Kolose 2

Kerna aku mera, kati betihi kam kune bereté pejuangen si kubueten kin kam, den kin pakea si i Laodikia den kin bèwèné, si gere mubetihi aku secara pribadi,

2 kati até ni pakea tehibur den pakea musara wan kasih, sehinge pakea munerime segele kekayaen den keyakinen pengertien  den mubetihi resie Allah, oyale Kristus.

3 Sebeb i wan Wé le mutuni bèwèné hikmat den pemetihen.

4 Hal ini kuperinen, kati enti ara si mupedayanen kam urum kata-kata si lungi.

5 Sebeb bier pé aku kendiri gere ara i antara kam, tetapé wan roh aku murum urum kam den aku munèngon urum sukacite tertib muripmu den keteguhen imenmu wan Kristus.

Murip wan Kristus 2:6-15

6 Kam nge munerime Kristus Yesus, Tuhente, kerna oya kenaké muripmu tetap i wan Wé.

7 Kenaké kam muuyet i wan Wé den ibangun i atas-É, kenaké kam makin teguh wan imen si nge iejeren ku kam den kenaké atému mulimpah urum sukur.

8 Jege-jegele kati enti ara si mupengaruhi  kam urum filsafat si soh den pelsu munurut ejeren turun-temurum den roh-roh denie, tetapé gere munurut Kristus.

9 Sebeb wan Wé le taring secara jasmaniah bèwèné keengkipen ke Allahen.

10 Den kam nge iengkipi i wan Wé, Wé le ulu ni bèwèné pemerintah den penguasa.

11 Wan Wé kam nge isunet, nume urum sunet si ibueten manusie, tetapé urum sunet Kristus, oyale muluahen tubuh si bedosa ini.    

12 Kerna urum Wé kam ikuburen wan baptisen, i wan Wé kam pé turut ibangkiten mulalui kepercayaen ku kuasa Allah, si nge mubangkiten Wé ari antara jema benasa.

13 Kam pé, bier pé tengaha maté kerna kesalahenmu  den kerna gere isunet secara lahiriah, nge iuripen Allah, nge mari Wé munampuni segele kesalahente,

14 urum munapusen suret utang, si munurut ketentuen hukum mudakwa den mungancam kite, den oya iapusen-É urum mulabangené i kayu salib.

15 Wé nge mulucuti pemerintah den penguasa den mujadinen pakea tontonen umum wan kemenangen-É atas pakea.

Mungenal perkara si i atas 2:16-3:4

16 Kerna oya entile datén kam jema muhukum kam tentang pemanganan den minumen atawa tentang reraya, ulen ayu atawa pe lo Sabat.

17 Bèwèné ni bayangan pelin ari sana si turah gèh, tetapé wujuté oyale Kristus.

18 Entile datén kam kemenangenmu ikalahen jema si belagak murenahen diri den beribadah ku malèkat, bebangga urum penèngonen den tanpa alasan munyomongen diri urum sie-sie munuruti pikirené si deniewi,

19 pedahal wé gere beramat teguh ku Ulu, isihen seluruh tubuh, itopang den iikot mujadi sara mulalui uyet den sendi, den mutamah-tamah urum karunie Allah. 

20 Ike kam nge maté murum urum Kristus den muluah ari roh denie, kune ke kam  munakluken dirimu ku bebagé peraturen lagu kam murip ilen i denie:

21 enti amat ini, enti cecép oya, enti jontok oya ;

22 Bèwèné oya tentang hal si gere ara guneé mari ipaké, den munurut perintah urum ejeren manusie pelin.

23 Peraturen ini, bier pé nèngoné  engkip hikmat urum ibadah, lagu murenahen diri, munyikse diri, tetapé bèwèné oya gere mupaedah selèn kin mumuesen kenak ni até.