Pilipi 1

Salam 1:1-2

Ari Paulus den Timotius, hamba Kristus Yesus, ku bèwèné jema kudus wan Kristus Yesus i Pilipi, urum bèwèné penilik jemaat den diaken.

2 Kasih karunie den damé sejahtera ari Allah, Amante, den ari Tuhen Yesus Kristus munyertai kam.

Ucepen sukur den doà 1:3-11

3 Aku mungucep sukur ku Allahku setiep aku muninget kam.

4 Den wan tiep doàku aku dor mudoànen kam bèwèné urum sukacite.

5 Aku mungucep sukur ku Allahku kerna pesekutuenmu wan Keber Injil muloi ari lo pemulen sawah besilo ni.

6 Tentang hal ini aku sunguh yakin, oyale Wé, si mumuloi pebueten si jeroh i antara kam, male mulanyutené, sawah ku akhiré i lo Kristus Yesus.

7 Memang nge sepatuté aku bepikir lagu noya tentang kam bèwèné, sebeb kam ara i wan atéku, kerna kam bèwèné turut mudepet bagien wan kasih karunie si iosanen ku aku, bier i waktu aku ipenjerenen, bier pé i waktu aku mubèla den muneguhen Keber Injil.

8 Sebeb Allahle saksiku kune aku urum kasih Kristus Yesus denem pedéh kin kam bèwèné.

9 Den inile doàku, buge kasihmu makin mulimpah wan pemetihen si benar den wan segele pengertien.

10 Sehinge kam lepas mumilih hana si jeroh, kati kam suci den gere becacat i waktu Kristus gèh mien,

11 engkip urum uah kebenaran si ibueten Yesus Kristus kin mumulienen den mumuji Allah.

Kesaksien Paulus wan penjere 1:12-26

12 Aku mungenaki sudere-sudere, kati betih kam, bahwa hana si terjadi atas aku ini, justru nge munos Injil makin maju,

13 sehinge nge jelas bagi bèwèné istana den bèwèné jema lèn, bahwa aku ipenjeren kerna Kristus.

14 Den lebih delé sudere wan Tuhen nge mudepet pengharapen ku Tuhen den mutamah berani becerak tentang firman Allah urum gere terih.

15 Ara jema si mungeberen Kristus kerna dengki den peselisihen, tetapé ara pé si mungeberen Kristus urum meksud jeroh.

16 Paké ni mungeberen Kristus kerna kasih, sebeb ibetihi pakea, bahwa aku ara i sien kin mubèla Injil.

17 Tetapé si lèn kerna kepentingen kendiri den urum meksud si gere ikhlas, nalam ni pakea urum lagu noya bebenku wan penjere mutamah beret.

18 Tetapé gere mukunah, sebeb bier kune pé, Kristus ikeberen, bier urum meksud pelsu, bier pé urum jujur. Tentang hal oya aku besukacite, den aku malé tetap besukacite.

19 Kerna kubetih bahwa akhir bèwèné ni oyale keselamatenku entap doàmu den petulungen Roh Yesus Kristus.

20 Sebeb si olok kudenemen den kuharapen oyale bahwa aku wan segele hal gere mujadi kemél , melènen lagu pemulo, betapé se ni, Kristus urum nyata imulienen i wan tubuhku, bier urum muripku, bier pé urum matéku.

21 Kerna bagiku murip oyale Kristus den maté oyale keuntungen.

22 Tetapé ike aku turah murip i denie ni, oya berarti bagiku bebuet munosah uah, jadi  sana si turah kupilih gere kubetih.

23 Aku idesak ari roa pihak: aku ménét beluh den taring murum urum Kristus, oya memang gip lebih jeroh;

24 tetapé lebih perlu kin taring i denie ni kerna kam.

25 Den urum keyakinen ini kubetih: aku malé taring den malé murum mien urum kam bèwèné kati kam makin maju den besukacite wan imen,

26 sehinge kemegahenmu wan Kristus makin mutamah kerna aku, ike aku ulak ku kam.

Nasèhat kati tetap bejuang 1:27-30

27 Cume, kenaké muripmu sesué urum Injil Kristus, kati ike aku gèh aku munèngon den ike aku gere gèh aku mumengé, bahwa kam teguh sesuk  wan sara roh, den sara até sara jiwe bejuang kin imen si timul ari Keber Injil,

28 urum gere igentaren tikik pé ari lewenmu. Bagi pakea bèwèné a oyale tene kebenasanen, tetapé bagi kam tene keselamaten, den oya gèhé ari Allah.

29 Sebeb kin kam ikarunienen nume kin percaya ku Kristus pelin, melènen kin muderite kin Wé,

30 wan kesengsaraen si dis lagu si ièngon kam tengaha i aku, den se ni ipengé kam tentang aku.