Lukas 1

Pendahuluen  1: 1-4

Teopilus si mulie,

Delé jema nge berusaha munulis urum teratur tentang peristiwe-peristiwe si nge terjadi i antara ni kite,

2 lagu si isawahen pakea ku kite, si ari muloé mi pakea munèngon urum mataé kendiri den mujadi pelayan Injil oya.

3 Aku si nge munyelidiki segele peristiwe oya urum teliti ari asal muloé mi, muanggap jeroh kin munulisené urum teratur kin ko,                                                                                            

4 kati ko lepas mubetihi bahwa segele sesanah si nge iejeren ku ko sunguh benar.

Penyederen tentang kelahiren ni Yohanes Pembaptis  1: 5-25

5 Waktu jemen ni Herodes, reje i tanoh Yudea, ara sara imem si begeral Zakaria, ari kelompok ni Abia, den banané ari keturunen ni Harun, geralé Elisabet.

6 Pakea roané benar i arap ni Allah, munuruti segele perintah den ketetapen ni Tuhen urum gere mucela.

7 Pakea gere ara muanak, entap ni Elisabet gempus den roané nge lanyut umuré.

8. I sara waktu ketike kelompoké mudepet giliren, Zakaria tengah mulayani sebagé imem i arap ni Allah,

9 munurut resam si ibueten imem-imem, wé ipilih urum cara iundi kin mayo ku was Bait ni Allah nye munèlong kemenyèn;

10 den seluruh umet bedoà i deret waktu penèlongen kemenyèn a.

11 Renyel i oné teridahle ku wé sara malèkat ni Tuhen sesuk i semelah kuen ni mezbah ton munèlong kemenyèn a.

12 Zakaria gerle waktu munèngon malèkat a, den keterihen munimpeé.

13 Tetapé iperin malèkat a ku wé : “Enti terih, Zakaria, sebeb doàmu nge ipengé, den bananmu Elisabet malé mulahiren sara anak rawan kin ni ko, den ko turah mugerali wé Yohanes.

14 Den ko kasé malé besukacite urum begegalak, nye delé jema gegalaken kin kelahirené a.

15 Sebeb wé kasé mujadi jema kul i arap ni Tuhen, den wé gere nguk minum anggur atawa minumen keras, den wé kasé iengkipi Roh Kudus bahkan ari rahim ni ineé mi.

16 Den wé kasé munamik delé urang Israel balik ku Tuhen, Allah ni pakea;

17 den wéle kasé si remalan munuloi Tuhen wan roh urum kuasa ni Elia kin munubah até ni ama-ama ku anak-anaké, den munubah jema si gere taat ku pikiren jema si benar, den munyedienen kin Tuhen sara umet si nge siep.”

18 Renyel iperin Zakaria ku malèkat a : “Kune aku lepas mubetihi hal ni? Sebeb aku nge tue den bananku pé nge lanyut umuré.”

19 Jeweb malèkat a ku wé : “Aku inile Gabriel si sesuk i arap ni Allah, den aku nge iutus kin becerak ku ko nye munyawahen keber jeroh ni kin ko.

20 Ingetle, kasé ko mujadi bisu den gere lepas becerak sawah ku loé waktu hal ni terjadi, entap ni ko gere percaya kin pecerakanku si malé igenapi i waktué.”

21 Waktu oya jema-jema tengah munantinen Zakaria, den pakea hèran sebeb wé dum mokoté i was Bait ni Allah.

22 Ketike wé tangkuh, wé gere lepas becerak ku pakea, den ibetihi pakeale bahwa wé nge munèngon sara penèngonen i was Bait ni Allah; den wé dor munosah tene ku pakea sebeb wé tetap bisu.

23 Nge mari munge waktu pelayanené, wé pé ulak ku umahé.

24 Pepien lo nge mari oya, banané Elisabet benemah, den selama lime bulen wé mununinen dirié, kené :

25 “Lagu inile pebueten ni Tuhen kin naku i waktu Wé mumerhatinen aku, kin munosopen haibku i arap ni jema.”

Penyederen tentang kelahiren ni   Yesus  1: 26-38

26 I bulen si keonom Allah munutus malèkat Gabriel ku sara kute i Galilea, si begeral Nazaret,

27 ku sara beberu perawan ilen si bebiak urum sara bebujang begeral Yusup, keturunen ni Daud; geral ni beberu a Maria.

28 Den malèkat a gèh ku Maria, nye mumerin : “Salam, ko si nge iberkati, Tuhen urum ko.”

29 Den wé olok gerle kerna peceraken a, nye pekekune wan atéwé sana meksud ni salam ini.

30 Renyel iperin malèkat a ku wé : “Enti terih, Maria, sebeb ko nge mudepet kasih karunie ni Allah.”

31 Sesunguhé ko malé benemah nye mulahiren sara anak rawan, den ko kasé mugerali-É Yesus.

32 Kasé Wé mujadi kul den iperin Anak ni Allah Si Mahaatas, den Tuhen Allah malé mungarunienen ku Wé takhta Daud, muyang datu-É,

33 den Wéle kasé si mumerintah atas keturunen ni Yakup dak selamaé, den kerejeen-É gere berakhir.”

34 Renyel iperin Maria ku malèkat a : “Kune hal ni nguk terjadi, kerna aku beberu ilen?”

35 Jeweb malèkat a, iperiné ku wé : “Roh Kudus kasé turun ku atasmu, den kuasa ni Allah Si Mahaatas mulongohi ko; entap ni oya Si Kudus si ilahiren a kasé iperin Anak ni Allah.

36 Sesunguhé Elisabet, suderemu, wé pé nge benemah anak rawan i masa tueé, den inile bulen si keonom kin wé si iperin gempus.

37 Sebeb kin Allah gere ara si mustahil.”

38 Renyel iperin Maria : “Sesunguhé aku ni hamba ni Allah; terjadile kireé ku aku sesué urum pecerakanmu a. Mari oya malèkat a beluh munaringen wé.

Maria munentongi Elisabet 1:  9-45

39 I waktu oya pe Maria langsung beluh ku daerah pegunungen, ku sara kute i Yehuda,

40 den wé mayo ku wan umah ni Zakaria nye munosah salam ku Elisabet.

41 Sentan ipengé Elisabet salam ni Maria wa, mulumpetle bayi si i was rahimné a, den Elisabet pé engkip urum Roh Kudus,

42 den wé metuk urum ling keras, kené : “Iberkatile ko i antara ni jema banan! Den iberkatile uah ni rahimmu!

43 Sahan ke aku ni sehinge ine ni Tuhenku gèh ku aku?

44 Sebeb sesunguhé sentan sawah ling ni salammu  ku kemiringku, bayi was rahimku mulumpet kegalaken.

45 Iberkatile wé si nge percaya ni, sebeb sana si iperinen ku wé ari Tuhen pasti terjadi.”

Nyanyien pujien ni Maria 1:  46-56

46 Renyel iperin Maria :

“Jiwengku mumulienen Tuhen,

47 den rohku gegalakan i wan

Allah, Juruselamatku,

48 sebeb Wé nge mumerhatinen hamba-É si hine.

Sesunguhé ari besilo ni mi

bèwèné bengsa malé

mumerinen aku mubahgie,

49 entap ni Si Mahakuasa nge mubueten pebueten

si kul kin aku, den

kudusle geral-É.

50 Den rahmat-É turun-temurun

kin pakea si terih ku Wé.

51 Wé nge munuruhen kuasa-É 

urum pumu-É,

icéré-bérénen-É jema si somong atéwé;

52  jema si bekuasa iturunen-É 

ari takhtaé

den jema si renah

iatasen-É,

53  jema si mulapé 

iengkipi-É urum hal si jeroh

den jema kaya ikini-É

beluh urum pumu si soh.

54 Wé nge munulung Israel hamba-É, kin muningeti belas kasihen-É,

55 lagu si nge ijanyinen-É  

ku muyang datunte,

ku Abraham urum

keturunené

 kin selamaé.”

56 Den Maria taring urum Elisabet kire-kire tulu bulen, renyel wé ulak ku umahé.

Kelahiren ni Yohanes Pembaptis 1: 57-66

57 Renyel sawahle waktu ni Elisabet kin besalin, den wé mulahiren sara anak rawan.

58 Waktu tetangga si kuen kiri urum biak sudereé mumengé bahwa Tuhen nge munuruhen belas kasihen-É si kul kin wé, besukecitele pakea urum wé.

59 Den tar lo kewaluhé pakea gèh kin munyuneten anak a, nye malé mugeralié Zakaria munurut geral ni amaé.

60 Renyel iperin ineé : “Enti, wé turah igerali Yohanes.”

61 Den iperin pakea ku wé : “Gere ara ari antara ni keluargamu si begeral lagu oya.”

62 Renyel pakea munosah tene ku amaé kin mungune sahan geral si ikenakié kin anaké a.

63 Zakaria muniro sara atu tulis nye munulis lagu ni : “Geralé Yohanes.” Den pakea bèwèné hèran.

64 Seketike oya pé mukele awahé den muluahle dèlahé, renyel wé becerak nye mumuji Allah.

65 Keterihenle bèwèné jema si taring i sekiter ni pakea, den segele peristiwe a icerakan i seluruh pegunungen Yudea,

66 den bèwèné jema si mumengé a mungune wan atéwé, kené : “Mujadi hana ke anak ni kasé?” Sebeb sesunguhé pumu ni Tuhen munyertai wé.

Nyanyien pujien ni Zakaria 1:67-80

67 Den Zakaria, amaé engkip urum Roh Kudus nye benubuat, kené :

68 “Terpujile Tuhen, Allah ni Israel, sebeb Wé nge munentongi umet-É nye mubebasené,

69 den nge mubangkiten sara

tanuk keselamaten kin kite

i wan keturunen ni Daud,

hamba-É a,

70 – lagu si nge

iperinen-É mulalui awah

ni nabi-nabi si kudus ari

pudaha mi –

71 kin munyelamaten kite ari

musuhte 

urum ari pumu ni bèwèné jema

si begeli até ku kite,

72 kin munuruhen belas kasihen-É

ku muyang datunte

den muninget

pejanyien-É si kudus,

73 sumpah si nge

iucepen-É ku

Abraham, muyang datunte,

kin mungabulené ku kite,

74 kati kite muluah ari

pumu ni musuh,

den lepas mulayani-É

urum gere terih,

75 wan kekudusen urum

kebenaran i arap-É

seumur muripte.

76 Den ko, anakku, kasé

iperin nabi

Si Mahaatas;

sebeb ko remalan,

munuloi Tuhen kin

munyiepen jelen-É,

77 kin munosanen pemetihen

tentang keselamaten ku

umet-É mulalui

pengampunen dosa-dosa ni pakea,

78 entap belas kasihen ni

Allah kite,

i oné kasé

matanlo mencer ari atas

munentongi kite,

79 kin munosah terang kin pakea

si taring wan kegelepen urum

wan bebayangen maut, kin

munemah kiddingte ku

jelen damé sejahtera.”

80 Den anak a makin mutamah kul nye makin mutamah kuet rohé, den wé taring i padang gurun sawah ku lo wé munuruhen dirié ku Israel.