Kolose 3

Kerna oya, ike kam ibangkiten murum urum Kristus, kenalle perkara si i atas, isihen Kristus ara, kunul i semelah kuen Allah.

2 Pikirenle perkara si i atas, nume si i bumi.

3 Kerna kam nge maté den muripmu tetuni urum Kristus i wan Allah.

4 Ike Kristus si oyale murip te munyatanen diri puren kam pé male munyatanen diri murum urum Wé wan kemulieen.

Manusie ayu 3:5-17

5 Kerna oya unuhenle wan dirimu bèwèné si deniewi, oyale pencabulen, kenajisen, hewe nepsu, kenak si jahat, keserakahen si dis urum penyemahen berhala.

6 Bèwèné oya munegèhen murke ni Allah;

7 tengaha kam pé mubueten hal oya waktu kam murip i wasé.

8 Tetape se ni, tekarenle bèwèné ini, oyale bengis, geram, kejahaten, fitnah den cerak si kotek si tangkuh ari awahmu.

9 Enti né kam saling munyogahi, kerna kam nge muluahen manusie lemem urum tingkahé,           

10 den nge mumakéen manusie ayu si dor iperbaharui kin mudepet pemetihen si benar munurut gamar Allah si mujadinené.

11 Wan hal ini gere ara né urang Yunani atawa urang Yahudi, jema besunet atawa gere besunet, urang Barbar atawa urang Skit, temuluk atawa jema merdeka, tetapé Kristus oyale bèwèné den i wan segeleé.

12 Kerna oya sebagé jema pilihen Allah si ikudusen den i kasihi-É pakéenle belas kasihen, kemurahen, kerenahen ate, kelemah lemuten den keseberen.

13 Seberle kam sara ku si lèn,  den ike ara peselisihen saling munampunile, dis lagu Tuhen nge munampuni kam, bueten pe lagu noya.

14 Den i atas bèwèné oya: pakéenle kasih, sebagé penikot si munyaranen den munyempernenen.

15 Kenaké damé sejahtera Kristus mumerintah i wan atému, kerna kin oyale kam nge italu mujadi sara tubuh; den besukurle.

16 Kenaké kata-kata ni Kristus taring urum bèwèné kekayaené i antara ni kam, sehinge urum segele hikmat kam munejer den munegor sara ku si lèn den sire munyanyinen mazmur, den pujien, den pujien rohani, kam mungucep sukur ku Allah wan atému.

17 Den bèwèné si ibueten kam urum cerak atawa pebueten, buetenle bèwèné oya wan geral ni Tuhen Yesus, sesire mungucep sukur mulalui Wé ku Allah, Amante.

Hubungen antara anggota umah tenge 3:18-4:6

18 Hei banan, taatle ku rawanmu, kune turahé wan Tuhen.

19 Hei rawan, kasihile bananmu den entile kasar terhedep wé.

20 Hei kekanak, taatile jema tuemu wan segele hal, kerna oyale si mampat i wan Tuhen.

21 Hei ama-ama, entile sakiti até ni anakmu kati enti tawar atéwé .

22 Hei temuluk, taatile rejemu si i denie ni wan segele hal, enti i arap ni pakea pelin kin munyenangen pakea, melènen urum tulus até kerna terih kin Tuhen.

23 Sana pé si ibueten kam, buetenle urum segenap atému lagu kin Tuhen nume kin manusie.

24 Betih kam bahwa ari Tuhenle kam malé munerime bagien si itentunen bagimu sebagé upah. Kristus oyale reje den kam hamba-É.

25 Barik sahan bebuet kesalahen, wé malé munangung kesalahené a, kerna Tuhen gere mumanang rupe.