Kisah Rasul-Rasul 18

Paulus i Korintus 18: 1-17

Renyel Paulus munaringen kute Atena nye beluh ku Korintus.

2 I Korintus wé mudemu urum sara urang Yahudi si begeral Akwila, si berasal ari Pontus. Wé urum banané Priskila ben gèh ari Italia kerna Kaisar Klaudius nge mumerintahen kati bèwèné urang Yahudi munaringen Roma. Paulus singah ku umah ni pakéa.

3 Den entap ni dis  buet ni pakéa, wé taring den bebuet urum pakéa, kerna buet ni pakéa penos ni tenda.

4 Setiep lo Sabat Paulus becerak wan umah ibedet, den berusaha muyakinen urang Yahudi urum urang Yunani.

5 Ketike Silas urum Timotius gèh ari Makedonia, Paulus nge lepas seengkipé mungeberen pecerakan ni Allah, wé besaksi ku urang Yahudi bahwa Yesusle Kristus.

6 Tetapé ketike jema-jema wa munentang urum muhujet, ikepurené dul ari pekayané nye iperiné ku pakea : “Rayohmu mutuang ku atan ni ulumu kendiri; aku bersih, gere besalah. Muloi ari besilo ni aku malé beluh ku bengsa-bengsa si lèn.”

7 Renyel wé tangkuh ari oné nye beluh ku umah ni sara jema si begeral Titius Yustus, si beribadah ku Allah. Umahé besemelahen urum umah ibedet.

8 Krispus, kepala umah ibedet a urum seisi ni umahé percaya ku Tuhen, den delé urang Korintus si mumengénen penejeren ni Paulus a mujadi percaya den ibaptis.

9 I sara kelem, Tuhen becerak ku Paulus i wan sara penèngonen : “Enti terih! Tapé keberen renyel den enti ongot!

10 Sebeb Aku munurumi ko den gere sara jema pé si malé munyerang urum munganiaya ko, kerna delé umet-Ku i kute ni.”

11 Den Paulus pé taring i oné selama sara tun onom bulen, munejeren pecerakan ni Allah i antara ni pakéa.

12 Tetapé ketike Galio mujadi gubernur i Akaya, urang Yahudi uet musara até  mulewen Paulus nye mumaié ku ruang pengadilen,

13 kené : “Wé ini mupengaruhi jema kin beribadah ku Allah urum cara si betentangen urum hukum Taurat.”

14 Ketike Paulus malé becerak, iperin Galio ku urang Yahudi : “Woi urang Yahudi, ike sekireé dakwaan ni kam a tentang pelanggaren atawa kejahaten si beret, nge sepatuté aku munerime perkaramu,

15 tapé ike hal oya peselisihen tentang pecerakan atawa geral atawa hukum si berlaku i antara ni kam, kam kendirile si munyelesénené; aku gere mera mujadi hakim atas perkara si lagu noya.”

16 Renyel wé munusir pakéa ari ruang pengadilen.

17 Den pakéa bèwèné munengkam Sostenes, kepala umah ibedet a, renyel mudereié i arap ni pengadilen a; tapé Galio gere muniroi hal oya.

Paulus ulak ku Antiokia 18: 18-23

18 Paulus taring pepien loi ilen i Korintus, renyel wé besinen ku sudere-sudere i oné, den belayar ku Siria murum urum Priskila den Akwila, nge mari mugelut wuké i Kengkrea; kerna wé nge bejanyi ku Allah.

19 Renyel sawahle pakéa i Epesus, Paulus munaringen Priskila urum Akwila i oné, den wé mayo ku umah ibedet den becerak urum urang Yahudi.

20 Ketike itiro pakéa kati Paulus taring lebih mokot i oné, wé gere mungabulené.

21 Tetapé waktu besinen, iperinné : “Aku kasé malé ulak mien ku kam, ike Allah mungenakié.” Renyel wé belayar ari Epesus.

22 Ketike Paulus sawah i Kaisarea, wé nik ku deret nye munosah salam ku jemaat, renyel wé mulanyuten pejelenené ku Antiokia.

23 Nge mari pepien loi lememé taring i oné, wé berangkat mien munentongi seluruh daerah Galatia urum Frigia kin mungueten imen ni bèwèné murid.

Apolos i Epesus urum i Korintus 18: 24-28

24 I waktu oya gèhle ku Epesus sara urang Yahudi begeral Apolos, si berasal ari Aleksandria. Wé paséh becerak den pehem pedéh tentang Kiteb Suci.

25 Wé nge iejer tentang Jelen Tuhen. Urum semangat wé becerak den urum teliti wé munejer tentang Yesus, tetapé wé mubetihi baptisen Yohanes pelin we.

26 Urum berani Apolos muloi becerak i umah ibedet, tetapé ketike Priskila urum Akwila mumengéé, pakéa mumaié ku umah ni pakéa den urum teliti mujelasen ku wé Jelen Allah.

27 Den ketike Apolos bemeksud munyeberang ku Akaya, sudere-sudere i Epesus munulungé urum munulis suret ku murid-murid i oné kati pakéa munyamut wé. Ketike Apolos tibe i Akaya, wé mujadi jema si olok begune kin jema-jema si kerna kasih karunie Allah nge percaya.

28 Sebeb urum tegas wé mubantah urang Yahudi i arap ni umum den mubuktinen ari Kiteb Suci bahwa Yesusle Kristus.