Kolose 1

Salam 1:1-2

 Ari Paulus, rasul Kristus Yesus, ari kenak ni Allah, den Timotius suderente.

2 Ku sudere si kudus den si percaya wan Kristus i Kolose, kasih karunie den damé sejahtera ari Allah Amante munyertai kam.

Ucepen sukur den doà 1:3-14

3 Kami dor mungucep sukur ku Allah, Ama Tuhente Yesus Kristus, setiep kami bedoà kin kam,

4 kerna kami nge mumengé tentang imenmu wan Kristus Yesus den tentang kasihmu tehedep bèwèné jema kudus,

5 kerna pengharapen si isedienen bagi kam i serge. Pengharapen oya nge lebih mulo ipengé kam oyale Keber Jeroh , Injil,

6 si nge sawah ku kam. Injil oya munyebar urum muuah den mutamah-tamah i  seluruh denie, betapé i antara kam ari waktu kam mumengéé den mubetihi kasih karunie Allah urum sebenaré.

7 Bèwèné oya nge betihi kam ari Epafras, pong pelayan si kami kasihi, si bagi kam oyale pelayan Kristus si setie.

8 Wéle si nge munyederen ku kami kasihmu wan Roh.

9 Kerna oya ari waktu kami mumengéé, kami gere teduh bedoà kin kam, kami bedoà kati kam munerime bèwèné hikmat den pengertien si benar kin mubetihi kenak ni Tuhen urum semperne.

10 Sehinge muripmu layak i arap-É urum bekenak ku Wé wan segele hal, den kam munosah uah wan segele pebueten si jeroh den murip wan pemetihen si benar tentang Allah,

11 den ikueten urum segele kekueten ari kuasa kemulieen-É kin munangung bèwèné urum tekun den seber,

12 den mungucep sukur urum sukacite ku Ama, si mulayaken kam kin mudepet bagien wan hana si itentunen kin jema kudus i wan kerejeen terang.

13 Wé nge muluahen kite ari kuasa kegelepen den muminahen kite ku wan Kerejeen Anak-É si kekasih;

14 i wan Wé kite munempui penebusente, oyale pengampunen dosa.

Keutamaen Kristus 1:15-23

15 Wéle gamar ni Allah si gere teridah oya, si sulu bere, Wé nge ara sebelem segele sesanah iciptanen.

16 Sebeb i wan Wéle nge iciptanen bèwèné si ara i serge den si ara i bumi si teridah den si gere teridah, bier singgasana, bier pé kerejeen, bier pemerintah, bier penguasa, bèwèné iciptanen ari Wé den kin Wé.

17 Wé lebih mulo ara bidak bèwèné den bèwèné ara i wan Wé.

18 Wé le ulu ni tubuh, oyale jemaat. Wé le si sulu bere, si pemulo bangkit ari antara jema benasa, sehinge Wé lebih utama wan segele sesanah.

19 Kerna bèwèné keengkipen Allah bekenak taring i wan Wé,

20 den mulalui Wéle Allah mupedamenen bèwèné urum diri-É, bier si ara i bumi betapé si ara i serge, nge mari Wé munaranen pedaméen mulalui rayoh Kristus.

21 Kam pé si tengaha murip gip ari Allah den si mulewen-É wan até den pikiren lagu si nyata ari pebuetenmu si jahat,

22 se ni iperdaménen-É, i wan tubuh jasmani Kristus mulalui kematénen-É

kin  mumarinen kam kudus den gere mucela urum becacat i arap-É.

23 Kerna oya kam turah betekun wan imen, tetap teguh den gere muguncang den enti mera iesot ari pengharapen Injil, si nge ipengé kam den nge ikeberen i seluruh denie den aku ini, Paulus nge mujadi pelayané.

Pelayanen den penderiteen Paulus 1:24-2:5

24 Se ni aku besukacite bahwa aku nguk muderite kerna kam, den munos engkip wan usiku hana si kurang wan penderiteen Kristus kin tubuh-É oyale jemaat.

25 Aku nge mujadi pelayan jemaat oya sesué urum tuges si ipercayanen Allah ku aku kin munyawahen firman-É  seluruhé urum seengkipé ku kam,

26 oyale resie si mutuni ari abad ku abad den ari keturunen ku keturunen tetapé si se ni inyatanen ku jema-jema kudus-É.

27 Ku pakea Allah bekenak munyederen, kune kaya den mulieé resie oya i antara bengsa lèn, oyale: Kristus i was ni kam, hal oya munosah pengarapen bahwa kam mudepet bagien wan kemulieen Allah.

28 Wé le si kami keberen, ike jep jema kami nasèhati den kami ejeri wan segele hikmat, kin mumimpin jep jema ku kesemperneen wan Kristus.

29 Oyale si kuusahanen den ku pejuangen urum segele tenege sesué urum kuasa-É, si bebuet urum kuet i was aku.