Roma 6

Benasa nye bangkit urum Kristus 1:1-14

Ike lagu oya, hana ke si malé kite perinen? Nguk ke kite betekun wan ni  dosa, kati semakin mutamah kasih karunie oya?

2 Tentué gere! Gere ke kite nge maté tehedep dosa, kune kite lepas ilen murip i wasé?

3 Atawa gere ke betihi kam, bahwa kite bèwèné si nge ibaptis wan Kristus nge ibaptis wan kematénen-É?

4 Urum lagu oya kite nge ikuburan murum urum Wé entap baptisen wan kematénen, kati dis lagu Kristus nge ibangkiten ari antara jema benasa kerna kemulieen Ama, betapé kite malé murip wan murip si ayu.

5 Sebeb ike kite nge mujadi sara urum Wé wan  kematénen-É , tentu kite pé malé majadi sara urum Wé wan  kebangkiten-É.

6 Kerna kite betih, bahwa manusie lemem si i wan diri te nge urum isaliben, gelah tubuhte si bedosa ni mosop kuasaé, kati enti ne kite munos diri te hamba kin dosa.

7 Sebeb sahan si nge benasa, wé nge muluah ari dosa.

8 Jadi ike kite nge benasa urum Kristus, kite percaya, bahwa kite pé malé murip urum Wé.

9 Kerna kite betih, bahwa Kristus, nge mari Wé bangkit ari antara jema benasa, gere benasa mien : maut gere bekuasa né  atas Wé.

10 Sebeb kematénen Kristus oyale kematénen terhedep dosa, seger den kin selama-lamaé, den murip-É oyale murip bagi Allah.

11 Betale kenaké kam mumanangé: bahwa kam nge benasa tehedep dosa, tetapé kam murip kin Allah wan Kristus Yesus.

12 Kerna oya kenaké dosa enti bekuasa né  i wan tubuh ni kam si fana, kati kam enti né munuruti kenak ni dosa wa.

13 Den enti kam munyerahen bagien beden ni kam ku dosa kin ipaké sebagé senjata kejahatan, tetapé serahenle diri ni kam ku Allah sebagé jema-jema si tengaha nge benasa, tetapé si se ni murip. Den serahenle bagien tubuh ni kam ku Allah kin mujadi senjata-senjata kebenaran.

14 Sebeb  dosa gere ara mukuasa né atas kam, kerna kam gere né i tuyuh ni hukum Taurat, tetapé i tuyuh ni kasih karunie.

Roa jenis perhambaen 6:15-23

15 Jadi kune? Kite ni malé bebuet dosa ke, kerna kite gere i tuyuh ni hukum Taurat, tetapé i tuyuh kasih karunie? Seseger gere!

16 Gere ke betihi kam bahwa ike kam munyerahen diri ni kam ku sara jema  sebagé hamba kin mutaati wé, kam hamba ni jema wa si turah itaati kam, wan dosa si mumimpin kam ku kematénen, atawa pé wan ketaatan si mumimpin kam ku kebenaran?

17 Tetapé sukurle ku Allah! Tengaha memang kam hamba dosa, tetapé se ni kam urum segenep até nge mutaati penejeren si nge isawahen ku kam.

18 Kam nge imerdékanen ari dosa den mujadi hamba ni kebenaran.

19 Aku mumerinen hal ni secara manusie entap kelemahen ni kam. Sebeb dis lagu kam nge munyerahen bagien-begien tubuh ni kam mujadi hamba  kecemaren  den kedurhakaen, betale kam besilo ni  turah munyerahen bagien-bagien tubuh ni kam mujadi hamba kebenaran si mumai kam ku pengudusen.

20 Sebeb waktu kam temuluk ni dosa, kam bebas ari kebenaran.

21 Den hana ke uah si idepet kam sebagé hasilé? Bèwèné oya munos kam murasa kemél se ni, kerna pemarin ni bèwèné a  oyale kematénen.

22 Tetapé se ni, nge mari kam imerdékanen ari dosa den nge mari kam mujadi hamba Allah, kam mudepet uah si mumai kam ku pengudusen den pemariné oyale murip si kekal.

23 Sebeb upah dosa oyale maut; tetapé karunie ni Allah oyale murip si kekal wan Kristus Yesus, Tuhente.