Pilipi 3

1a Akhire sudere-suderengku besukacitele wan Tuhen.

Kebenaran si sejati 3:1b-16

1b Munulisen hal ini mien ku kam gerele beret bagiku den munosanen kepastien ku kam.

2 Jege-jegele tehedep asu-asu, jege-jegele tehedep si bebuet jahat , jege-jegele terhedep penyunet si pelsu.

3 Kerna kitele jema besunet, si beribadah mulalui Roh Allah, den bemegah wan Kristus Yesus den gere beharap ku hal si lahiriah.

4 Seger pé aku munempui alasen kin beharap tentang hal lahiriah. Ike ara

jema lèn mungire nguk beharap kin hal si lahiriah, aku lebih mien:

5 isunet i lo kelapan, ari bengsa Israel, ari suku Benyamin, urang Ibrani asli, tentang pendirien tehedep hukum Taurat aku urang Farisi.

6 Tentang kegieten aku penganiaya jemaat, tentang kebenaran wan munaati hukum Taurat, aku gere becacat.

7 Tetapé hana si tengaha kuanggap sebagé keuntungen, se ni kuanggap rugi kerna Kristus.

8 Bahkan bèwèné kuanggap rugi kerna pemetihen tentang Kristus Yesus, Tuhenku, lebih mulie bidak bèwèné. Entap ni Wé le aku nge muluahen bèwèné oya den muanggapé sampah, kati aku mudepeten Kristus,

9 den aku nyata i was Wé nume urum kebenaranku kendiri kerna munaati hukum Taurat, melènen urum kebenaran kerna imen ku Kristus, oyale kebenaran si ianugerahen Allah bedasaren imen.

10 Si kukenaki oyale mubetihi Wé den kuasa kebangkiten-É den pesekutuen wan penderiteen-É, sehinge aku mujadi dis urum Wé wan kematenen-É,

11 kati aku akhiré mudepet kebangkiten ari antara jema benasa.

12 Nume kerna aku nge mudepet hal ini atawa nge semperne, melènen aku mudediké, kati aku lepas munengkamé, kerna aku pé nge itengkam Kristus Yesus.

13 Sudere-sudere, aku kendiri gere muanggap, bahwa aku nge munengkamé, tetapé ini si kubueten: aku mulupenen sana si nge ikudukku den mungarahen diri ku sana si i arapku,

14 den musangka ku tujuen kin mudepet hadiah oyale penalun sergewi ari Allah wan Kristus Yesus.

15 Kerna oya entahle kite, si semperne, bepikir lagu noya, den ike pé lèn pikirenmu tentang sara hal, Allah pé malé mujelasené ku kam.

16 Tetapé jerohé tingket pengertien si nge kite empui, kite lanyuten munurut jelen si nge kite liweti.

Nasèhat ku jemaat 3:17-4:1

17 Sudere-suderengku, tunungle teledenku den peratinenle pakea, si murip dis lagu kami si mujadi teledenmu.

18 Kerna lagu si nge gati kuceraken ku kam den si kusederen pé se ni urum mongot, delé jema si murip sebagé lewen ni salib Kristus.

19 Peremèhen ni pakea oyale kebenasanen, Tuhen ni pakea oyale tuke ni pakea, kemulieen ni pakea oyale aib ni pakea, si mumikiren perkara deniewi pelin.

20 Kerna kewargaente oyale i wan serge, den ari oné pé kite munantinen Tuhen Yesus Kristus sebagé Juruselamat,

21 si malé munubah tubuhte si hine ni, sehinge mujadi serupe urum beden-É si mulie, munurut kuasa-É si lepas munakluken bèwèné ku diri-É.