ketike urang Yahudi ari Tesalonika mubetihi bahwa i Berea pé nge ikeberen Paulus peceraken ni Allah, pakéa pé gèh ku oné mujalu urum mugangu jema delé.

14 Jadi ikini sudere-sudere a renyel Paulus berangkat munuju ku panté ni lut, tapé Silas urum Timotius tetap taring i Berea.

15 Den pakéa si munepongen Paulus, mujuleé sawah ku Atena, renyel pakéa ulak mien mumai manat ari Paulus kin Silas urum Timotius kati tir gèh ku wé.

Paulus i Atena 17: 16-34

16 Waktu Paulus tengah munantinen Silas urum Timotius i Atena, atéwé olok pedéh ues kerna ièngoné kute a engkip urum patung-patung berhala.

17 Entap ni oya i umah ibedet wé betuker pikiren urum urang Yahudi den jema si terih kin Allah, den setiep lo i kede urum jema-jema si idemuié i one.

18 Pepien ni ahli pikir ari golongen Epikuros urum Stoa pé besoal-jeweb urum wé, den ara si mumerin : “Sana si malé iperinen si kul cerak ini?” Tetapé si lèn a mumerin : “Nampaé wé mungeberen ejeren dewa-dewa asing.” Sebeb Paulus mungeberen Injil tentang Yesus urum tentang kebangkiten-É.

19 Renyel pakéa mumaié muhedep sidang Areopagus, kené : “Nguk ke kami betih ejeren ayu si sihen si iceraken ko ini?

20 Sebeb ko munyawahen hal-hal si genancing si gere ilen pernah kami pengé. Entap ni oya kami malé mubetihi, sana ke artié bèwèné ni.”

21 Arapé bèwèné urang Atena urum jema asing si taring i oné gere munempui waktu kin hal si lèn kecuali kin mumerinen atawa mumengé sesanah si ayu.

22  Renyel sesukle Paulus i hedepen sidang Areopagus, kené : “Urang Atena, kuèngon bahwa wan segele hal kam olok pedéh beribadah ku dewa-dewa.

23 Sebeb waktu aku ralan-ralan i kutemu nye munèngoni bene-bene pujaanmu, aku pé mudemunen sara ton kerben urum tulisen : Ku Allah si gere ibetih. Sana si kam semah tetapé gere mubetihié, oyale si malé kukeberen ku kam.

24 Allah si nge mujadinen denie urum segele isié, Wéle Tuhen atas langit urum bumi, gere taring i wan kuil-kuil penetosen pumu ni manusie,

25 atawa pé gere ilayani pumu ni manusie seolah-olah Wé mumerlunen sesanah, kerna Wéle si munosanen murip, kesah, den segele sesanah ku bèwèné jema.

26 Ari sara jema Wé nge mujadinen bèwèné bengsa den umet manusie kin munoweni seluruh bumi, den Wé nge munentunen musim-musim kin pakéa den batas-batas ton taring ni pakéa,

27 kati pakéa mungenali Tuhen den buge-buge mujangko nye mudemunen Wé, bierpé Wé gere gip ari kite masing-masing.

28 Sebeb i wan Wé kite murip, kite begerak, kite ara; betapé lagu si nge iperinen pepien ni penyair ni kam : Kerna kite pé keturunen-É.        

29 Jadi, kerna kite berasal ari keturunen ni Allah, kite gere nguk bepikir, bahwa mahluk ilahi a lagu emas atawa pirak atawa atu si iukir munurut keahlien urum akal ni manusie.

30 I masa si lalu, waktu manusie gere mubetihi Allah, Allah gere munironen tentang oya, tetapé besilo Allah mungeberen ku bèwèné jema i sihen pé kati betobat.

31 Kerna Wé nge munetapen sara lo, i waktu oya Wé kasé urum adil malé muhakimi denie mulalui sara Jema si nge itetapen-É. Wé nge mubuktinen ku bèwèné jema urum mubangkiten Jema si nge itetapen-É a ari kematénen.”

32 Ketike pakéa mumengé tentang kebangkiten ni jema maté, pepien ni jema munejek, den si lèn mumerin : “Kami malé mumengé ko seger mi becerak tentang hal ini.”

33 Renyel beluhle Paulus ari lelah ni pakéa.

34 Tetapé pepien ni jema rawan begabung urum wé den percaya, i antaraé ara Dionisius, anggota majelis Areopagus, den sara jema banan si begeral Damaris, den jema-jema si lèn pé murum urum pakéa.