Kolose 4

Hei reje-reje, adil den jujurle tehedep temulukmu; ingetle kam pé munempui reje i serge.

2 Betekunle wan doà den waktu kam bedoà bejege-jegele sire mungucep sukur.

3 Bedoàle kin kami pé, kati Allah munuke pintu kin pengeberen kami, sehinge kami lepas becerak tentang resie Kristus, si kernaé aku i penjerenen.

4 Urum lagu noya aku lepas mujelasené sekune turahé .

5 Muriple urum engkip hikmat tehedep jema deret , gunenenle waktu si ara.

6 Kenaké cerakmu dor engkip kasih, temas ipengé sehinge betihi kam kune kam turah munosah jeweb ku jep jema.

Penutup den salam 4:7-18

7 Bèwèné hal ikhwalku malé isederen Tikhikus ku kam, suderente si kekasih, hamba si setie den pong pelayan wan Tuhen.

8 Wé kukini ku kam urum meksud, kati betihi kam hal ikhwal kami den kati wé muhibur atému.

9 Wé kukini murum urum Onesimus, suderente si setie den si kekasih, sara ari antara ni kam, pakea malé munyederen ku kam bèwèné si terjadi i sin.

10 Salam ku kam ari Aristarkus, pongku sepenjere den ari Markus, anak ni sudere Barnabas - tentang wé kam nge munerime manat; terimele wé, waktu wé gèh ku kam -

11 den ari Yesus si igerali Yustus. Paké tulu ni pelin i antara si besunet si mujadi pongku sebuet kin Kerejeen Allah; paké oya nge mujadi penghibur bagiku.

12 Salam ari Epafras ku kam; wé sara ari antara ni kam, hamba Kristus Yesus, si dor bejuang  wan doàé kin kam, kati kam sesuk teguh, sebagé jema si dewasa den si engkip urum keyakinen den segele hal si ikenaki Allah.

13 Sebeb aku lepas munosah kesaksien tentang wé, bahwa wé olok kenyanyanen kin kam urum kin pakea si i Laodikia den Hierapolis.

14 Salam ku kam ari tabib Lukas si kekasih den ari Demas.

15 Sawahenle salam kami ku sudere-sudere i Laodikia; ku Nimfa den jemaat si ara i umahé pé.

16 Den ike suret ini nge ibacanen i antara ni kam, usahanenle kati ibacanen i jemaat Laodikia pé, den kati suret si kin Laodikia pé ibacanen ku kam.

17 Den perinenle ku Arkhipus: Peratinenle kati pelayanen si iterime ko wan Tuhen iselesénen ko bèwèné.

18 Salam ari aku, Paulus. Salam ini kutulis urum pumuku kendiri, enti lupe bahwa aku tengah i penjere. Kasih karunie munyertai kam.