Pilipi 4

Kerna oya, sudere-sudere si kukasihi den si kudenemi, sukaciteku den mahkotangku, sesukle urum teguh wan Tuhen, hei sudereku si kukasihi.

Nasèhat pemarin 4:2-9

2 Eudia kunasèhati den Sintikhe kunasèhati, kati sara até sepikiren wan Tuhen.

3 Bahkan kutiro ku ko pe, Sunsugos, pongku si setie: tulungle pakea, kerna pakea nge bejuang urum aku wan pengeberen Injil, murum urum Klemen den pong-pongku sebuet si lèn, si geral ni pakea ara tertulis i wan kiteb kehidupen.

4 Besukacitele sabé wan Tuhen, seger mi kuperinen: Besukacitele!

5 Kenaké jeroh ni atému ibetihi bèwèné jema. Tuhen nge rap.

6 Enti le macik até ni kam tentang sanah pé,tetapé sederenle wan segele hal kenakmu ku Allah wan doà den muniro urum ucepen sukur.

7 Damé sejahtera Allah, si mulebihi segele akal, malé mujegei até den pikirenmu wan Kristus Yesus.

8 Jadi pemarin, sudere-suderengku, bèwèné si benar, bèwèné si mulie, bèwèné si adil, bèwèné si suci, bèwèné si lungi, bèwèné si temas ipengé, bèwèné si isebut kebajiken den patut ipuji, pikirenle bèwèné oya.

9 Den hana si nge ipelejeri kam den hana si nge iterime kam, den hana si nge ipengé urum ièngon kam i aku, buetenle oya. Den Allah asal ni damé sejahtera malé munyertai kam.

Berijin atas penosahen jemaat  4:10-20

10 Aku olok besukacite wan Tuhen, sebeb akhiré pikiren ni kam den perasaen ni kam timul mien kin aku, memang dor ara perhatienmu, tetapé gere ara kesempaten bagimu.

11 Kuperinen ini nume kerna kekurangen, sebeb aku nge belejer mugenapi diri wan segele keadaen.

12 Kubetih hana oya kekurangen den kubetih hana oya kelimpahen, wan bèwèné hal den wan segele perkara gere ara sanah pé si resie bagiku; bier wan hal korong, bier pé wan hal mulapé, bier wan hal kelimpahen bier pé wan hal kekurangen.

13 Segele pekara lepas kutangung i wan Wé si munosah kekueten ku aku.

14 Tetapé kam nge mubueten si jeroh urum munuet bagien i wan kenyanyanenku.

15 Kam kendiri pé betih, hei urang Pilipi; i waktu aku ben muloi mungeberen Injil, ketike aku berangkat ari Makedonia, gere ara sara jemaat pé si munaranen peritungen utang piutang urum aku selèn kam.

16 Kerna i Tesalonika pé kam nge  mupepienen mungirimen bantuen ku aku.

17 Tetapé si lebih penting kin aku numele penosahen oya, melènen uahé si munos keuntungenmu mutamah.

18 Besilo aku nge munerime bèwèné si perlu ari kam, malahen lebih ari genap, aku bekelimpahen, kerna aku nge munerime kirimen ni kam ari Epaproditus, sara pesemahen si wangi, sara kerben si isenangi si bekenak ku Allah.

19 Allahku malé munengkipi bèwèné keperluenmu munurut kekayaen den kemulieen-É wan Kristus Yesus.

20 Imulienenle Allah den Amante selama-lamaé! Amin.

Salam 4:21-23

21 Sawahenle salamku ku tiep jema kudus wan Kristus Yesus. Salam ku kam ari sudere si murum urum aku.

22 Salam ku kam ari segele jemaat kudus, khususé ari pakea si taring i istana Kaisar.

23 Kasih karunie Tuhen Yesus Kristus munyertai rohmu!