Pilipi 2

Nasèhat kati musara den murenahen diri 2:1-11

Jadi kerna wan Kristus ara nasehat,ara penghiburen kasih, ara pesekutuen Roh, ara saling mungasihi den belas kasihen;

2 kerna oya tosenle sukaciteku semperne urum ini : kenaké kam seaté sepikir  wan sara kasih, sara jiwe, sara tujuen,

3 urum gere mungenal kepentingen diri kendiri atawa pujien si sie-sie. Sebaliké kenaké urum renah até si sara muanggap si lèn lebih penting bidak dirié kendiri.

4 Den entile jep jema muperatinen kepentingené kendiri we, tetapé kepentingen jema lèn pé.

5 Kenaké kam wan muripmu murum, munobon pikiren den perasaen si ara wan Kristus Yesus,

6 bier pé wan rupe Allah, Wé gere muanggap kesetaraen urum Allah oya sebagé empu si turah ipetehenen,

7 melènen nge mungosongen diri-É kendiri, den munuet rupe sara hamba, den mujadi dis urum manusie.

8 Den wan keadaen sebagé manusie, Wé nge murenahen diri-É den taat sawah maté, bahkan maté i kayu salib.

9 Oyale sebebpé Allah olok munatasen Wé den mungarunienen ku Wé geral i atas segele geral,

10 kati wan geral Yesus segele si ara i langit den si ara i atas bumi den si ara i tuyuh bumi, bèwèné sujut munyemah Yesus,

11 den segele dèlah mungaku: “Yesus Kristus oyale Tuhen,” bagi kemulieen Allah, Ama!

Tetaple bueten keselamatenmu 2:12-18

12 Hei sudereku si kukasihi, kam sabé taat; kerna oya tetaple bueten keselamatenmu urum terih den gentar, nume waktu aku tengah ara pelin,

tetapé terlebih mien besilo ni waktu aku gip ari kam.

13 Kerna Allahle si mubueten i wan ni kam bier kenak bier pé usaha, munurut kerelaen-É.

14 Buetenle bèwèné urum gere cebebék den pelolo,

15 kati kam gere muaib den benoda, sebagé anak-anak Allah si gere becela i lelah angkatan si mugèdok atéwé den si sesat ini, sehinge kam mucaya i antara ni pakea lagu bintang-bintang i denie.

16 Sire beramat ku firman kehidupen , kati aku lepas bemegah i lo Kristus, bahwa aku gere sie-sie belomba den kenyanyanku gere percume.

17 Tetapé seger pé rayohku ituangen ku kerben den ibadah imenmu, aku besukacite den aku besukacite urum kam bèwèné.

18 Den kam pé turah besukacite lagu noya den besukacitele urum aku.

Timotius den Epaproditus 2:19-3:1a

19 Tetapé wan Tuhen Yesus kuharap tir munutus Timotius ku kam, kati tenang atéku tentang hal ikhwalmu.

20 Kerna gere sara pé i aku si sara até sepikir urum aku den si lagu noya besunguh muperatinen kepentingenmu.

21 Sebeb bèwèné mungenal kepentingené kendiri, nume kepentingen Kristus Yesus.

22 Betih kam bahwa kesetieené nge teruji den bahwa wé nge munulung aku wan pelayanen Injil dis lagu sara anak munulung amaé.

23 Aku harap tir nguk munutus wé ku kam, nge mari jelas kin aku kune jelené perkaraku;

24 tetapé wan Tuhen aku percaya, bahwa aku kendiri pé tir male gèh.

25 Tetapé kukire perlu munutus Epaproditus ku kam, sudereku den pongku sara buet urum pong sepejuangenku, si iutus kam kin mulayani aku wan keperluenku.

26 Kerna wé olok denem kin kam bèwèné den nyanya pedeh atéwé, sebeb ipengé kam bahwa wé gere sehat.

27 Memang betul wé gere sehat den malé benasa, tetapé Allah mungasihi wé, den nume wé pelin, melènen aku pé, kati kesedihenku enti mutamah.

28 Oyale sebebpé aku lebih tir munutus wé, kati ike kam munèngon wé, kam lepas besukacite den kesedihenku mukurang.

29 Jadi terimele wé wan Tuhen urum bèwèné sukacite den hormatile jema si lagu noya.

30 Sebeb kerna buet ni Kristus wé malé benasa den wé mupetaruhen nyawaé kin mubueten hana si  kurang wan pelayanenmu kin aku.